News @ M-Media

# မင်းဘက်က အပျင်းပြေ၊ ငါတို့အတွက်တော့ ဘဝတွေ #

ဧပြီ ၂၇ ၊ ၂၀၁၅
M-Media
အိမ်ဝေးသူ(KZ) ရေးသည်။

11170344_662359473870209_4930574308894873819_n
မင်းရဲ့ကျောပေါ်မှာ ကစားနေတဲ့ ကလေးငယ်လေး
ခုတော့ မင်းရဲ့ဝမ်းဗိုက်ထဲ ရောက်သွားရှာပြီ။
x
မင်းရဲ့  ကျောပေါ်မှာ မေတ္တာပို့နေတဲ့ အမေအိုကြီး
ခုတော့ မင်းရဲ့ဝမ်းဗိုက်ထဲ ရောက်ခဲ့ရရှာပြီ။
x
မင်းရဲ့ ကျောပေါ်မှာ ဝန်ထမ်းထားတဲ့ ကိုယ်ဝန်သည်လေး
ခုတော့ မင်းရဲ့ဝမ်းဗိုက်ထဲ ရောက်ခဲ့ရရှာပြီ။
x
မင်းရဲ့ကျောပေါ်မှာ ဆောက်ထားတဲ့ မူလတန်းကျောင်းလေး
ခုတော့ မင်းရဲ့ဝမ်းဗိုက်ထဲ ရောက်ခဲ့ရရှာပြီ။
x
မင်းရဲ့ကျောပေါ်မှာ တည်ထားတဲ့ ဘုရားဆောင်လေး
ခုတော့ မင်းရဲ့ဝမ်းဗိုက်ထဲ ရောက်ခဲ့ရရှာပြီ။
x
မင်းရဲ့ကျောပေါ်မှာ ရုန်းကန်နေတဲ့ ပစ္စုပန်တွေ
မင်းရဲ့ကျောပေါ်မှာ ငဲ့ကြည့်နေတဲ့ အတိတ်တွေ
မင်းရဲ့ကျောပေါ်မှာ ပြေးလွှားနေတဲ့ အနာဂတ်တွေ
ခုတော့လည်း အရာအားလုံးက မင်းအလိုကျပေါ့ကွယ်။
x
မင်းရဲ့ ဆာလောင်မှုအတွက် ဘဝတွေရင်းရတယ်။
မင်းရဲ့ အကြောတဆန့်အတွက် အသက်တွေပေးရတယ်။
ခုတော့လည်း
မင်းရဲ့ ကျောပေါ်မှာ စိုက်ထားတဲ့
“ကမ္ဘာမြေစိမ်းလန်းပါစေ”ဆိုတဲ့ ဆိုင်းဘုတ်လေး ကွယ်လွန်ခဲ့ပြီ။
ငါတို့ဘဝတွေနဲ့ အနာဂတ်ကိုယ်စီလည်း တိမ်းပါးခဲ့ကြရပါပြီ။
x
ဟေ့-ကမ္ဘာမြေ !
ငါတို့ ဘဝတွေ…မယိမ်းယိုင်စေဖို့
ကျေးဇူးပြုပြီး
မင်းရဲ့ကျောပြင်ကို ဖြေးဖြေးဆန့်ပေးစမ်းပါကွယ့်။

——————-
အိမ်ဝေးသူ(KZ)
——————-
(မှတ်ချက်)
ကျွန်တော်တို့ လူသားတွေရဲ့ ကိုယ်ကျင့်တရားဟာ ကျွန်တော်တို့ ကမ္ဘာမြေရဲ့
စိမ်းလန်းခြင်း၊ ဆုတ်ယုတ်ခြင်းပါပဲ။ ကျွန်တော်တို့ရဲ့ ကိုယ်ကျင့်တရားတွေနဲ့အတူ
မြေကမ္ဘာမှာ ဖြေသာလောက်တဲ့ လေညှင်းလေးတွေ တိုက်ခတ်နိုင်ပါစေလို့ ဆုမွန်
တောင်းခဲ့ပါတယ်။
x
(စာကြွင်း)
အစိုးရနဲ့ ပြည်သူ၊ တွဲလက်တွေတူညီလို့ အခက်အခဲတွေကို ဖြေရှင်းနိုင်ကြပါစေ။
နီပါလ်နိုင်ငံသားတွေရဲ့ ဘေးအန္တရာယ်အတွက် ကျွန်တော် ဝမ်းနည်းမိတာတော့
အမှန်ပါပဲ။ ဒါပေမယ့် အဲ့ဒီ့ငလျင်ဟာ ကျွန်တော်တို့တိုင်းပြည်မှာ မဖြစ်သွားတဲ့အတွက်
ဝမ်းသာမိတာလည်း အမှန်ပါပဲ။ ဘေးအန္တရာယ်တစ်ခုခုကျရင် ထိထိရောက်ရောက်
မလုပ်တဲ့ အစိုးရ၊ ပြည်ပအကူအညီရရင်လည်း ရတာကို အိတ်ထဲထည့်တတ်တဲ့
အစိုးရ။ ဒီအချက်တွေကို သတိထားမိရုံနဲ့ သူများနိုင်ငံမှာတော့ ငါတို့ နိုင်ငံထက်
ပိုပြီးမဆိုးလောက်ပါဘူးလေ ဆိုတဲ့အသိနဲ့ ဒီအဖြစ်အပျက်ကြီးက မြန်မာပြည်မှာ
ဖြစ်မသွားတာကိုပဲ ကျွန်တ်ာဝမ်းသာမိပါတယ်။

Comments

Leave a Reply