News @ M-Media

မက်ဆီနှင့် ရော်နယ်ဒို တစ်ဦးဦး လာလီဂါတွင်မရှိပါက ၎င်းတို့နှစ်ဦးကြား ပြိုင်ဆိုင်မှုလျော့သွားမည်

မတ် ၂၀၊ ၂၀၁၅
M-Media

messi and rnd

– မက်ဆီနှင့် ရော်နယ်ဒိုတို့ တစ်ဦးဦး စပိန်မှ ထွက်ခွာပါက ၎င်းတို့နှစ်ဦးအကြား ပြိုင်ဆိုင်မှုမှာ လျော့နည်းသွားမည်ဟု ဘာစီလိုနာ တိုက်စစ်မှူးဟောင်း ကလွိုက်ဗတ်က ပြောကြားလိုက်သည်။

မက်ဆီမှာ ၂၀၀၄ ခုနှစ်မှစ၍ ဘာစီလိုနာအသင်းတွင် ပွဲထွက်ကစားခွင့်ရခဲ့ပြီး ၂၀၀၉ ခုနှစ်နှောင်းပိုင်း ရော်နယ်ဒို ရီးယဲလ်သို့ ရောက်ပြီးကတည်းက လာလီဂါ၏ ခါးသီးသော ပြိုင်ဘက်အသင်းနှစ်သင်းတွင် ပါဝင်ကစားခဲ့သည့် ၎င်းတို့နှစ်ဦး၏ ပြိုင်ဆိုင်မှုမှာ မြင့်တက်လာခဲ့သည်။

ကမ္ဘာ့အကောင်းအဆုံး ဘောလုံးသမားဆု နောက်ဆုံး ၇ ကြိမ်ကိုလည်း ၎င်းတို့နှစ်ဦးသာ အပိုင်စီးထားနိုင်ပြီး မက်ဆီကလေးကြိမ်နှင့် ရော်နယ်ဒိုက ၃ ကြိမ် ရရှိထားသည်။ ထို့ပြင် ၎င်းတို့၏ ထူးခြားသော စွမ်းရည်များက မည်သူက ကမ္ဘာ့အကောင်းဆုံး ဘောလုံးသမား ဖြစ်သည်ဆိုသည့် ငြင်းခုံမှုများကို ဖြစ်စေခဲ့သည်။

ဘာစီလိုနာအသင်းတွင် ၆ နှစ်ကြာ ကစားခဲ့သော တိုက်စစ်မှူးဟောင်း ကလွိုက်ဗတ်ကမူ ယခုလက်ရှိတွင် ၎င်းတို့ ၂ ဦး၏ အရည်အသွေးအား မီသည့် ကစားသမားမှာ ဘိုင်ယန်မြူးနစ်အသင်းမှ ရော်ဘင်တစ်ဦးတည်းသာရှိသေးပြီး၊ မက်ဆီနှင့် ရော်နယ်ဒို တစ်ဦးဦး ယခုနှစ်နွေရာသီတွင် အသင်းပြောင်းသွားပါက ၎င်းတို့နှစ်ဦးကြား ပြိုင်ဆိုင်မှုမှာ လျော့နည်းသွားမည်ဟု သံသယရှိနေသည်။

“နှစ်ယောက်စလုံးဟာ အံ့သြလောက်တဲ့ ကစားသမားတွေပါ။ အရေးအကြီးဆုံးတစ်ခုက သူတို့နှစ်ယောက်စလုံး စပိန်မှာ ကစားနေလို့ ဖြစ်ပါတယ်။ တစ်ကယ်လို့ တစ်ယောက်က စပိန်မှာရှိပြီး နောက်တစ်ယောက်က အင်္ဂလန်မှာရှိမယ်ဆိုရင် သူတို့ရဲ့ ပြိုင်ဆိုင်မှုက ခြားနားသွားမှာပါ” ဟု ကလွိုက်ဗတ်က ဖီဖာ၏ ၀ဘ်ဆိုက်သို့ ပြောကြားခဲ့သည်။

ထို့ပြင် မက်ဆီနှင့် ရော်နယ်ဒို ၂ ဦးစလုံးမှာ ကမ္ဘာ့အကောင်းဆုံး ဘောလုံးသမားများ ဖြစ်ကြပြီး ၎င်းတို့နောက်တွင် ရော်ဘင်နှင့် အခြားကစားသမားများက လိုက်နေကြောင်း၊ မက်ဆီမှာ ထူးခြားသည့် ကစားသမားဖြစ်ကာ ၎င်း၏ ဘယ်ခြေမှာ ရွှေကဲ့သို့အဖိုးတန်ပြီး ထိသမျှအရာတိုင်းမှာ တန်ဖိုးရှိလာကြောင်း ကလွိုက်ဗတ်က ထည့်သွင်းပြောကြားခဲ့သည်။

Ref: Goal.com

Comments

Leave a Reply