News @ M-Media

လေယာဉ်ပေါ်တွင် Galaxy Note 7 အသုံးပြုခြင်းကို အမေရိကန် ပိတ်ပင်

အောက်တိုဘာ ၁၅၊ ၂၀၁၆
M-Media

galaxy

– ပေါက်ကွဲမှုကြောင့် လူများ ထိခိုက်ဒဏ်ရာရခြင်း၊ အပူလွန်ကဲခြင်း စသည့် ဖြစ်ရပ်ပေါင်း ၁၀၀ ကျော် ဖြစ်ပွားခဲ့သည့် ဆမ်ဆောင်း၏ Galaxy Note 7 အသုံးပြုခြင်းကို အမေရိကန်လေကြောင်းလိုင်းအားလုံးတွင် ပိတ်ပင်သွားမည်ဟု အမေရိကန် သယ်ယူပို့ဆောင်ရေးဌာနက ယမန်နေ့တွင် ကြေငြာခဲ့သည်။

ယခင်က အမေရိကန် အရပ်ဖက် လေကြောင်းအုပ်ချုပ်ရေးဌာနမှာ ခရီးသွားများအနေဖြင့် အဆိုပါဖုန်းကို လေယာဉ်ပေါ်တွင် အသုံးမပြုဘဲ ခရီးဆောင်အိတ်တွင်သာ သိမ်းဆည်းထားရန် သို့မဟုတ် လေကြောင်းခရီးစဉ်အတွင်း အားသွင်းခြင်းမပြုရန် ညွှန်ကြားထားသည်။ ယခုပိတ်ပင်မှုမှာ စနေနေ့ နေ့လည်ပိုင်းမှစ၍ အသက်ဝင်မည်ဟု ပို့ဆောင်ရေးဝန်ကြီး အန်သိုနီ ဖောက်စ်က ပြောကြားခဲ့သည်။

“လေကြောင်းလိုင်းတွေအားလုံးမှာ ဒီလိုပိတ်ပင်မှုဟာ အချို့သော ခရီးသည်တွေကို စိတ်အနှောက်အယှက်ဖြစ်စေမယ်ဆိုတာ ကျွန်တော်တို့ သိပါတယ်။ ဒါပေမယ့် လေယာဉ်ပေါ်လိုက်ပါလာသူအားလုံးရဲ့ ဘေးအန္တရာယ်ကင်းရှင်းရေးကို အဓိကဦးစားပေး ဆောင်ရွက်ရမှာပါ။ ကျွန်တော်တို့ ဒီလို ထပ်တိုး တင်းကြပ်ရတာက လေယာဉ်အတွင်းမှာ ဖုန်းမီးထလောင်ရင် တစ်ဦးချင်း ကြီးမားတဲ့ အန္တရာယ်တွေ ရှိသလို၊ လူ့အသက်ပေါင်းများစွာကိုလည်း အန္တရာယ်ရှိစေနိုင်တာကြောင့်ပါ” ဟု ၎င်းက ပြောကြားခဲ့သည်။

ဆမ်ဆောင်းကလည်း မိမိတို့အနေဖြင့် ခရီးသွားများအပေါ် ထိုကဲ့သို့ ပိတပင်မှုအတွက် ဆက်သွယ်ဆောင်ရွက်နေသည်ဟု ပြောကြားခဲ့သည်။ ပထမဆုံး ထုတ်လုပ်ခဲ့သည့် Galaxy Note 7 တွင် အပူလွန်ကဲခြင်း၊ ဖောက်ကွဲခြင်း စသည့် ပြဿနာများရှိခြင်းကြောင့် ပြန်သိမ်းကာ အသစ်နှင့် အစားထိုးပေးခဲ့သော်လည်း ထိုအစားထိုးပေးသည့် ဖုန်းများတွင်ပါ အပူလွန်ကဲခြင်းကို ထပ်မံတွေ့ရှိခဲ့ရသောကြောင့် ဆမ်ဆောင်းက အဆိုပါဖုန်း ထုတ်လုပ်မှုကို ရပ်တန့်လိုက်ပြီဟု တနင်္လာနေ့တွင် ကြေငြာခဲ့သည်။

Ref: USA Today

Comments

Leave a Reply