ဒီဇင်ဘာ ၂၊ ၂၀၁၅
M-Media
– သြစတြေးလျတွင် ပြုလုပ်ခဲ့သော လေ့လာမှုတစ်ရပ်တွင် သကြားလွတ်ဖျော်ရည်များနှင့် မုန့်အချိုများသည် လူများယုံကြည်နေသကဲ့သို့ သွားပိုးစားမှုအန္တရာယ် လျော့ကျစေနိုင်သည်မဟုတ်ဘဲ သကြားပါဝင်သောပစ္စည်းများနည်းတူ သွားပိုးစားခြင်း ဖြစ်ပေါ်စေနိုင်သည်ကို တွေ့ရှိခဲ့ရသည်။
သွားပိုးစားခြင်းဆိုသည်မှာ သွားအပေါ်ယံကြွေလွှာမှစတင်၍ သွား၏ တစ်သျှူးအမာများအား အက်ဆစ်စားသွားခြင်းကို ခေါ်သည်။ ပါးစပ်အတွင်းရှိ ဘက်တီးရီးယားများက သကြား သို့မဟုတ် ကာဘိုဟိုက်ဒရိတ်များကို စားသုံးလိုက်ပြီး အက်ဆစ်များထုတ်ပေးသည်။ ထိုကြောင့် သကြားပါဝင်မှုနည်းသော အစားအသောက်များကို စားသုံးခြင်းဖြင့် အက်ဆစ်ထုတ်လုပ်မှု နည်းပါးသွားစေကြောင်း ယုံကြည်စေသည်။
မဲလ်ဘုန်းတက္ကသိုလ်၏ လေ့လာမှုအသစ်တစ်ရပ်တွင် သကြားပါသော ဖျော်ရည်များနှင့် သကြားမပါဝင်သော ဖျော်ရည်များကို နှိုင်းယှဉ်ကြည့်သည့်အခါ သွားပိုးစားစေနိုင်သော ပမာဏသည် သိသိသာသာ ကွာခြားခြင်းမျိုး မရှိသည်ကို တွေ့ရသည်။
“သကြားလျှော့စားရင် သွားပိုးစားနိုင်တဲ့ အန္တရာယ်နည်းတယ်လို့ လူတွေကထင်နေကြတယ်၊ တကယ်တော့ တချို့အစားအစာတွေမှာ ပါတဲ့ ဓာတုပစ္စည်းတွေ ရောသွားပြီး အက်ဆစ်ဖြစ်လို့ သွားကို တစ်ဖြည်းဖြည်း တိုက်စားသွားတာမျိုး ဖြစ်ပါတယ်”ဟု မဲလ်ဘုန်းတက္ကသိုလ်ပါမောက္ခဖြစ်ပြီး ခံတွင်းကျန်းမာရေး ပူးပေါင်းဆောင်ရွက်မှု သုတေသနအဖွဲ့ ဥက္ကဌ ဖြစ်သူ ဒေါက်တာအဲရစ် ရိန်းနိုးက ပြောကြားခဲ့သည်။
သုတေသီများက သွား၏ကြွေလွှာတွင် ပြောင်းလဲမှုများကို စောင့်ကြည့်ရန် Knoop ဟု ခေါ်သော အနုကြည့်မှန်ဘီလူးဖြင့် လူ့အံသွား အခု ၇၀ နှင့် ဖျော်ရည် ၂၃ မျိုးကို စမ်းသပ်ခဲ့ကြသည်။
အားလုံးစမ်းသပ်ပြီးသည့်နောက်တွင် သကြားပါသောဖျော်ရည်နှင့် မပါသောဖျော်ရည်များက သွားများ ပျက်စီးစေမှုတွင် ခြားနားမှု သိပ်မရှိဘဲ ရေနှင့် နို့ပါသော ဖျော်ရည်များက သွားကြွေလွှာပေါ်တွင် အန္တရာယ်ဖြစ်နိုင်ခြေမှာ အလွန်နည်းသည်ကို တွေ့ခဲ့ရသည်။
ဖျော်ရည်များကို အုပ်စုနှစ်ခုခွဲ၍ စမ်းသပ်ခဲ့သည်။ ပထမအုပ်စုတွင် သြစတြေးလျ ကျောင်းများ၌ အလွယ်တကူ ၀ယ်ယူနိုင်သော ဖျော်ရည် ၁၅ မျိုးကို နှိုင်းယှဉ်ပြသည်။ ကျောင်းဝင်းအတွင်း ရောင်းချသော ဖျော်ရည်များအနက် သကြားပါပါ၊ မပါပါ (နို့ပါသောဖျော်ရည်မှလွဲ၍) အားလုံးသည် သွားပိုးစားစေနိုင်ကြောင်း တွေ့ရှိခဲ့ရသည်။ ကိုကာကိုလာသည် အဓိကသွားပိုးစေနိုင်ပြီး ရေမှာ သွားပိုးစားခြင်းမရှိပေ။
သုတေသီများသည် သကြားလွတ်ကိတ်မုန့်နှင့် မုန့်အချိုများကိုလည်း စမ်းသပ်ခဲ့ပြီး ထိုစားသောက်ကုန်များ ၃၂ ခုမှ ၂၀ လောက်မှာ အထက်တွင် ဖော်ပြခဲ့သော သကြားလွတ်ဖျော်ရည်များကဲ့သို့ပင် အက်ဆစ်ပါဝင်မှု တူညီကြောင်း တွေ့ရှိခဲ့သည်။
လေ့လာမှုတွင် သစ်သီးအရသာပါသော ကိတ်များ၊ အထူးသဖြင့် သံပုရာအရသာရှိသော ကိတ်များသည် အလွန်ပင်အန္တရာယ်ရှိကြောင်း တွေ့ခဲ့ရသည်။ သုတေသီများက အက်ဆစ်ဓာတ်များသော ဖျော်ရည်များထက် ရေကိုသာ သောက်သုံးသင့်ပြီး စစ်ထရစ်အက်ဆစ်နှင့် ဖော့စ်ဖော့ရပ်စ် အက်ဆစ်ကဲ့သို့သော ပါဝင်ပစ္စည်းများကို အထူးဂရုပြု၍ ရှောင်ကျဉ်ခြင်းသည် သွားများမပျက်စီးစေရန် အကောင်းဆုံးနည်းလမ်းဖြစ်ကြောင်း နိဂုံးချုပ် ပြောကြားခဲ့သည်။
Ref: INNA News
Leave a Reply
You must be logged in to post a comment.