အစ္စရေး၏ ဖိနှိပ်ညှင်းပမ်းမှုအောက်တွင် ကျင်းပရသည့် ပါလက်စတိုင်းခရစ်ယာန်တို့၏ Sabbath of Light ပွဲတော်

ဧပြီ ၁၇၊ ၂၀၂၃

M-Media

-အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် ဂျေရုစလင်မြို့က ခရစ်တော်ရှင်ပြန်ထမြောက်ရာ Church of the Holy Sepulchre ဘုရားကျောင်းမှာ စနေနေ့က Sabbath of Light ပွဲတော်ကို ခရစ်ယာန်တွေ ကျင်းပခဲ့ကြပါတယ်။ 

ပါလက်စတိုင်းခရစ်ယာန်တွေဟာ ဒီလို ဘာသာရေးပွဲတော်တွေကို လွတ်လွတ်လပ်လပ် ကျင်းပခွင့်ရတာတော့မဟုတ်ပါဘူး။ အစ္စရေးရဲ့ ပိတ်ဆို့ညှင်းပမ်းမှုတွေကို ကြံ့ကြံ့ခံနေရတာ ဖြစ်ပါတယ်။ 

စနေနေ့က Sabbath of Light ပွဲတော်မှာ အစ္စရေးစစ်တပ်ဟာ ခရစ်ယာန်တွေ ဘုရားကျောင်းထဲ လာလို့မရအောင် တားမြစ်တာတွေ လုပ်ဆောင်ခဲ့ပါတယ်။ အမျိုးသမီးတွေနဲ့ ကလေးတွေကို ရိုက်နှက်တာ၊ ခရစ်ယာန်ဘုန်းကြီးတွေကို တွန်းထိုးတာတွေအထိ ဖြစ်ခဲ့ပါတယ်။

“ဒါမျိုးတွေဖြစ်လာတာ ၁၀ စုနှစ်တွေချီနေပြီ။ ကျူးကျော်သူတွေက ဒီလို အခါကြီးရက်ကြီးတွေမှာ အကာအရံတွေလုပ်၊ ရဲတွေ၊ လက်နက်ကိုင်စစ်သားတွေချပြီး လာလို့မရအောင် ပိတ်ပင်တားဆီးမှုကို ကျွန်တော်တို့ ခံစားရတာ ကြာလှပါပြီ။ မြင့်မြတ်နယ်မြေမှာ ဒီနေ့ဟာ အမြင့်မြတ်ဆုံး နေ့တစ်နေ့ပါ။ အော်သိုဒေ့ါစ်ခရစ်ယာန်တစ်ယောက် အာရပ်တစ်ယောက်အနေနဲ့ ကမ္ဘာကြီးကို ပြောချင်တာက ဒီဘုရားကျောင်းနဲ့ ဒီပွဲတော်ဆိုတာ ကျွန်တော်တို့ ပိုင်ဆိုင်မှုပါ။ ဒီအခမ်းအနားကျင်းပမှုကို ဘယ်သူကမှ တားဆီးဟန့်တားပိုင်ခွင့် မရှိပါဘူး။ ကျွန်တော်တို့ဟာ ပါလက်စတိုင်းတွေဖြစ်ပြီး ဒီအမှတ်သညာအတွက်လည်း ဂုဏ်ယူပါတယ်” လို့ ပါလက်စတိုင်း အော်သိုဒေ့ါစ်အသင်းတော် ဒုဥက္ကဌဟောင်း ၀ီလီယံ ခူရီက ပြောပါတယ်။  

အရင်က ဂျေရုစလင် လူဦးရေရဲ့ ၂၀ရာခိုင်နှုန်းဟာ ခရစ်ယာန်တွေ ဖြစ်ပါတယ်။ အစ္စရေးရဲ့ ညှင်းပမ်းမှုတွေကြောင့် ခရစ်ယာန်တွေဟာ မြို့ကနေ ထွက်ပြေးရပြီး ယနေ့အချိန်မှာတော့ မြို့လူဦးရေရဲ့ ၂ ရာခိုင်နှုန်းသာ ရှိပါတော့တယ်။

“ပါလက်စတိုင်းခရစ်ယာန်တွေကို ဒီလို တားမြစ်ကန့်သတ်တာတွေဟာ အခုမှဖြစ်တာ မဟုတ်ပါဘူး။ အစ္စရေးလက်ယာစွန်းအဖွဲ့တွေရဲ့ လှုပ်ရှားမှု တစ်စိတ်တစ်ပိုင်းဖြစ်ပါတယ်။ ဂျေရုစလင်ဟာ ဂျူးတွေရဲ့အပိုင် ဖြစ်တယ်ဆိုတာမျိုး ပုံဖော်ဖို့အတွက် ဌာနေလူ့အဖွဲ့အစည်းတွေကို ရှင်းလင်းရေး ဆယ်စုနှစ်ချီ မူ၀ါဒချ လုပ်ဆောင်လာတာ ဖြစ်ပါတယ်” လို့ ဂျေရုစလင်အခြေစိုက် လုံခြုံရေးဆိုင်ရာ ကျွမ်းကျင်သူ ဖာဒီ ဟာဘီဘီက ပြောပါတယ်။ 

အစ္စရေးအာဏာပိုင်တွေက ခရစ်ယာန်တွေကို ဖိနှိပ်ညှင်းပမ်းတာမျိုးတွေ လုပ်ဆောင်သလို၊ ဂျူးအခြေချနေထိုင်သူတွေကလည်း ခရစ်ယာန်တွေကို တိုက်ခိုက်တာမျိုး ဂျေရုစလင်မှာ မကြာခဏ ဖြစ်ပွားလေ့ရှိပါတယ်။ 

Ref: Aljazeera