News @ M-Media

မြန်မာနိုင်ငံတွင် ပဋိပက္ခအတွင်း လိင်အကြမ်းဖက်မှု စစ်ဆေးရေး အတွက် ကုလအတွင်းရေးမှူးချုပ်မှ တွန်းအားပေး

ဧပြီ ၂၃၊ ၂၀၁၄
M-Media
Ban-Ki-moon
ဧပြီလ ၂၅ ရက် သောကြာနေ့တွင် ကုလသမဂ္ဂလုံခြုံရေးကောင်စီမှ ပဋိပက္ခအတွင်း လိင်အကြမ်းဖက်မှုဆိုင်ရာ အချေအတင်ဆွေးနွေးပွဲ တစ်ရပ် အတွက် ပြင်ဆင်နေပြီဖြစ်၍ ကုလ အတွင်းရေးမှူးချုပ် ဘန်ကီမွန်းသည် မြန်မာအစိုးရအား လိင်အကြမ်းဖက် ရာဇ၀တ်မှုများအပေါ် အပြည့်အ၀စုံစမ်းစစ်ဆေးရန်၊ အကြမ်းဖက်ခံများကို ကုလအဖွဲ့နှင့်အတူ ကာကွယ်ကူညီမှု၌ ပူးပေါင်းဆောင်ရွက်ရန် တိုက်တွန်းနှိုးဆော်လိုက်သည်။

ကုလအတွင်းရေးမှူးချုပ်သည် ၂၀၁၂ ခုနှစ်ကစ၍ ပဋိပက္ခတွင်း လိင်အကြမ်းဖက်ခြင်းဆိုင်ရာ ကုလလုံခြုံရေးကောင်စီ၏နှစ်စဉ်ဆွေးနွေးပွဲသို့ နှစ်စဉ်နှစ်တိုင်း အစီရင်ခံစာ တင်ပြခဲ့သည်။ သူ၏နောက်ဆုံးအစီရင်ခံစာ၌ စုံစမ်းစစ်ဆေးရေးပြုလုပ်ရန် တိုက်တွန်းချက်တစ်ရပ် ပါဝင်ခဲ့သည်။ ကုလအတွင်းရေးမှူးချုပ်အနေနှင့် ယင်းသို့ထည့်သွင်းခြင်းမှာ ပထမဆုံးအကြိမ်ဖြစ်သည်။ ယခင်အစီရင်ခံစာများနှင့်နှိုင်းစာလျှင် ဤအစီရင်ခံစာ၌ မြန်မာနိုင်ငံအပိုင်းကို အနည်းငယ် အလေးကဲ ဖော်ပြထားသည်။

မြန်မာနိုင်ငံရှိ လိင်အကြမ်းဖက်မှုများကို အလေးပေးထားခြင်းနှင့် စုံစမ်းစစ်ဆေးမှုအတွက်တိုက်တွန်းထားခြင်းအပေါ် ဗြိတိန်အခြေစိုက် မြန်မာ့အရေးလှုပ်ရှားသူများအဖွဲ့က ကုလအတွင်းရေးမှူးချုပ်အား ကြိုဆိုလိုက်ကြောင်း ကမ်ပိန်းမန်နေဂျာ Zoya Phan မှ ပြောကြားသည်။

“ လူ့အခွင့်အရေးချိုးဖောက်မှုတွေနဲ့ပတ်သက်ပြီး ခိုင်မာထိရောက်တဲ့စုံစမ်းစစ်ဆေးမှုပြုလုပ်ဖို့ ကုလသမဂ္ဂအနေနဲ့ မြန်မာအစိုးရကို အကြိမ်ပေါင်းများစွာ တိုက်တွန်းထားပြီးဖြစ်ပေမယ့် လျစ်လျူရှုခဲ့တာချည်းပါပဲ။ ဒီတစ်ကြိမ်မှာတော့ ကုလသမဂ္ဂကိုယ်တိုင် စုံစမ်းစစ်ဆေးဖို့ အချိန်တန်ပါပြီ”။

မြန်မာနိုင်ငံလိင်အကြမ်းဖက်မှုကိစ္စကို ကုလလုံခြုံရေးကောင်စီဆွေးနွေးပွဲကာလအတွင်း အသံမြှင့်တင်ရန်အတွက် ဗြိတိသျှအစိုးရအား Burma Campaign UK မှ တွန်းအားပေးသွားမည်ဖြစ်သည်။ လိင်အကြမ်းဖက်မှုဆိုင်ရာ ထိရောက်သောပြစ်ဒဏ်ခတ်မှုကင်းလွတ်နေခြင်းကို အဆုံးသတ်ရေးဟု ထုတ်ဖော်ပြောကြားလင့်ကစား မြန်မာနိုင်ငံနှင့်ပတ်သက်သည့် ၎င်းအချက်အပေါ် ဗြိတိသျှအစိုးရမှ တစ်စုံတစ်ရာ အရေးယူဆောင်ရွက်မှု မရှိ။ သို့သာမက မုဒိမ်းကျင့်ခြင်းကို လက်နက်အဖြစ်အသုံးချနေဆဲဖြစ်သော မြန်မာစစ်တပ်ကို သင်တန်းပင် ပေးလိုက်သေးသည့်အတွက်ကြောင့် ဖြစ်၏။

မြန်မာနိုင်ငံရှိ မုဒိမ်းမှုနှင့် လိင်အကြမ်းဖက်မှုဆိုင်ရာ အသေးစိတ်အစီရင်ခံစာတစ်စောင်ကို Burma Campaign UK မှ ထုတ်ဝေထားပြီးဖြစ်သည်။

ကုလအတွင်းရေးမှူးချုပ်၏အစီရင်ခံစာ၌ အောက်ပါ Link တွင် အပြည့်အစုံ ဖတ်နိုင်သည်။

Rape and Sexual Violence by the Burmese Army

“ ပြည့်ပြည့်၀၀ စုံစမ်းစစ်ဆေးဖော်ထုတ်ဖို့၊ လက်ရှိကာလနဲ့ သမိုင်းကြောင်းတစ်လျှောက် လိင်အကြမ်းဖက် ဒုစရိုက်မှုများအပါအ၀င် လူ့အခွင့်အရေးချိုးဖောက်မှုများအပေါ် တုန့်ပြန်ဖို့ ရှုတ်ချဖို့ မြန်မာအစိုးရကို ကျွန်တော် တိုက်တွန်းလိုက်ပါတယ်။ အကြမ်းဖက်ခံများအတွက် ထိုက်သင့်လျောက်ပတ်သော ကာကွယ်ရေးနဲ့ နစ်နာမှုဆောင်ရွက်ပေးရေးကို ကုလသမဂ္ဂနဲ့အဖွဲ့ဝင်နိုင်ငံများရဲ့ကူညီမှုနဲ့အတူ တွဲလုပ်ဖော်ဆောင်ဖို့ ကျွန်တော် တိုက်တွန်းလိုက်ပါတယ် ”

Comments

Leave a Reply