News @ M-Media

တိုင်းပြည်ကို သစ္စာဖောက်ပြီး ရောင်းစားခဲ့တဲ့ မြန်မာမွတ်စလင်မ် တစ်ယောက်မှ မရှိခဲ့ဘူးလို့ ကိုမြအေးပြော

ဖေဖော်ဝါရီ ၁၄၊ ၂၀၁၆
M-Media
သတင်း/ဓါတ်ပုံ- မိုးစက်

Ko Mya Aye

ရန်ကုန်။    ။ တိုင်းပြည်ကို သစ္စာဖောက်ပြီး အခြားနိုင်ငံကို ရောင်းစားခဲ့တဲ့ မြန်မာပြည်က အစ္စလာမ်ဘာသာဝင် တစ်ယောက်မှ မရှိပါဘူးလို့ ၈၈ မျိုးဆက် ( ငြိမ်းချမ်းရေးနှင့် ပွင့်လင်းလူ့အဖွဲ့အစည်း ) မှ ခေါင်းဆောင် တစ်ဦးဖြစ်သူ ကိုမြအေးက ဆိုလိုက်ပါတယ်။

ဖေဖော်ဝါရီလ ၁၄ ရက်နေ့ က ရန်ကုန်မြို့ သိမ်ဖြူလမ်းရှိ ဒေါ်စောရွှေခန်းမတွင် ကျင်းပပြုလုပ်သည့်  ပြည်ထောင်စု သမ္မတ မြန်မာနိုင်ငံတော် မြန်မာနိုင်ငံလုံး ဆိုင်ရာ မြန်မာမွတ်စလင်မ်လူငယ်များ (ဘာသာရေး) အဖွဲ့မှ ကျင်းပသော (၁၄၉၀) ကြိမ်မြောက် မဟာတမန်တော်နေ့ အခမ်းအနားတွင် ကိုမြအေး ယခုလို ပြောကြား ခဲ့ခြင်းဖြစ်ပါတယ်။

မြန်မာနိုင်ငံက အစ္စလာမ်ဘာသာဝင်တွေ အနေနှင့် သမိုင်းခေတ်အဆက်ဆက်က ယဉ်ကျေးမှုမတူ၊ ဘာသာမတူတဲ့ ညီအစ်ကိုတွေနှင့် အတူ တိုင်းပြည်မှာ ကျရာတာဝန်ကိုထမ်းဆောင်ခဲ့တာ ဖြစ်ပြီးတော့  အစ္စလာမ်သာသနာက လူသားတစ်ယောက် ဒုက္ခရောက်နေရင် ကယ်တင်ရမယ်၊ မေတ္တာထား ဆက်ဆံရမယ်၊ ကိုယ့်ရဲ့အိမ်နီးချင်းကိုတောင်မှ အိမ်နီးချင်းပီသစွာ မဆက်ဆံနိုင်ရင် သင်ဟာ အစ္စလာမ် မဟုတ်ဘူးလို့ ပြောထားတဲ့ ဘာသာရေးဖြစ်ပါတယ် လို့ ရှင်းလင်းပြောဆိုခဲ့ပါတယ်။

ဆက်လက်ပြီး တမန်တော်မြတ် (ဆွ) နှင့် ပတ်သက်ပြီး “ကျွန်တော်တို့ကိုယ်တော်မြတ်ကို ဖဘပေါ်မှာ ပြောနေတာတွေကို ကျွန်တော်လုံးဝ ဝမ်းမနည်းပါဘူး။ ဘာဖြစ်လို့လဲဆိုတော့ ကိုယ်တော်မြတ်က အင်မတန် ကြီးမြတ်တဲ့ ပုဂ္ဂိုလ်ဖြစ်တဲ့အတွက် ဘယ်သူက သိက္ခာချချ ဘာမှဖြစ်မှာမဟုတ်ပါဘူး။ ကမ္ဘာက အသိမှတ်ပြုခံထားရတဲ့ လူတစ်ဦးလည်းဖြစ်တယ်။ လမ်းဘေးက ကလေကချေတွေ  ၁၅၀၀ တန်ဖုန်းနဲ့ဝယ်ပြီး ရေးချင်တာရေးနေကြတာတွေကို လုံးဝဂရုစိုက်စရာကို မလိုပါဘူး။ သူတို့ရေးသလို ကျွန်တော်တို့တွေ ပြန် မရေးကြဖို့လည်း ကျွန်တော်ပြောချင်ပါတယ်” လို့ ထပ်လောင်းပြောကြားခဲ့ပါတယ်။

မြန်မာမွတ်စလင်မ်လူငယ်များ (ဘာသာရေး) အဖွဲ့မှ ဥက္ကဌဖြစ်သူ အလ်ဟဂ်ျ ဦးမြင့်ထွန်းကလည်း အခုလို တမန်တော်မြတ်မွေးနေ့ကို နိုင်ငံအသီးသီးမှာ ကျင်းပနေခြင်းဟာ အစဉ်လာကောင်းဖြစ်ပြီး တမန်တော်မြတ်လမ်းစဉ်အတိုင်း ကျင့်သုံးလိုက်နာ နေထိုင်သင့်ကြောင်း ပြောဆိုခဲ့ပါတယ်။

Si Thu Maung

“တိုင်းပြည်ရဲ့ အချိုးအကွေ့တိုင်းမှာ အစ္စလာမ်ဘာသာဝင်တွေ နောက်မှာ မနေခဲ့ပါဘူး။ ခေတ်အဆက်ဆက် ထမ်းဆောင်ခဲ့တဲ့ တိုင်းပြည်အရေးတွေကိုလည်း ဆက်လက် ထမ်းပိုးချင်ပါတယ်။ အစ္စလာမ်ဘာသာဝင်တွေအနေနဲ့လည်း ကိုယ်တော်မြတ်ရဲ့ လမ်းစဉ်တွေကို ဖဝါးခြေထပ်လိုက်နာပြီး နေထိုင်သွားကြဖို့ လိုအပ်ပါတယ်” လို့ ပြောဆိုခဲ့သူကတော့ ၂၀၀၇ ရွှေဝါရောင်တော်လှန်ရေး ကျောင်းသားခေါင်းဆောင်တစ်ဦးဖြစ်ခဲ့သူ  ကိုစည်သူမောင်ဖြစ်ပါတယ်။

အဆိုပါ  (၁၄၉၀) ကြိမ်မြောက် မဟာတမန်တော်နေ့ အခမ်းအနားတွင် ကဆွီဒါများ ရွတ်ဖတ်ခြင်း၊ တရားရေအေးများ တိုက်ကျွေးခြင်းနှင့် တမန်တော် မုဟမ္မဒ်(ဆွ) ကို စုပေါင်းမေတ္တာပို့သခြင်းများကို ပြုလုပ်ခဲ့ကြပါတယ်။

Prophet day by Ma Ma La

Comments

Leave a Reply