News @ M-Media

အကျဉ်းသားများအား စီအိုင်အေ၏ နှိပ်စက်ငြှင်းပမ်းမှု အစီရင်ခံစာ ထုတ်ပြန်မည်

ဒီဇင်ဘာ ၉ ၊ ၂၀၁၄
M-Media

_79605257_79605256
– ၉/၁၁ တိုက်ခိုက်မှုပြီးနောက်ပိုင်း ဖမ်းဆီးထားသည့် သံသယရှိသူများကို CIA ၏ ကြမ်းတမ်းစွာ စစ်ကြောမေးမြန်းမှုများနှင့် ပတ်သက်သည့် အစီရင်ခံစာအား ထုတ်ပြန်ရန်ရှိသောကြောင့် ကမ္ဘာတစ်ဝှမ်းရှိ အမေရိကန် သံရုံးများအား လုံခြုံရေးတိုးမြှင့်ထားလိုက်သည်ဟု သိရသည်။

အဆိုပါ အစီရင်ခံစာကို ဒီဇင်ဘာ ၉ ရက်နေ့တွင် ထုတ်ပြန်မည်ဖြစ်ပြီး ဥရောပနှင့် အာရှရှိ အမေရိကန်၏ အကျဉ်းစခန်းများတွင် ထိန်းသိမ်းထားသော အကျဉ်းသားများအား အပေါ် CIA က အသုံးပြုခဲ့သော ကြမ်းတမ်းသည့် စစ်ကြောမေးမြန်းမှုများအတွက် ပြည်သူများကို ပထမဆုံး ချပြမည့် အစီရင်ခံစာလည်း ဖြစ်ကြသည်။

`ဒီအစီရင်ခံစာ ထုတ်ပြန်ခြင်းဟာ ကမ္ဘာတစ်ဝှမ်းမှာရှိတဲ့ အမေရိကန်နဲ့ သက်ဆိုင်တဲ့ အဆောက်အဦးတွေ၊ အမေရိကန်နိုင်ငံသားတွေ အတွက် ကြီးမားတဲ့အန္တရာယ် ဖြစ်နိုင်တဲ့ အနေအထားတွေဆီကို ဦးတည်သွားမယ့် လက္ခဏာတွေရှိနေပါတယ်´ ဟု အိမ်ဖြူတော် ပြောရေးဆိုခွင့်ရှိသူ ဂျို့ရှ် အားန်နက်စ်က ပြောကြားခဲ့သည်။

ပြည်သူများအား ဖွင့်ချမည့် အဆိုပါ အစီရင်ခံစာတွင် ၂၀၀၁ ခုနှစ်မှ ၂၀၀၉ ခုနှစ်အတွင်း အကြမ်းဖက်ဝါဒဆိုင်ရာ တရားစွဲမှုများနှင့် ပတ်သက်ပြီး အမေရိကန်တို့မှ ပြုလုပ်ခဲ့သော စစ်ဆင်ရေးအတွင်း ဖမ်းဆီးခဲ့သည့် သံသယရှိသူ ၁၀၀ ၀န်းကျင်အား CIA မှ စစ်ကြောမေးမြန်းခဲ့မှုများနှင့် ပတ်သက်၍ အနှစ်ချုပ် ဖော်ပြထားပြီး စာမျက်နှာ ၄၈၀ ခန့်ရှိသည်ဟု သိရသည်။

အစီရင်ခံစာ အပြည့်အစုံမှာ စာမျက်နှာ ၆၂၀၀ ရှိပြီး လျှို့ဝှက်ထားမည်ဖြစ်ကာ ထိုအစီရင်ခံစာအား ဖတ်ရှုပြီးသည့် အမေရိကန် အာဏာပိုင်များကမူ CIA ၏ ကြမ်းတမ်းသော စစ်ကြောမေးမြန်းမှုများက ထူးခြားပြီး အန္တရာယ်ကင်းသည့် ထောက်လှမ်းရေး လုပ်ငန်းတစ်ခုဖြစ်လာရန် မဆောင်ရွက်နိုင်ခဲ့ကြောင်း ထိုအစီရင်ခံစာက ဖော်ပြနေသည်ဟု ပြောကြားခဲ့သည်။

ကျူးဘားမှ အမေရိကန် စစ်အခြေစိုက် စခန်းရှိ CIA က ဦးစီးသော ဂွာတာနာမို အကျဉ်းစခန်းတွင် အကျဉ်းသားများအား စစ်ကြောမေးမြန်းရာ၌ ရေနှစ်ခြင်း၊ စိတ်ဖိစီးမှုရှိသော အခြေအနေတွင်ထားခြင်းနှင့် အခြားသော ကြမ်းတမ်းသည့် နည်းလမ်းများကို အသုံးပြုခဲ့သည်ဟူသော သတင်းများမှာ ယခင်ကတည်းက ထွက်ပေါ်ထားပြီး နိုင်ငံတကာ လူ့အခွင့်အရေး အဖွဲ့များက ဝေဖန်ကန့်ကွက်မှုများလည်း ပြုလုပ်ခဲ့သည်။

ref_Agencies

Comments

Leave a Reply