မတ် ၁၄၊ ၂၀၁၄
M-Media
– မန်ချက်စတာယူနိုက်တက်အသင်း၏ ဟော်လန်တိုက်စစ်မှူး ဗန်ပါစီက မိမိမှာ အသင်းတွင်ပျော်ရွှင်နေပြီး သက်တမ်းတိုးစာချုပ် ချုပ်ဆိုရန်လည်း အသင့်ဖြစ်ကြောင်း ပြောဆိုလိုက်သည်။
ဆိုးရွားသောရလဒ်များ၊ နည်းပြ မိုယက်စ်နှင့် အဆင်မပြေမှုများကြောင့် အသင်းမှ ထွက်ခွာတော့မည်ဟု သတင်းများထွက်ပေါ်နေပြီး၊ ထိုသတင်းများအား ဗန်ပါစီက ငြင်းဆိုလိုက်ပြီး မန်ယူအသင်းတွင် ဆက်နေရန် ဆန္ဒရှိသည်ဟု ဆိုသည်။
“အမှန်ကတော့ ကျွန်တော် ဒီအသင်းမှာ ပျော်ပါတယ်။ အရင်က ကျွန်တော် လေးနှစ် စာချုပ် ချုပ်ထားပြီး၊ ကျန်ရှိနေတဲ့ သက်တမ်း ၂ နှစ်အပြီးမှာ ဒီထက်ပိုနေရမယ်ဆိုရင် ကျွန်တော် ပျော်ရွှင်မိမှာပါ။ ကောလဟာလတွေ ထွက်နေပေမယ့် ကျွန်တော်ကတော့ ဒီလိုခံစားရပါတယ်” ဟု ဗန်ပါစီက ပြောကြားခဲ့သည်။
ဗန်ပါစီ မန်ယူမှထွက်ခွာမည်ဆိုသည့် သတင်းများမှာ ၎င်း၏ မိခင်နိုင်ငံ ဟော်လန်မှ ထွက်ပေါ်လာခဲ့ခြင်းဖြစ်သည်။ ဗန်ပါစီမှာ မန်ယူတွင် ကျင်လည်ရသည့်ဘ၀အား စိတ်ပျက်နေပြီး ယခုနှစ်နွေရာသီတွင် မန်ယူအသင်းက ထိုက်တန်သော စာချုပ်သက်တမ်းတိုးခြင်းမရှိပါက အသင်းမှထွက်ခွာတော့မည်ဟု ယခင် ဟော်လန်အသင်း လက်ရွေးစင်ဟောင်း ရော်နယ် ဒီ ဘိုးဝါးက ပြောကြားခဲ့သည်။
ထို့ပြင် ဗန်ပါစီမှာ နည်းပြမိုယက်စ်၏ နည်းစနစ်များနှင့် အံဝင်ခွင်ကျဖြစ်ရန် ခက်ခဲနေသည်ဟူသော သတင်းများလည်း ထွက်ပေါ်ထားသည်။
Leave a Reply
You must be logged in to post a comment.