News @ M-Media

ယူကရိန်းနယ်စပ်ရှိ ရုရှား စစ်တပ် ရုပ်သိမ်းရန် ပူတင်အား အိုဘားမား တိုက်တွန်း

မတ် ၂၉ ၊ ၂၀၁၄
M-Media

– ယူကရိန်းနယ်စပ်တစ်ဝိုက် ရုရှားမှချထားသည့် စစ်တပ်များကို ရုပ်သိမ်းရန်အတွက် အမေရိကန်သမ္မတ ဘာရက်အိုဘားမားက ရုရှားသမ္မတ ဗလာဒီမာပူတင်အား တိုက်တွန်းပြောကြားလိုက်သည်ဟု သိရသည်။

2014328223216686734_20

ယမန်နေ့က ပူတင်နှင့် တိုက်ရိုက်ဖုန်းပြောဆိုမှုအတွင်း အိုဘားမားက ရုရှားတပ်များ ရုပ်သိမ်းခြင်းဖြင့် တင်းမာမှုများ လျော့ကျစေမည်ဟု ပြောကြား ခဲ့ကြောင်း အိမ်ဖြူတော်မှ သတင်းထုတ်ပြန်ခဲ့သည်။ အဆိုပါ ဖုန်းပြောဆိုမှုမှာ ရုရှားထောက်ခံသူ သမ္မတ ယာနူကိုဗစ်ခ်ျ ပြီးခဲ့သည့်လက ပြုတ် ကျသွားပြီးနောက်ပိုင်း ယူကရိန်းနိုင်ငံအတွင်း ဖြစ်ပေါ်လာခဲ့သည့် မတည်ငြိမ်မှုများအတွက် အရေးပါသော ခေါင်းဆောင်နှစ်ဦး ပထမဆုံး တိုက်ရိုက်ပြောဆိုခြင်းလည်းဖြစ်သည်။

ပူတင်ကလည်း လက်ရှိယူကရိန်းကြားဖြတ်အစိုးရမှာ အစွန်းရောက်များ၏ သောင်းကျန်းမှုကို ခွင့်ပြုထားသည်ဟု အိုဘာမားအား သတိပေးခဲ့ပြီး၊ အခြေအနေအားတည်ငြိမ်ရန်အတွက် နိုင်ငံတကာအသိုင်းအ၀ိုင်းမှ ခြေလှမ်းများကိုလှမ်းရန် အကြံပြုပြောကြားခဲ့သည်။

ယူကရိန်းနယ်စပ်အားဝန်းရံကာ တပ်များချထားရန် ရုရှားသမ္မတမှ မကြာသေးမီက အမိန့်ပေးထားပြီး၊ ထိုတပ်များ၏ အရေအတွက်မှာ စုစုပေါင်း ခန့်မှန်းခြေ လေးသောင်းခန့်ရှိမည်ဟု အမေရိကန်က ယမန်နေ့တွင် ပြောကြားခဲ့သည်။

ရုရှားတပ်များမှာ စစ်ရေးလေ့ကျင့်မှု အယောင်ဆောင်ကာ ယူကရိန်းနိုင်ငံအား ၀န်းရံထားခြင်းဖြစ်သည်ဟု CBS သတင်းဌာနသို့ အိုဘားမားက ပြောကြားခဲ့သည်။ ထို့ပြင် အနောက်နိုင်ငံများမှ ရုရှားအား ၀န်ရံပိတ်ဆို့ရန် ကြိုးစားနေသည်ဟု ပူတင်၏စွပ်စွဲမှုကိုလည်း အိုဘားမားက ငြင်းဆန်ခဲ့သည်။

ပင်လယ်နက်ဒေသတွင် အချက်အချာကြသည့် ခရိုင်းမီးယားဒေသအား ရုရှားတပ်များမှ ထိန်းချုပ်လိုက်ပြီး၊ ယူကရိန်းတပ်များအားလုံး ထိုဒေသမှ ထွက်ခွာသွားပြီဟု ရုရှားကာကွယ်ရေးဝန်ကြီး ဆာဂျီ ရှီဂူက မကြာသေးမီက ပြောကြားထားသည်။

Agencies
Photo-AP

Comments

Leave a Reply