လူမည်းများအား ရဲတပ်ဖွဲ့က ပစ်သတ်မှု အတွက် အကြီးဆုံး ဆန္ဒပြမှုများ အမေရိကန် တစ်ဝှမ်းပြုလုပ်

ဒီဇင်ဘာ ၁၄ ၊ ၂၀၁၄
M-Media

– လက်နက်မဲ့ လူမည်းများအား ရဲအရာရှိများက သေနတ်ဖြင့် ပစ်သတ်မှုကို ဆန့်ကျင်သည့် အနေဖြင့် ယမန်နေ့တွင် အမေရိကန်ရှိ မြို့ကြီးများ၌ ပြည်သူများက ချီတက် ဆန္ဒပြခဲ့ကြပြီး နိုင်ငံ အတွင်းရှိ အာဖရိကန်-အမေရိကန်များကို ကာကွယ်မှုပေးရန် အစိုးရအားတိုက်တွန်းပြောကြားခဲ့သည်။

လူထောင်ချီ ပါဝင်သော အဆိုပါ ဆန္ဒပြမှုများကို နယူးယောက်နှင့် ၀ါရှင်တန်မြို့များတွင် ပြုလုပ်ခဲ့ခြင်းဖြစ်ပြီး ရဲတပ်ဖွဲ့က လူနည်းစုများအား ဆက်ဆံမှုနှင့် ပတ်သက်၍ နိုင်ငံလုံးဆိုင်ရာ ကိစ္စဖြစ်လာသည့် ထိုသတ်ဖြတ်မှုများအတွက် ဆန္ဒပြမှုများထဲတွင် အကြီးဆုံးဆန္ဒပြမှုလည်းဖြစ်သည်။

မစ်ဇူရီရှိ မိုက်ကယ်ဘရောင်း အသတ်ခံရမှု၊ နယူးယောက်ရှိ အဲရစ် ဂါနာ အသတ်ခံရမှုတို့တွင် ပါဝင်ခဲ့သည့် လူဖြူရဲအရာရှိများအား တရားစွဲဆိုခြင်းမပြုရန် တရားရုံးမှ ဆုံးဖြတ်ခဲ့ပြီးနောက် နိုင်ငံတစ်ဝှမ်း အဓိကမြို့ကြီးများတွင် ဆန္ဒပြနေမှုများမှာ သီတင်းပတ်နှင့်ချီ၍ ဖြစ်ပေါ်ခဲ့သည်။

ဝါရှင်တန်ဆန္ဒပြမှုကို စီစဉ်ခဲ့သည့် အမျိုးသားလှုပ်ရှားမှုကွန်ယက်မှ ရှာပ့်တန်ကမူ ရဲများပါဝင်သော အမှုများအား ဖက်ဒရယ်တရားသူကြီးများ ကိုင်တွယ်နိုင်မည့် ဥပဒေတစ်ခု ပြဌာန်းပေးရန် ကွန်ဂရက်အား တိုက်တွန်းခဲ့သည်။

ထို့ပြင် ပြည်နယ်ရှိ တရားသူကြီးများမှာ ဒေသတွင်း ရဲတပ်ဖွဲ့များနှင့် ပုံမှန်အလုပ်လုပ်လေ့ရှိကြပြီး ထိုတရားသူကြီးများက အဖြစ်အပျက်များကို စုံစမ်းစစ်ဆေးရာတွင် ၎င်းတို့၏ အကျိုးစီးပွား ထိခိုက်နိုင်မည့် အလားအလာ မြင့်တက်လာနိုင်ဖွယ်ရှိသည်ဟုလည်း ထည့်သွင်းပြောကြားခဲ့သည်။