ဇွန် ၂၉၊ ၂၀၁၅
M-Media
– ခါးသီးသောပြိုင်ဘက် ရီးယဲလ်မက်ဒရစ်ထက် အရှေ့ရောက်ချင်ပါက မိမိတို့အသင်းအနေဖြင့် အပြောင်းအရွှေ့ဈေးကွက်တွင် ရင်းနှီးမြှုပ်နှံမှု မဖြစ်မနေလုပ်ရမည်ဟု ဘာစီလိုနာအသင်းဥက္ကဌ ဂျိုးဆက်ပ် ဘာတိုမြူက ပြောကြားလိုက်သည်။
၂၀၁၄-၁၅ ဘောလုံးရာသီတွင် ဘာစီလိုနာမှာ လာလီဂါ၊ စပိန်ရှုံးထွက်ဖလားနှင့် ချန်ပီယံလိဂ်ဖလား ၃ လုံး ရရှိခဲ့သည်။ ယခုလက်ရှိအချိန်တွင် ဘာစီလိုနာခေါ်ယူထားသည့် ကစားသမားမှာ ဆီးဗီးလားအသင်းမှ အလီဇစ်ဗီဒဲလ်တစ်ဦးတည်းသာ ရှိသေးပြီး ၎င်းမှာလည်း ဘာစီလိုနာအသင်း အပြောင်းအရွှေ့ ပိတ်ပင်ထားမှု အဆုံးသတ်သည့် ဇန်န၀ါရီလတွင်မှ ကစားနိုင်မည်ဖြစ်သည်။
“ကျွန်တော်တို့ အရှိန်လျှော့လို့မရပါဘူး။ ဒါမျိုးလုပ်ရင် ရီးယဲလ်လို ပြိုင်ဘက်တွေက အခွင့်အရေး ယူသွားမှာပါ။ အပြောင်းအရွှေ့ဈေးကွက်မှာ သူတို့ဟာ တက်တက်ကြွကြွ အရောင်းအ၀ယ်တွေ လုပ်နေပါတယ်။ အမှုဆောင်ဘုတ်အဖွဲ့ကလည်း အသင်းအတွက် အကျိုးရှိမယ့်ကိစ္စတွေ လုပ်ပေးရပါမယ်။ လာမယ့်ရာသီမှာ အသင်းကို ပိုပြီး ယှဉ်ပြိုင်လိုစိတ်ရှိဖို့ ဘာစီလိုနာက မနားမနေ ကြိုးစားရပါမယ်” ဟု ဘာတိုမြူက ပရိတ်သတ်များအား ပြောကြားခဲ့သည်။
ဘာစီလိုနာတွင် ဇူလိုင်လ ၁၇ ရက်နေ့၌ ဥက္ကဌရွေးကောက်ပွဲရှိနေပြီး ဘာတိုမြူမှာ ဥက္ကဌဟောင်းလာပေါ်တာနှင့် ရင်ဆိုင်ယှဉ်ပြိုင်နေရကာ ဒေသတွင်း မီဒီယာများကမူ ဘာတိုမြူသာ အသာရလိမ့်မည်ဟု ခန့်မှန်းထားကြသည်။
ထိပ်တန်းကစားသမားများကို ခေါ်ယူမည်ဆိုခြင်းက ဥက္ကဌဖြစ်ရေးမဲဆွယ်ပွဲတွင် အဓိက လက်နက်တစ်ခုဖြစ်ပြီး လာပေါ်တာကမူ ဂျူဗင်တပ်စ်အသင်း၏ ပြင်သစ်တိုက်စစ်မှူး ပေါ့ဘာကို ခေါ်ယူရန် ရည်ရွယ်ထားသည်ဟု ထုတ်ဖော်ပြောဆိုခဲ့သည်။ ဘာတိုမြူမှာ ၂၀၁၃ ခုနှစ် နေးမာ၏ အပြောင်းအရွှေ့တွင် အခွန်တိမ်းရှောင်မှုအတွက် တရားစွဲဆိုခြင်း ခံထားရသူဖြစ်သည်။
Ref: Goal
Leave a Reply
You must be logged in to post a comment.