ဇွန် ၄၊ ၂၀၁၇
M-Media
– သောကြာနေ့က မြို့တော် မနီလာရှိ ကာဆီနိုရုံအား ၀င်ရောက်ပစ်ခတ်မီးရှို့သူမှာ အကြမ်းဖက်သမားမဟုတ်ဘဲ အကြွေးပတ်လည်ဝိုင်းနေသည့် လောင်းကစားသမားဖြစ်သည်ဟု ဖိလစ်ပိုင် ရဲတပ်ဖွဲ့က ပြောကြားလိုက်သည်။
ကာဆီနိုရုံ မီးလောင်မှုကြောင့် မီးခိုးမွှန်ကာ လူပေါင်း ၃၆ ဦးထက်မနည်း သေဆုံးခဲ့သည့် အဆိုပါ အဖြစ်အပျက်ကို မိမိတို့၏ တပ်ဖွဲ့ဝင်တစ်ဦးက လုပ်ဆောင်ခဲ့ခြင်းဖြစ်သည်ဟု IS အကြမ်းဖက်အဖွဲ့က ကြေငြာခဲ့သည်။
သို့သော်လည်း ဖိလစ်ပိုင်ရဲတပ်ဖွဲ့က တိုက်ခိုက်သူမှာ လောင်းကစားကြွေး အမြောက်အများရှိနေသည့် ဂျက်ဆီ ဂျာဗီယာ ကားလို့စ်ဆိုသူဖြစ်ပြီး အကြမ်းဖက်သမားမဟုတ်ကြောင်း၊ ၎င်းမှာ တစ်ဦးတည်း တိုက်ခိုက်ခြင်းဖြစ်သည်ဟု ယုံကြည်ရကြောင်း ယနေ့တွင် ထုတ်ပြန်ခဲ့သည်။
တိုက်ခိုက်မှုဖြစ်ပွားအပြီး နာရီအနည်းငယ်အကြာတွင် ကားလို့စ်ကို သေဆုံးလျက် တွေ့ရှိခဲ့ရသည်။
“သူ့မိသားစုက သူဟာ ကာဆီနိုလောက်ကစားကို စွဲလွန်းတာကြောင့် အကြွေးပတ်လည်ဝိုင်းနေတယ်လို့ ပြောပါတယ်” ဟု ရဲတပ်ဖွဲ့ အကြီးအကဲ မစ္စတာ အလ်ဘာယာလ်ဒီက ပြောကြားခဲ့သည်။
ကားလို့စ်မှာ Resorts World Casino ရုံသို့ ၀င်ရောက်ကာ သေနတ်ဖြင့် ပစ်ခတ်ခဲ့ပြီးနောက်ပိုင်းမှာ ကာဆီနိုစက်များအား မီးရှို့ခဲ့သည်။
ထို့နောက် ကန်ဒေါ်လာ ၂.၃ သန်း တန်ဖိုးရှိ ကာဆီနိုအ၀ိုင်းပြားများကို ကျောပိုးအိတ်ထဲ ထည့်ကာ အဆောက်အဦး၏ ဟိုတယ်ဇုန်ထဲသို့ သွားကာ အခန်းတစ်ခုထဲ ၀င်ရောက်ခဲ့သည်။
ရဲတပ်ဖွဲ့ကမူ ကားလို့စ်မှာ ၎င်းကိုယ်ကို မီးရှို့သတ်သေခဲ့သည်ဟု ပြောကြားခဲ့သည်။
Ref: BBC