နိုဝင်ဘာ ၂၀၊ ၂၀၁၄
M-Media
– မိမိအနေဖြင့် ဘာကာနှင့် ဆုဖလားများရရှိအောင် အာရုံစိုက်ထားသော်လည်း အသင်းတွင် ကြာရှည်ရှိနေရန်မှာ မသေချာဟု အသင်း၏ အာဂျင်တိုင်းတိုက်စစ်မှူး လီယွန်နယ် မက်ဆီက ပြောကြားလိုက်သည်။
ဘာစီလိုနာနှင့် အောင်မြင်မှုသရဖူဆောင်းနိုင်ခဲ့သည့် မက်ဆီမှာ ဘာကာတွင်သာ ပျော်ရွှင်နေပြီး မိမိ၏ကစားသမား နောက်ဆုံးပိုင်းတွင် ကလေးဘ၀က ကစားခဲ့သည့် အာဂျင်တိုင်းကလပ် Nweell အသင်းသို့ ပြောင်းရွှေ့မည်ဟု ယခင်က ပြောကြားခဲ့သည်။
သို့သော်လည်း ယမန်နှစ်မှ စတင်ကာ ဒဏ်ရာပြဿနာများ၊ အခွန်ရှောင်သည့် ပြဿနာများ၊ ကွင်းအတွင်း ခြေစွမ်းမပြနိုင်မှုများ စသည်ဖြင့် မက်ဆီမှာ ရုန်းကန်ခဲ့ရသည်။
“ကျွန်တော်ဟာ လက်ရှိအချိန်မှာ ရှင်သန်နေတာပါ။ ဘာစီလိုနာမှာ ကောင်းမွန်တဲ့ နှစ်တစ်နှစ်ဖြစ်ဖို့နဲ့ ကျွန်တော်တို့လိုချင်တာတွေကို ဘာစီလိုနာနဲ့ ရယူနိုင်ဖို့အတွက် ကျွန်တော် တွေးတောနေပါတယ်။ တစ်ခြားဘာမှ မရှိပါဘူး။ နောက်ပိုင်းဆိုတာကတော့ ကျွန်တော်ကြည့်ရမှာပါ။ ဘောလုံးလောကမှာ အလှည့်အပြောင်းတွေ များပါတယ်။ ဘာကာမှာပဲ အမြဲတမ်းနေမယ်လို့ ကျွန်တော် အမြဲတမ်း ပြောခဲ့ပါတယ်။ ဒါပေမယ့် အကြောင်းအရာတွေက ကျွန်တော်တို့ဖြစ်ချင်သလို ဖြစ်လာတာ မဟုတ်ပါဘူး” ဟု Ole အားကစားသတင်းစာနှင့် အင်တာဗျူးတွင် မက်ဆီက ပြောကြားခဲ့သည်။
အကယ်၍ အသင်းမှထွက်ခွာပါက ကိုယ်ပိုယ်ဆုံးဖြတ်မှုဖြစ်မည်လား သို့မဟုတ် အသင်းမှရွေးချယ်ခြင်း ဖြစ်မည်လားဟု မေးမြန်းခဲ့ရာ မက်ဆီက မိမိ၏ဆန္ဒဖြင့်ဆိုလျှင် အသင်း၌ အမြဲတမ်းရှိနေမည်ဖြစ်ကြောင်း ထည့်သွင်း ပြောကြားခဲ့သည်။
အသင်းဥက္ကဌ ဆန်ဒရို ရိုဆဲလ် ဇန်န၀ါရီလက ထွက်ခွာသွားခဲ့ခြင်း၊ နေးမာအား ခေါ်ယူမှုနှင့် ပတ်သက်၍ အရှုပ်အထွေးများရှိနေခြင်း၊ လာလီဂါတွင် ရှုံးပွဲများ ဆက်တိုက်ကြုံတွေ့ခဲ့ရခြင်း စသည်တို့ကြောင့် ဘာစီလိုနာမှာ ယခုလက်ရှိတွင် ဝေဖန်မှုအများအပြားနှင့် ရင်ဆိုင်နေရသည်။
Leave a Reply
You must be logged in to post a comment.