ဇန်န၀ါရီ ၃၊ ၂၀၁၅
M-Media
– မက္ကဆီကိုရှိ မြို့တော်ဝန်အမျိုးသမီးတစ်ဦးမှာ တာဝန်ထမ်းဆောင်ပြီး တစ်ရက်မပြည့်ခင်မှာပင် သေနတ်ဖြင့် ပစ်သတ်ခြင်း ခံခဲ့ရသည်ဟု အာဏာပိုင်များက ပြောကြားလိုက်သည်။
ဂီဆီလာ မိုတာဆိုသူ ဖြစ်ပြီး ယမန်နေ့က မိုရီလို့စ်ပြည်နယ် တီမက်စ်ကိုမြို့ရှိ ၎င်း၏ နေအိမ်တွင် သေနတ်သမားများ၏ သေနတ်ဖြင့် ပစ်သတ်မှုကို ခံခဲ့ရခြင်းဖြစ်သည်။ ရဲတပ်ဖွဲ့၏ လိုက်လံဖမ်းဆီးမှုအတွင်း သေနတ်သမား ၂ ဦးမှာ သေဆုံးခဲ့ပြီး အခြား ၃ ဦးကိုမူ ဖမ်းဆီးထိန်းသိမ်းနိုင်ခဲ့သည်ဟု ပြည်နယ်အစိုးရက ပြောကြားခဲ့သည်။
ပြည်နယ်အုပ်ချုပ်ရေးမှူး ဂါကို ရာမီရက်ဇ်က မိုတာ သတ်ဖြတ်ခံရမှုကို စနစ်တကျ စီစဉ်သည့် ရာဇ၀တ်မှုဟု ၎င်း၏ Twitter စာမျက်နှာတွင် ပြောကြားခဲ့သည်။ သို့သော်လည်း မည်သည့် မူးယစ်ဂိုဏ်း၊ မူးယစ်ရာဇာ၏ အမည်ကိုမှ ဖော်ပြခဲ့ခြင်းမရှိပေ။
မက္ကဆီကိုတွင် မူးယစ်ဂိုဏ်းများက မြို့များကို ထိန်းချုပ်ရန် ကြိုးပမ်းမှုများ ရှိနေပြီး ထိုကြိုးပမ်းမှုများကြောင့် ဒေသတွင်း တာဝန်ရှိသူများမှာ ပစ်မှတ်ထားတိုက်ခိုက်မှုများကို ခံရလေ့ရှိသည်။
မိုတာ၏ လက်ဝဲယိမ်း Democratic Revolution ပါတီကမူ ထိုအသတ်ခံရမှုအတွက် ကြေငြာချက်တစ်စောင်ကို ထုတ်ပြန်ခဲ့ပြီး မိုတာအား စိတ်ဓာတ်ခိုင်မာကာ သတ္တိရှိသည့် အမျိုးသမီးဖြစ်သည်ဟု ချီးကျူးခဲ့သည်။ ထို့ပြင် မြို့အတွင်း ဒုစရိုက်မှုများကို အမြစ်ဖြတ်ရန် သူမ၏ ကြိုးစားမှုများကိုလည်း အဆုံးအထိ အကောင်အထည်ဖော်သွားမည်ဟု ထည့်သွင်း ပြောကြားခဲ့သည်။
Ref: Aljazeera
Leave a Reply
You must be logged in to post a comment.