ဇူလိုင် ၁၄၊ ၂၀၁၆
M-Media
– ရီးယဲလ်အသင်း၏ ပေါ်တူဂီတိုက်စစ်မှူး ခရစ္စတီယာနို ရော်နယ်ဒိုမှာ ၎င်း၏မျိုးဆက် ကစားသမားများထဲတွင် အကောင်းဆုံးကစားသမားဖြစ်သည်ဟု မန်ယူနည်းပြဟောင်း ဖာဂူဆန်က ချီးကျူးပြောဆိုလိုက်သည်။
ကလပ်အသင်းကစားသမားဘ၀တွင် အောင်မြင်မှုသရဖူများ ဆောင်းနိုင်ခဲ့သည့် ရော်နယ်ဒိုမှာ မကြာသေးမီက ကျင်းပပြီးစီးခဲ့သည့် ယူရို ၂၀၁၆ ပြိုင်ပွဲတွင်လည်း ပေါ်တူဂီလက်ရွေးစင်အသင်းနှင့်အတူ ချန်ပီယံဆုဖလား ရရှိကာ နိုင်ငံတကာကစားသမားဘ၀ အောင်မြင်မှုကို မြည်းစမ်းခွင့် ရရှိခဲ့သည်။
အသက် ၁၈ နှစ်အရွယ်တွင် ရော်နယ်ဒိုအား မန်ယူသို့ခေါ်ယူကာ မြေတောင်မြှောက်ပေးခဲ့သည့် ဖာဂူဆန်ကမူ တပည့်ဟောင်း၏ ကြိုးစားအားထုတ်မှုနှင့် အောင်ပွဲဆာလောင်မွတ်သိပ်မှုများကို ချီးကျူးခဲ့သည်။
“သူ့မှာ ဘောလုံးအပေါ် မယုံကြည်နိုင်လောက်တဲ့ စိတ်ဆန္ဒမျိုး ရှိပါတယ်။ ခရစ္စတီယာနိုဟာ လေ့ကျင့်ခန်းတစ်ခုချင်းစီမှာကို ရှေ့ရောက်အောင် ကြိုးစားအားထုတ်သူပါ။ သူက အမြဲတမ်း ပိုပိုကောင်းချင်တယ်၊ ပိုပြီးအနိုင်ရချင်ပါတယ်။ အထူးသဖြင့် ပွဲကြီးတွေမှာ ကစားရတာကို နှစ်သက်ပါတယ်။ ကျွန်တော့်လက်ထက်မှာ အပြင်းအထန်လေ့ကျင့်မှုနဲ့အတူ ခရစ္စတီယာနိုဟာ အတိုးတက်ဆုံး ကစားသမားတစ်ဦးပါ” ဟု ဖာဂူဆန်က ပြောကြားခဲသည်။
ထို့ပြင် ၎င်း၏ စွမ်းဆောင်ရည်တိုးတက်မှုမှာ မယုံကြည်နိုင်စရာဖြစ်ကြောင်း၊ ထိပ်တန်းကစားသမားများမှာ ပုံမှန်အားဖြင့် ၅ နှစ် သို့မဟုတ် ၆ နှစ်ခန့်သာ ခြေစွမ်းကို ထိန်းထားနိုင်သော်လည်း ရော်နယ်ဒိုကမူ ၎င်း၏ ထိပ်တန်းခြေစွမ်းကို ၁၀ နှစ်ခန့်အထိ ထိန်းထားနိုင်ကြောင်း၊ ၎င်း၏ မျိုးဆက် ဘောလုံးကစားသမားများထဲတွင် အထူးခြားဆုံး ကစားသမားဖြစ်ကြောင်း ဖာဂူဆန်က ထပ်လောင်းပြောကြားခဲ့သည်။
Ref: Goal
Leave a Reply
You must be logged in to post a comment.