အောက်တိုဘာ ၁၈ ၊ ၂၀၁၄
M-Media
– မိမိတို့အသင်းမှာ လက်ရှိချန်ပီယံ ဂျူဗင်တပ်စ်အသင်းထက် ပိုမိုတောင့်တင်းပြီး ယခုနှစ် စီးရီးအေ ချန်ပီယံဘွဲ့ကို ဆွတ်ခူးနိုင်လိမ့်မည်ဟု ရိုးမားနည်းပြ ရူဒီ ဂါစီယာက ကတိပေး ပြောကြားလိုက်သည်။
နိုင်ငံတကာပြိုင်ပွဲများ မကစားမီတစ်ပတ်က ၎င်းတို့နှစ်သင်း တွေ့ဆုံခဲ့ရာတွင် ဂျူဗင်တပ်စ်မှာ ရိုးမားအား ၃ ဂိုး ၂ ဂိုးဖြင့် အနိုင်ရခဲ့ပြီး၊ ထိုပွဲတွင် ပေးခဲ့ရသည့် ပင်နယ်တီတစ်လုံးအတွက် ဂါစီယာက ဒေါသတကြီး ပေါက်ကွဲခဲ့သောကြောင့် ဝေဖန်မှုများကိုလည်း ခံခဲ့ရသည်။
ဂါစီယာကမူ မိမိတို့အသင်းမှာ ယခုနှစ် စီးရီးအေချန်ပီယံဘွဲ့ကို ဆွတ်ခူးရရှိရန်အတွက် လုံလောက်အောင် ကောင်းမွန်သည်ဟု ပြောကြားခဲ့သည်။
“အဲဒီပွဲမှာ ကျွန်တော့်ကစားသမားတွေအတွက် ဂုဏ်ယူပါတယ်။ ကျွန်တော်တို့ဟာ ဂျူဗင်တပ်စ်ထက် ပိုတောင့်တင်းတယ်ဆိုတဲ့ လက္ခဏာမျိုး သူတို့ ပြသခဲ့ကြပါတယ်။ ပြီးတော့ ကျွန်တော် ပြတ်ပြတ်သားသားပြောချင်တာက ကျွန်တော်တို့ဟာ ချန်ပီယံဘွဲ့ကို ဆွတ်ခူးမယ်ဆိုတာပါပဲ။ ကျွန်တော်တို့ လုပ်နိုင်ပါလိမ့်မယ်” ဟု ဂါစီယာက သတင်းထောက်များအား ပြောကြားခဲ့သည်။
ရိုးမားအသင်းမှာ စီးရီးအေ ၆ ပွဲကစား ၁၅ မှတ်ဖြင့် ဂျူဗင်တပ်စ်အသင်းနှင့် ၃ မှတ်အကွာ ဒုတိယနေရာတွင် ရှိနေသည်။
Leave a Reply
You must be logged in to post a comment.