News @ M-Media

တောင်ကိုရီးယားတွင် မားစ်ရောဂါကြောင့် သေဆုံးသူ ၃၂ ဦးရှိပြီ

ဇွန် ၂၈၊ ၂၀၁၅
M-Media

mars

– မားစ်ရောဂါကြောင့် ယမန်နေ့က လူတစ်ဦး သေဆုံးခဲ့သည်ဟု တောင်ကိုရီးယား ကျန်းမာရေး ၀န်ကြီးဌာနက ယနေ့နံနက်တွင် ကြေညာခဲ့ပြီး မားစ်ရောဂါကြောင့် သေဆုံးသူ စုစုပေါင်းမှာ ၃၂ ဦးအထိ ရှိလာပြီဖြစ်သည်။

အသက် ၅၅ နှစ်အရွယ် အမျိုးသားဖြစ်ပြီး ဇွန်လ ၉ ရက်နေ့က ရောဂါကူးစက်ခဲ့ခြင်းဖြစ်ကာ မြို့တော်ဆိုးလ်ရှိ ဆမ်ဆောင်းဆေးရုံတွင် ဆေးကုသမှုခံနေစဉ် သေဆုံးခဲ့ခြင်းဖြစ်သည်။ အဆိုပါ ဆမ်ဆောင်းဆေးရုံတွင် မားစ်ရောဂါ ကူးစက်သူ အရေအတွက်မှာ ၉၀ ဦးခန့် ရှိပြီး ဆေးရုံဝန်ထမ်းများနှင့် လူနာလာကြည့်သူများ ဖြစ်သည်။

ယခုသေဆုံးမှုကြောင့် ကူးစက်သူများအကြား သေဆုံးမှုနှုန်းမှာ ၁၇.၅ ရာခိုင်နှုန်းသို့ ရောက်လာခဲ့ပြီး ပြီးခဲ့သည့်တစ်ပတ်က ၁၅ ရာခိုင်နှုန်း ရှိခဲ့ကာ နှစ်ပတ်အရင်က ၁၀ ရာခိုင်နှုန်းသာ ရှိခဲ့သည်။ သို့သော်လည်း ကူးစက်မှုနှုန်းမှာ နောက်ပိုင်းတွင် ကျလာခဲ့သည်။

လက်ရှိအချိန်တွင် မားစ်ရောဂါကူးစက်သူအရေအတွက်မှာ ၁၈၂ ဦး ရှိပြီး ၁၅ ဦးမှာ စိုးရိမ်စရာကောင်းသည့် အနေအထားတွင် ရှိနေသည်။

ရောဂါကူးစက်ပြီးနောက် သက်သာ၍ ဆေးရုံမှ ပြန်လည်ဆင်းသွားရသူများမှာ စုစုပေါင်း ၉၁ ဦး ရှိနေပြီး ယနေ့အထိ ရောဂါကူးစက်နိုင်မှု သံသယဖြင့် စောင့်ကြည့်နေသူအရေအတွက်မှာ ၂၅၆၂ ဦး ရှိနေသည်။

တောင်ကိုရီးယားနိုင်ငံတွင် မားစ်ရောဂါကူးစက်မှုကို မေလ ၂၀ ရက်နေ့က ဆော်ဒီအာရေဗျနိုင်ငံမှ ပြန်လာသော အမျိုးသမီးတစ်ဦး၌ စတင်တွေ့ရှိခဲ့ခြင်းဖြစ်ပြီး ထိုနောက် အလျင်အမြန် ပြန့်နှံ့ ကူးစက်လာခဲ့ခြင်းဖြစ်သည်။

Ref: PressTV

Comments

Leave a Reply