သြဂုတ် ၂၄၊ ၂၀၁၂၊
YPI မှကူးယူဖော်ပြသည်။
လူထု မငြိမ်မသက် ဖြစ်အောင် လှုံ့ဆော်စာရွက်များ ဖြန့်ဝေသည်ဆိုသည့် စွပ်စွဲချက်ဖြင့် ဖမ်းဆီးခံထားရသူ သံတွဲမြို့နယ်မှ လူငယ်လေးဦး၏ အမှုရုံးချိန်းတွင် သံတွဲမြို့နယ် တရားရုံး အနီးတ၀ိုက် ရဲနှင့် စစ်တပ်များဖြင့် လုံခြုံရေး တင်းကြပ်စွာ ချထားသည်ကို မြင်တွေ့ရသည်။
“အရင်ရုံးချိန်းတွေမှာ ဒီလိုစောင့်တာမရှိဘူး။ အခုက ရွာတစ်ချို့ကလာပြီး ဆန္ဒပြမယ်လို့ သတင်းတွေ ထွက်နေတာကြောင့်ဖြစ်နိုင်တယ် ”ဟု သံတွဲ ဒေသခံတစ်ဦးက YPI သို့ ပြောသည်။
ယနေ့ ရုံးချိန်းသို့ သံတွဲမြို့နယ်ရှိ ဂျိတ္တောနှင့် အံတော်ကျေးရွာမှ ဒေသခံများ လာရောက်ကြမည်ဟု သတင်းများ ယခင်ရက်ပိုင်းက ထွက်ပေါ်ခဲ့သော်လည်း လာရောက်ခြင်း မရှိသည်ကို တွေ့ရသည်။
ဂျိတ္တော ဒေသခံခဦးက ပြောရာတွင် “ဂျိတ္တောကလာဖို့ မရှိပါဘူး။ တစ်နေ့က ပြည်နယ်လွှတ်တော်အမတ် ဦးအောင်နိုင်ဦးက ဂျိတ္တော ရပ်မိရပ်ဖ တစ်ယောက်ကိုခေါ်ပြီး လူစုလူဝေးနဲ့မလာဖို့ပြောတယ်။ ကလေးတွေ ထောင်မကျအောင် လည်း ကူညီမယ်လို့ပြောပါတယ်”ဟု ပြောသည်။
အဆိုပါလူငယ်လေးဦးမှာ ဇွန်နောက်ဆုံးပတ်က သံတွဲမြို့တောင်ဘက်ကျေးရွာများသို့ လှုံ့ဆော်စာ များသွားရောက်ဖြန့်ဝေခဲ့သဖြင့် ၎င်းလှုံ့ဆော်စာရရှိသူ အချို့က သံတွဲရဲစခန်းသို့ တိုင်ကြားရာမှ ဖမ်းဆီး ခဲ့ခြင်းဖြစ်သည်။
“စာတွေက အမျိုးမျိုးပါပဲ။ အဓိက ကတော့ မွတ်စလင်တွေကို ရည်ညွှန်းထား တာပါ။ မြို့ပေါ်မှာလည်း အများကြီး ပျံ့နေပါတယ်”ဟု သံတွဲဒေသခံတစ်ဦးက ပြောသည်။
အမှတ် ၄ ရပ်ကွက်မှ သံတွဲဒေသခံတစ်ဦးက “အဲဒီလေးယောက်အထဲမှာ သံတွဲရဲစခန်းက ရဲတစ်ယောက်ရဲ့ သားလည်း ပါတယ်။ နောက် GTI ကျောင်းသား တစ်ယောက်လည်းပါတယ်” ဟုပြောသည်။
သံတွဲမှ ရှေ့နေတစ်ဦးက ပြောဆိုရာတွင် GTI ကျောင်းသားဖြစ်သူကို စာမေးပွဲ ရှိနေသဖြင့် အာမခံပေးထားကြောင်းနှင့် လက်ရှိ ၅၀၅ (ခ) (နိုင်ငံတော် အစိုးရကိုဖြစ်စေ ငြိမ်ဝပ်ပိပြားရေးကို ဖြစ်စေ ထိခိုက်သည့် ပြစ်မှုကို တဦးတယောက်သောသူ ကျူးလွန်ချင်လာအောင် လုပ်ဆောင်မှု) ကို အာမခံ ပေး၍ မရသော်လည်း တရားသူကြီး၏ လုပ်ပိုင်ခွင့်အာဏာဖြင့်ပေးထားခြင်း ဖြစ်သည်ဟု ဆိုသည်။
၎င်းတို့လေးဦးအား ဇွန်လကုန်တွင် စတင်ဖမ်းဆီးကာ တညခန့်စစ်ဆေးပြီး ပြန်လွှတ်ပေးကာ ဇူလိုင်လ ၁၂ ရက်တွင်မှ ပြန်လည် ဖမ်းဆီးခဲ့ခြင်းဖြစ်သည်။ဇွန်လဆန်းတွင် ရခိုင်ပြည်နယ်ရှိ မောင်တော၊ ဘူးသီးတောင်၊ တောင်ကုတ်နှင့် စစ်တွေမြို့များတွင် ဖြစ်ပွားခဲ့သည့် အကြမ်းဖက်မှုများကြောင့် သံတွဲအပါအ၀င် မြို့နယ်အချို့၌ ပုဒ်မ ၁၄၄ အရ ညမထွက်ရ အမိန့် ထုတ်ပြန်ထားရာ ယခုအချိန်ထိ မရုပ်သိမ်းနိုင်သေးပေ။ ။
Leave a Reply
You must be logged in to post a comment.