ဇွန်လ ၁၈ ရက်၊ ၂၀၁၄
M-Media
– အငြင်းပွားနေသည့် ရေပိုင်နက်အား ပိုင်ဆိုင်ကြောင်း ဗီယက်နမ်နိုင်ငံက ကြေညာမှုကို အသိအမှတ်မပြုဘဲ၊ ထိုရေပိုင်နက်အတွင်း တရုတ်နိုင်ငံ၏ ဆောင်ရွက်မှုများအား ဗီယက်နမ်က နှောက်ယှက်ခြင်းကို ရပ်တန့်ရမည်ဟု တရုတ်နိုင်ငံတော်ကောင်စီ အကြီးအကဲ ယန် ဂျီချီက ပြောကြားလိုက်သည်။
ဗီယက်နမ်နိုင်ငံခြားရေးဝန်ကြီး၊ ၀န်ကြီးချုပ် ငုယင်တန်ဒေါင်တို့နှင့် ယနေ့ တွေ့ဆုံဆွေးနွေးမှုအတွင်း ယန်က ပြောကြားခဲ့ခြင်းဖြစ်ပြီး အငြင်းပွားနေသည့် ပါရာဆယ်ကျွန်းမှာ တရုတ်တို့၏ ဘိုးဘွားပိုင် ပိုင်နက်ဖြစ်သည်ဟုဆိုသည်။
ထိုကဲ့သို့ တွေ့ဆုံ ဆွေးနွေးမှုမှာ ထိုကျွန်းအနီး ရေပိုင်နက်ထဲသို့ တရုတ်မှ ရေနံစင်ချထားမှုကို မကျေနပ်သောကြောင့် ဗီယက်နမ်တွင် မေလဆန်းပိုင်းက တရုတ်ဆန့်ကျင်ရေး တိုက်ခိုက်မှုများဖြစ်ပေါ်ခဲ့ပြီးနောက်ပိုင်း နှစ်နိုင်ငံ ဆက်ဆံရေး ပြေလည်စေရန်အတွက် ပထမဆုံးအကြိမ်အဖြစ် အဆင့်မြင့်အရာရှိကြီးများ တွေ့ဆုံခြင်းဖြစ်သည်။
လက်ရှိဖြစ်ပွားနေသည့် ပြဿနာမှာ ဗီယက်နမ်၏ တရားမ၀င် နှောက်ယှက်မှုကြောင့်ဖြစ်သည်ဟု ယန်က ထည့်သွင်းပြောကြားခဲ့သည်။ ဗီယက်နမ်ကမူ ထိုကျွန်းစုမှာ ဗီယက်နမ်ပြည်တွင်းစစ်ပွဲ မပြီးခင် ၁၉၇၄ ခုနှစ်က တောင်ဗီယက်နမ်ပိုက်နက်ဖြစ်ပြီး တရုတ်နိုင်ငံက သိမ်းယူခဲ့ခြင်းဖြစ်သည်ဟု ပြောကြားခဲ့သည်။
ဗီယက်နမ်တွင်ဖြစ်ပွားခဲ့သည့် တရုတ်ဆန့်ကျင်ရေးတိုက်ခိုက်မှုများအတွက် နှစ်နိုင်ငံစလုံးက အပြင်အလှန်ပြစ်တင်ပြောဆိုခဲ့ကြသည်။ လက်ရှိအနေအထားတွင် တရုတ်နှင့် ဗီယက်နမ်တို့၏ နှစ်နိုင်ငံ ဆက်ဆံရေးမှာ ၁၉၇၉ ခုနှစ် နယ်စပ်စစ်ပွဲပြီးကတည်းက အနိမ့်ဆုံးအခြေအနေသို့ ရောက်ရှိစေသည်။
AFP
Leave a Reply
You must be logged in to post a comment.