သြဂုတ်၊ ၂၇ ၊၂၀၁၂
M-Media
ရခိုင်ပြည်နယ်မှာ လူမျိုးတုန်း သတ်ဖြတ်မှု မရှိနေ (သေး) ပါ။ ဒါပေမယ့် လူမျိုးတုန်းသေစေမှုကို တွန်းပို့နေတဲ့ အနေအထားတွေ တွေ့ရပါတယ်။ ဥပမာ… သူတို့တွေ ဘာမှ ဝယ်လို့မရ ဘယ်မှ သွားလို့မရ တစ်သက်တာ ၂၄နာရီ မာရှယ်လော ရှိနေတာပါ။ နောက်တစ်ချက်က ဒီအတိုင်းသွားရင် သူတို့တွေဟာ ဒုက္ခသည် စခန်းမှာ ပိတ်မိနေပြီး များမကြာမီ သူတို့ဟာသူတို့ သေကုန်ကြနိုင်ပါတယ်။ ဝမ်းရောဂါကပ်၊ ငှက်ဖျား၊ သွေးလွန်တုပ်ကွေးရောဂါတွေ အတော်ကို ပြန့်နေပါတယ်။ မျက်စိရှေ့တင် အပြင်းအထန် ကယ်ဖို့ ကြိုးစားရင်း ကွယ်လွန်ကုန်သူတွေ ရှိပါတယ်။
အိမ်သာ မရှိပါ။ သောက်ရေ၊ သုံးရေသန့် မရှိပါ။ ရေကန်အနီးမှာ မစင်ပုံတွေ ခြေချစရာ မရှိအောင်တွေ့နေရပါတယ်။ ဆေးဝါး မရှိပါ။ တီဘီရောဂါသည် နဂိုက ဆေးသောက်အသက်ရှင်နေရသူတွေ ကြားထဲမှာ ဆေးမရလို့ ပိုးက ဆေးယဉ်သွားပါပြီ။
ခြင်ထောင်မရှိပါ။ မိုးက မရပ်မနား ရွာနေတာတောင် ခြင်က အံ့သြလောက်စရာ အဆုပ်လိုက်အဆုပ်လိုက် ပက်ပါတယ်။
အာဟာရပြတ်တဲ့ ကလေးလူကြီးတွေ မရေတွက်နိုင်အောင် ရှိနေပါတယ်။ (ဓာတ်ပုံများပြပါတယ်။) ဗိုက်ပူနံကား ကလေးတွေပါ။ အသားခြောက်နဲ့ငါး စားရပေမယ့် မြက်ကလွဲလို့ ဘာ ဟင်းသီးဟင်းရွက်မှ မရှိပါ။ မြက်ပဲ ဝါးစားနေရသူတွေ၊ ဘာမှကို စားစရာ မရှိလို့ အမေက ဆံပင်ဖြတ်ကျွေးတာကို စားခဲ့ကြရတဲ့ သားသမီးတွေ တွေ့ခဲ့ရပါတယ်။
ဆေးကုဖို့ ဆေးခန်းကို လာကြစဉ် အတင်း တိုးဝှေ့ နေကြတော့ နယ်ခံ ခေါင်းဆောင်က ကူထိမ်းပေးပါတယ်။ အနားတိုးလာသူ မှန်သမျှကို ဂျပန် ပါးရိုက်သလို ရိုက်၊ ကြိမ်နဲ့ ရိုက်ပြီး နောက်ပြန်ဆုတ်ခိုင်းရပါတယ်။ အရိုက်ခံရတာကို (ရုပ်ပိုင်းဆိုင်ရာရော၊ စိတ်ပိုင်းဆိုင်ရာပါ) နာကြပုံ မပြပါ။ နွားများကဲ့သို့ သနားဖွယ် ပြုသမျှ ခံနေရပါတယ်။ အကြောက်လွန်ပြီး စိတ်ပုံမှန်မဟုတ်တဲ့ စိတ်ကျရောဂါမျိုး အများစုမှာ စွဲကပ်ကုန်ပါပြီ။
အများစုက ဘာစာကိုမျှ ရေးတတ် ဖတ်တတ် မရှိကြပါ။
အလှူပေးပို့လိုက်တဲ့ သိန်းထောင်ဂဏန်းဟာ တစ်ဦးစီအတွက် ဆန် နို့ဆီဘူး ခြောက်လုံးစာ၊ တစ်ဦးကို ပိုက်ဆံ ထောင်ဂဏန်း နည်းနည်းလေးပဲ ရခဲ့တာပါ။ နိုင်ငံတကာ အကူအညီတွေ လက်ဝယ် မရကြသေးခင်အထိ သူတို့ ဘယ်လို နှစ်ပါးသွားကြရမယ် မသိပါ။
ဒီလူတွေဟာ လက်ရှိမှာ ရခိုင်ပြည်နယ်တွင်းမှာ နဂိုကနဲ့ မတူတဲ့ အခြေအနေဆိုးတစ်ခုနဲ့ ပိတ်မိပြီး အသတ်မခံရဘဲ သေကြရမယ့် အခြေအနေမှာ ရှိနေတာပါ။ ဒီတော့ သူတို့တွေကို ကျွန်တော်တို့က သေနိုင်မှန်း သိသိကြီးနဲ့ လစ်လျူရှုကြရင် သူတို့ကို သွယ်ဝိုက် သတ်တဲ့ လူသတ်တရားခံထဲ ပါနိုင်ပါတယ်။
အဓိက ကတော့ သူတို့အတွက် လတ်တလော အရေးပေါ် လိုအပ်ချက် ဖြစ်မယ့် စားရေးနဲ့ ကျန်းမာရေးအတွက် အမြန် ထပ်စီစဉ်ပေးကြရပါမယ်။
Leave a Reply
You must be logged in to post a comment.