News @ M-Media

မက်ဆီမှာ အနားယူသည်အထိ ဘာကာတွင်သာ ရှိနေမည်ဟု ဥက္ကဌ ဘာတိုမြူ ပြော

ဇန်န၀ါရီ ၁၆၊ ၂၀၁၅
M-Media

mes

– တိုက်စစ်မှူး မက်ဆီ အသင်းမှထွက်ခွာမည်ဆိုသည့် သတင်းမှာ မှန်ကန်မှုမရှိဘဲ အသင်းတွင်သာ ကစားသမားဘ၀ကို ကုန်ဆုံးသွားမည်ဟု ဘာစီလိုနာဥက္ကဌ ဘာတိုမြူက ပြောကြားလိုက်သည်။

အသက် ၂၇ နှစ်အရွယ်ရှိ မက်ဆီမှာ အဆင်မပြေမှုများနှင့် ကြုံတွေ့ခဲ့ရပြီးနောက် အသင်းမှ ထွက်ခွာတော့မည်ဟု သတင်းများ ထွက်ပေါ်နေပြီး ချယ်ဆီး၊ မန်စီးတီနှင့် ပီအက်စ်ဂျီအသင်းတို့က ခေါ်ယူရန် စိတ်ဝင်စားနေသည်။

သို့သော်လည်း ဘာတိုမြူကမူ မက်ဆီမှာ ဘာစီလိုနာတွင် ပျော်ရွှင်နေပြီး အသင်းမှထွက်ခွာခြင်းမှာ ၎င်း၏ ရွေးချယ်မှုမဟုတ်ကြောင်း ပြောကြားခဲ့သည်။

`ကျွန်တော် မက်ဆီနဲ့ အဆက်အသွယ်ရှိပါတယ်။ သူ ဒီမှာ ပျော်ရွှင်နေပြီး အောင်ပွဲတွေရဖို့ ကြီးမားတဲ့ ရည်မှန်းချက်၊ ဆန္ဒတွေလည်း ရှိနေပါတယ်။ သူက သူရဲ့ကစားသမားသက်တမ်းကို ဘာကာမှာပဲ ကုန်ဆုံးချင်တယ်လို့ ကျွန်တော့်ကို ပြောပါတယ်။ ပြီးတော့ သူ့ရဲ့ စိတ်အားထက်သန်မှုနဲ့ အာရုံစူးစိုက်မှုက အမြင့်ဆုံးမှာ ရှိနေပါတယ်´ ဟု ဘာတိုမြူက Catalunya Radio သို့ ပြောကြားခဲ့သည်။

ကောလဟာလများနှင့် ပတ်သက်၍လည်း ဘာတိုမြူက မက်ဆီ၏ အနာဂတ်အတွက် ငြင်းခုံဆွေးနွေးမှုများ မရှိကြောင်း၊ မက်ဆီအနေဖြင့် လက်ရှိတွင် အသင်းနှင့် စာချုပ်ရှိနေပြီး ၎င်းကိုယ်တိုင်ကလည်း အသင်းတွင် ဆက်လက်၍ နေချင်နေကြောင်း ထပ်လောင်းပြောကြားခဲ့သည်။

ယခုနှစ်အတွင်း ပြိုင်ပွဲပေါင်းစုံတွင် အသင်းအတွက် ၂၅ ဂိုး သွင်းယူပေးထားသည့် မက်ဆီမှာ ဘာစီလိုနာအသင်းနှင့် ၂၀၁၈ ခုနှစ်အကုန်အထိ စာချုပ်သက်တမ်း ရှိနေသည်။

Ref: Goal.com

Comments

Leave a Reply