News @ M-Media

ပြင်သစ်ရှိ ခရစ်ယာန်ဘုရားကျောင်းကို IS အဖွဲ့ဝင်များ ၀င်ရောက်တိုက်ခိုက်၊ တစ်ဦး သေဆုံး

ဇူလိုင် ၂၆၊ ၂၀၁၆
M-Media

france 3

– ပြင်သစ်နိုင်ငံမြောက်ပိုင်း နော်မန်ဒီဒေသရှိ ခရစ်ယာန်ဘုရားကျောင်းတစ်ခုအတွင်း လူနှစ်ဦးက ဓားများဖြင့် ၀င်ရောက်တိုက်ခိုက်မှုကြောင့် အသက် ၈၄ နှစ်အရွယ်ရှိ ခရစ်ယာန်ဘုန်းကြီးတစ်ဦး သေဆုံးခဲ့သည်ဟု ပြင်သစ်ပြည်ထဲရေးဝန်ကြီးက ပြောကြားလိုက်သည်။

Saint-Etienne-du-Rouvray ဘုရားကျောင်းဖြစ်ပြီး ယနေ့မနက်ပိုင်း ၀တ်ပြုဆုတောင်းမှု ပြုလုပ်နေစဉ်အတွင်း လူ ၂ နှစ်ဦးက ဓားများဖြင့်ဝင်ရောက်ကာ ဘုရားကျောင်းအတွင်းရှိသူများအား ဓားစားခံအဖြစ် ဖမ်းဆီးထားခဲ့ခြင်းဖြစ်သည်။ ခရစ်ယာန်ဘုန်းကြီး သေဆုံးမှုအပြင် ဒုတိယမြောက် ဓားစားခံမှာလည်း အသက်အန္တရာယ်စိုးရိမ်ရသည့် အခြေအနေ ရှိနေသည်ဟု AFP သတင်းဌာနက ဖော်ပြခဲ့သည်။

ပြင်သစ်သမ္မတ ဖရန်ကိုအစ် အော်လွန်းကမူ တိုက်ခိုက်သူများက ၎င်းတို့မှာ IS အကြမ်းဖက်အဖွဲ့မှ ဖြစ်သည်ဟု ပြောကြားခဲ့ကြောင်း၊ IS မှာ မိမိတို့အား စစ်ကြေငြာထားသည့်အတွက် နည်းလမ်းပေါင်းစုံဖြင့် တိုက်ခိုက်သွားရမည်ဖြစ်ကြောင်း သတင်းထောက်များအား ပြောကြားခဲ့သည်။

တိုက်ခိုက်သူများမှာ ဘုရားကျောင်းမှထွက်ပြေးစဉ်အတွင်း အထူးတပ်ဖွဲ့ဝင်များက အသေပစ်ခတ်ဖမ်းဆီးခဲ့သည်။

ဗာတီကန်ကမူ ထိုအဖြစ်အပျက်အတွက် ကြေငြာချက်ထုတ်ပြန်ခဲ့ပြီး ကြမ်းကြုတ်သောလုပ်ရပ်ဖြစ်ကြောင်း၊ မြင့်မြတ်ရာနေရာတွင် ဖြစ်ပွားခဲ့သောကြောင့် ထိုအဖြစ်အပျက်မှာ ပိုမို၍ စက်ဆုပ်စရာကောင်းကြောင်း ဖော်ပြခဲ့သည်။

Ref: Aljazeera

Comments

Leave a Reply