ဇွန် ၁၉ ၊ ၂၀၁၆
M-Media
သတင်း-သူရိန်
ရပ်ကွက်တွင်း နေထိုင်သူများနှင့် ဘာသာပေါင်းစုံတို့ ပါဝင်သော အစ္စလာမ်ဘာသာဝင်တို့၏ စုပေါင်းဝါဖြေပွဲ တစ်ရပ်ကို ရန်ကုန်မြို့ မင်္ဂလာတောင်ညွန့် မြို့နယ် ရေတွင်းကုန်း ရပ်ကွက် အုပ်ချုပ်ရေးမှူးရုံးမှာ ဇွန်လ ၁၈ရက်နေ့က ကျင်းပပြုလုပ်ခဲ့ကြောင်း သိရသည်။
အဆိုပါ စုပေါင်းဝါဖြေပွဲသို့ မင်္ဂလာတောင်ညွန့်မဲဆန္ဒနယ်မှ ရန်ကုန်တိုင်းဒေသကြီး လွှတ်တော် ကိုယ်စားလှယ်များနှင့် ဘာသာကြီး လေးရပ်မှ မိတ်ဆွေများ၊ ရပ်ကွက်အတွင်း နေထိုင်သူများနှင့် အစ္စလာမ်ဘာသာဝင်များ တက်ရောက်အားပေး ချီးမြှင့်ခဲ့ကြသည်။
အခမ်းအနားတွင် ရေတွင်းကုန်း ရပ်ကွက် အုပ်ချုပ်ရေးမှူး ဦးရဲနောင်သိန်းက အမှာစကားပြောကြားရာမှာ ” တစ်ဘာသာ နှင့် တစ်ဘာသာ ငြိမ်းချမ်း ချစ်ကြည် တွဲလက်ညီစွာဖြင့် အမိနိုင်ငံတော် အတွက် ထမ်းရွက် ကျေပွန်သင့်ကြသည်ဖြစ်ကြောင်း၊ ရှေးဘုရင်များ လက်ထက်မှ သည် ခေတ်အဆက်ဆက် အစ္စလာမ်ဘာသာဝင် မွတ်စလင်များ သစ္စာရှိရှိ တာဝန်သိသိ ကျေပွန် ဆောင်ရွက် နေထိုင် ခဲ့ကြသည်သာ ဖြစ်ပါကြောင်း ၊ ရှေ့ဆက်၍လည်း အမိမြန်မာနိုင်ငံတော် အပေါ် ကျေးဇူးတရား စောင့်သိ ရိုသေစွာဖြင့် ကျေပွန်သွားကြမည် သာဖြစ်ပါကြောင်း” ဖြင့် မြန်မာပြည်တွင် နေထိုင်သော အစ္စလာမ်ဘာသာဝင်များ တိုင်းပြည်အပေါ် သစ္စာစောင့်တည်မှုများကို ထည့်သွင်းပြောကြားခဲ့သည်။
စုပေါင်းဝါဖြေပွဲတွင် ဘာသာကြီးလေးရပ်မှ ကိုယ်စားပြု ဟောကြားပြီး အစ္စလာမ်ဘာသာဝင်များ၏ ဥပုသ် ဖြေချိန် ညနေပိုင်းတွင် စားသောက်ဖွယ်ရာများဖြင့် စုပေါင်းဝါဖြေခဲ့ခြင်း ဖြစ်သည်။
ယမန်နှစ်များကလည်း Social Alliance လူမှုမဟာမိတ် အဖွဲ့မှ ဘာသာပေါင်းစုံ စုပေါင်းဝါဖြေပွဲများ ကျင်းပခဲ့ပြီး ယခု အခမ်းအနားကို အဆိုပါအဖွဲ့နှင့် ရေတွင်းကုန်း ရပ်ကွက် အုပ်ချုပ်ရေးမှူးရုံး တို့ ပူပေါင်းစီစဉ် ကျင်းပခဲ့ခြင်းလည်း ဖြစ်သည်။
ယခုနှစ် ၂၀၁၆ခုနှစ် ဇွန်လဆန်းမှ ဇူလိုင်လဆန်းအထိ တစ်လတာ ကျရောက်သည့် အစ္စလာမ်ဘာသာဝင်များရဲ့ ရမဇန် ဥပုတ်လအတွင်း ကမ္ဘာ အရပ်ရပ်ရှိ ဥပုတ်သီလ စောင့်တည်သူ အစ္စလာမ်ဘာသာဝင်များသည် ၎င်းတို့၏ ဥပုသ်အချိန်ကုန်ဆုံးချိန် စုပေါင်းဝါဖြေပွဲများကို အသွင် သဏ္ဍာန် အမျိုးမျိုးဖြင့် အနှစ်သာရရှိရှိ ကျင်းပသည့် အစဉ်အလာရှိကြပါသည်။
Leave a Reply
You must be logged in to post a comment.