
သမိုင်းမှာ အတုယူစရာတွေလည်း ပါတယ်။ သံဝေဂရစရာ တွေလည်းပါတယ်။ “သတင်း”ဆိုတာမှာလည်း ဒီနှစ်ခုစလုံးပါလေရဲ့။
ဒါပေမယ့် သတင်းစာဟာ ခေတ်ပြိုင်အသံဖြစ်တယ်။ သမိုင်းဆိုတာကတော့ အတိတ်ရဲ့ ပဲ့တင်သံပဲဖြစ်တယ်။
ခေတ်ပြိုင်အသံဟာ စိတ်လှုပ်ရှားမှုကို ပိုပြီးဖြစ်စေတယ်။ ညှို့ဓာတ် ပိုကဲတယ်။ စာနာထိုက်တာကို ဖတ်ရ၊ကြားရရင် ကရုဏာ စိတ်ကိုဖြစ်စေတယ်။ ၀မ်းသာစရာကို ဖတ်ရ၊ ကြားရရင် ကြည်နူးစိတ်ကို ဖြစ်စေတယ်။ ၀မ်းနည်းစရာကို ဖတ်ရ၊ကြားရရင် ကြေကွဲစိတ် ကိုဖြစ်စေတယ်။ သတင်းဟာ လူ့စိတ်ကို ထိလွယ် ခိုက်လွယ်စေတယ်။ ဒါကြောင့် သတင်းမီဒီယာမှာ စွမ်းအင်ထူး ရှိတယ်။
ဘယ်စွမ်းအင်ပဲဖြစ်ဖြစ် အပြုအတွက်သုံးနိုင်သလို အပျက်အတွက်လည်း သုံးနိုင်တယ်။ အနောက်တိုင်း မီဒီယာတွေမှာ တစ်ခါတစ်ခါ ဒီလိုစွမ်းအင်တလွဲအသုံးချမှုတွေရှိတယ်။ မရိုးသားတဲ့ သတင်းတိုက်ပွဲတွေကို ဆင်လေ့ရှိတယ်။
မိန်းမပျိုကို အသက်အန္တရာယ်ပြုနေတဲ့ခွေးကို လုံးထွေးသတ်ပုတ် သုတ်သင်လိုက်တဲ့ လူငယ်အတွက် အမေရိကန်ရဲက ချီးကျူးစကားအပြင် မနက်ဖြန်သတင်းစာထဲမှာ “ရဲရင့်တဲ့ အမေရိကန်လူငယ်လေး တစ်ဦးက မိန်းမပျိုရဲ့အသက်ကို ကယ်တင်လိုက်ခြင်း”ဆိုတဲ့ သတင်းကို ဖတ်ရစေ့မယ်လို့ပါ သတင်းကောင်းပါးလိုက်သေးတယ်။ ဒါပေမယ့် လူငယ်လေးက သူဟာ အမေရိကန်နိုင်ငံသား မဟုတ်ပါဘူး၊ ဆော်ဒီ နိုင်ငံသားပါလို့ ပြောလိုက်တော့ နောက်နေ့မနက်သတင်းစာမှာ ပါလာတာက “အပြစ်မဲ့တဲ့ အမေရိကန်ခွေးတစ်ကောင်ကို အစ္စလာမစ် အကြမ်းဖက်တစ်ဦးက သတ်ပစ်လိုက်ခြင်း” တဲ့။
ဒါဟာ ရယ်မောစရာ ပြက်လုံးတစ်ခုအဖြစ် ရေးထားတာပါ။ ဒါပေမယ့် ရယ်စရာရဲ့ နောက်ကွယ်မှာ မောစရာပါနေတာကိုတော့ သတိပြုစေချင်ပါတယ်။ ဒါဟာ တကယ့်ဖြစ်ရပ်မှန် မဟုတ်ပေမယ့် တကယ့်ဖြစ်ရပ်မှန်ပေါင်းများစွာရဲ့ ပုံရိပ်စစ်ဖြစ်ပါတယ်။ “အပြစ်မဲ့” “အကြမ်းဖက်”ဆိုတဲ့ စကားလုံးလေးတွေကို အလိုက်သင့် လိုတိုး ပိုလျှော့လုပ်သွားရုံနဲ့ လိုရာဆွဲ အနက်ဖော်ဆောင်ပြီးသား ဖြစ်သွား ပါတယ်။
အပြစ်မဲ့ အသတ်ခံရသူတွေကို လူတွေက သနားရမယ့်အစား သေတာတောင် နည်းသေးတယ်ဆိုတာမျိုး ရွံရှာမုန်းတီးသွားစေပြီး လူသတ်ကောင်တွေကိုကျတော့ ကမ္ဘာကြီးရဲ့ အမှိုက်သရိုက်တွေကို ရှင်းပေးနေတဲ့ လောကအလှဆင်သူတွေအဖြစ် ပြောင်းပြန်ဇောက်ထိုး အကဲဖြတ်အမှတ်ပေးမိကြအောင်လည်း မီဒီယာတွေက မျက်လှည့်ပြ တတ်ကြပါတယ်။
သတင်းမှားတွေဟာ သမိုင်းမှားတွေကို တည်ဆောက်ပေး ပါတယ်။ အစ္စလာမ်သာသနာနဲ့ မွတ်စလင်တွေအပေါ် ကမ္ဘာ့မီဒီယာရဲ့ တစ်ဖက်စောင်းနင်း သတင်းမှားလွှင့်မှုတွေက အင်နဲ့အားနဲ့ ရှိလှပါတယ်။ ကိုယ့်သမိုင်းကို ကိုယ်သာ ကာကွယ်ကြရပါလိမ့်မယ်။
Leave a Reply
You must be logged in to post a comment.