ဒီဇင်ဘာ ၁၈၊ ၂၀၁၄
M-Media
– ကမ္ဘာတစ်ဝှမ်း ဖြစ်ပွားနေသည့် ပဋိပက္ခများ၌ ယခုနှစ်အတွင်း သတ်ဖြတ်ခြင်းခံခဲ့ရသည့် ဂျာနယ်လစ်အရေအတွက်မှာ ၆၆ ဦးရှိသည်ဟု နယ်စည်းမခြား သတင်းထောက်များအဖွဲ့ RSF က ယမန်နေ့တွင် ထုတ်ပြန်ခဲ့သော အစီရင်ခံစာ၌ ဖော်ပြထားသည်။
နှစ်စဉ် ထုတ်ပြန်သော အစီရင်ခံစာတွင် စနစ်ကျခြိမ်းခြောက်ခြင်းနှင့် ရှင်းလင်းသော ရည်ရွယ်ချက်များအတွက် ခေါင်းဖြတ်ခြင်းတို့နှင့်အတူ ဂျနယ်လစ်များအပေါ် အကြမ်းဖက်သတ်ဖြတ်သည့် သဘာဝမှာ တစ်စတစ်စ ကြမ်းကြုတ်လာသည်ဟု ထည့်သွင်းဖော်ပြခဲ့သည်။
`လူသတ်သမားတွေဟာ အလွန့်အလွန်ကို ကြမ်းကြုတ်လာပြီး လွတ်လပ်စွာ သတင်းတင်ပြမှုကို တားဆီးခြင်း၊ အပြင်ကမ္ဘာက အသေးစိတ်သိအောင် ဆောင်ရွက်မှုတွေကို ဟန့်တားခြင်းတွေနဲ့အတူ ဂျာနယ်လစ်တွေကို ပြန်ပေးဆွဲမှုဟာလည်း တိုးလာနေပါတယ်´ ဟု အဆိုပါ အစီရင်ခံစာတွင် ဖော်ပြထားသည်။
ယမန်နှစ်က သတင်းထောက်များ အသတ်ခံရမှုအရေအတွက်မှာ ၇၁ ဦးရှိပြီး ယခုနှစ်တွင် အနည်းငယ်လျော့ကျခဲ့ကာ ၂၀၀၅ ခုနှစ်မှစ၍ သတင်းထောက်များ အသတ်ခံရမှု အရေအတွက်မှာ ၇၂၀ ခန့်ရှိနေပြီဟု RSF က ဆိုသည်။
ယူကရိန်း၊ အရှေ့အလယ်ပိုင်းနှင့် မြောက်အာဖရိကရှိ လက်နက်ကိုင်တပ်များမှာ ဂျာနယ်လစ်များအား ပြန်ပေးဆွဲမှု နည်းလမ်းကို အသုံးပြုနေသောကြောင့် ယခုနှစ်အတွင်း ပြန်ပေးဆွဲခံရမှုမှာ ၁၁၉ ဦးရှိပြီး ယမန်နှစ်ကထက် ၃၇ ရာခိုင်နှုန်း တိုးလာခဲ့သည်။
ထိုအထဲတွင် ယူကရိန်းမှ ၃၃ ဦး၊ လစ်ဗျားမှ ၂၉ ဦးနှင့် ဆီးရီးယားမှ ၂၇ ဦး ပြန်လည် လွတ်မြောက်လာပြီး ကျန်ဂျာနယ်လစ် ၄၀ မှာ ပြန်ပေးသမားများ၏ လက်ထဲတွင် ရှိနေဆဲဖြစ်သည်။
ထို့ပြင် ကမ္ဘာတစ်ဝှမ်း၌ ဖမ်းဆီးခံထားရသည့် ဂျာနယ်လစ် ဦးရေမှာ ဒီဇင်ဘာ ၈ ရက်နေ့အထိ ၁၇၈ ဦးရှိပြီး တရုတ်နိုင်ငံမှာ ၂၉ ဦးဖြင့် ဂျာနယ်လစ်အများဆုံး ဖမ်းဆီးထားသော နိုင်ငံဖြစ်နေသည်။
ref_ Agencies
Leave a Reply
You must be logged in to post a comment.