ဖားကန့်တွင် မြေစာပုံ ထပ်မံပြိုကျမှုကြောင့် လူ ၄၀ ပျောက်ဆုံး

ဇန်န၀ါရီ ၁၄၊ ၂၀၁၆
M-Media

– ကမ္ဘာ့အဆင့်မီ ကျောက်စိမ်းများထွက်ရှိရာ ဖားကန့်တွင် အင်္ဂါနေ့ညပိုင်းက မြေစာပုံပြိုကျမှု ထပ်မံဖြစ်ပွားခဲ့ပြီး အနည်းဆုံး လူ ၄၀ ပျောက်ဆုံးနေသည်ဟု သိရသည်။

ဒေသစံတော်ချိန် ည ၁၀ နာရီခွဲခန့်တွင် ဖြစ်ပွားခဲ့ခြင်းဖြစ်ပြီး နိုဝင်ဘာလက မြေစာပုံပြိုကျမှုကြောင့် လူ ၁၀၀ ကျော် သေဆုံးခဲ့သည့် နေရာနှင့် မနီးမဝေးတွင် ဖြစ်ပွားခဲ့ခြင်းဖြစ်သည်။

“၄၀ လောက်ပျောက်ဆုံးတယ်လို့ ကျွန်မကြားပါတယ်။ ဒါပေမယ့် ပျောက်ဆုံးနေသူတွေထဲက ၃ ဦးရဲ့ အမည်တွေကိုသာ ကျွန်မတို့ ရရှိပါသေးတယ်။ ထိခိုက်သူတွေကို ကူညီဖို့ ကျွန်မတို့သွားပေမယ့် နောက်ထပ် မြေစာပုံပြိုကျမယ့် အန္တရာယ်ကြောင့် သိပ်များများစားစား မလုပ်နိုင်ပါဘူး” ဟု ကချင် အမျိုးသားလူမှုဖွံ့ဖြိုးရေး ဖောင်ဒေးရှင်းမှ အတွင်းရေးမှူးဖြစ်သူ နော်လောက ပြောကြားခဲ့သည်။

နိုဝင်ဘာလအတွင်းက ပေ ၂၀၀ ခန့်ရှိသည့် မြေစာပုံပြိုကျမှုကြောင့် လူ ၁၀၀ ကျော်သေဆုံးခဲ့ပြီး ပြီးခဲ့သည့်လကလည်း ထပ်မံပြိုကျမှုကြောင့် လူအချို့သေဆုံးခဲ့သည်။ အစိုးရကမူ ထိုဒေသအန္တရာယ်ကင်းရှင်းရေးအတွက် ယခုအချိန်အထိ မည်သည့်ဆောင်ရွက်မှုမှ ပြုလုပ်ခြင်း မရှိသေးပေ။

Ref: RFA