ဧပြီ ၂၁၊ ၂၀၁၇
M-Media
– အင်ဒိုနီးရှားနိုင်ငံသို့ ရောက်ရှိနေသည့် အမေရိကန် ဒုတိယသမ္မတ မိုက်ပန့်စ်မှာ ဂျကာတာမြို့ရှိ နိုင်ငံ၏ အကြီးဆုံး အစ္စတစ်ကာလ် ဗလီဝတ်ကျေင်းတော်သို့ ယမန်နေ့က သွားရောက်လည်ပတ်ခဲ့သည်ဟု သိရသည်။
မိုက်ပန့်စ်နှင့်အတူ ၎င်း၏ ဇနီးနှင့် သမီး နှစ်ဦးတို့လည်း လိုက်ပါလာခဲ့ပြီး ဗလီဝတ်ကျောင်းတော်၏ အီမာမ်ကြီး နာဆာရူဒင် အူမာရ်က ၀တ်ကျောင်းတော်အတွင်း လှည့်လည် ပြသခဲ့သည်။ မိုက်ပန့်စ်ကမူ အင်ဒိုနီးရှားနိုင်ငံ၏ အစ္စလာမ့်အလယ်အလတ်လမ်းစဉ် ကျင့်သုံးမှုမှာ အားကျစရာဖြစ်သည်ဟု ပြောကြားခဲ့သည်။
“အင်ဒိုနီးရှားရဲ့ အစ္စလာမ့်အလတ်အလတ်လမ်းစဉ်ကို ကျင့်သုံးမှုဓလေ့ဟာ ကမ္ဘာကြီးအတွက် လေးစားအားကျစရာတစ်ခုပါပဲ။ ခင်ဗျားတို့နဲ့ ခင်ဗျားတို့ရဲ့ ပြည်သူတွေကို ချီးကျူးပါတယ်။ ခင်ဗျားတို့တိုင်းပြည်ဟာ ကျွန်တော်တို့ တိုင်းပြည်လိုပဲ ဘာသာတရားတွေ စည်းလုံးတယ်၊ သွေးကွဲမှုမရှိပါဘူး” ဟု ဂျကာတာရှိ သမ္မတအိမ်တော်တွင် သမ္မတဂျိုကို ၀ီဒိုဒိုနှင့် တွေ့ဆုံပြီးနောက် ပြောကြားခဲ့သည်။
ဗလီဝတ်ကျောင်းတော်အတွင်း လှည့်လည်ကြည့်ရှုခဲ့ပြီးနောက် မိုက် ပန့်စ်မှာ ခရစ်ယာန်၊ ဗုဒ္ဓဘာသာ၊ ကွန်ဖြူးရှပ်စ်ဘာသာ၊ ဟိန္ဒူနှင့် အစ္စလာမ်ဘာသာများမှ ဘာသာရေးခေါင်းဆောင်များနှင့် ဆွေးနွေးမှု ပြုလုပ်ခဲ့သည်။
မိုက်ပန့်စ်က အင်ဒိုနီးရှားနိုင်ငံ၏ ပြည့်ဝသည့် အစ္စလာမ်သာသနာမှာ သဘောထားတင်းမာသူများ၊ ကွန်ဆာဗေးတစ်ဝါဒသို့ ဦးတည်သည့် အရွေ့တစ်ခု၏ ခြိမ်းခြောက်မှုအောက် ရောက်နေသည်ဟုလည်း ထည့်သွင်းပြောဆိုခဲ့သည်။
သမ္မတ ၀ီဒိုဒိုနှင့်တွေ့ဆုံပြီးနောက် မိမိတို့မှာ အကြမ်းဖက်ဝါဒကို တိုက်ဖျက်ရေးအတွက် ပိုမိုခိုင်မာသည့် ကာကွယ်ရေး ပူးပေါင်ေးဆာင်ရွက်မှုတစ်ခု တည်ဆောက်ရေး၊ တောင်တရုတ်ပင်လယ်အတွင်း လွတ်လပ်စွာ ရေကြောင်းသွားလာခွင့် အာမခံချက်ရှိရေး ဆောင်ရွက်ရန် သဘောတူခဲ့သည်ဟု မိုက်ပန့်စ်က ကြေငြာခဲ့သည်။
အမေရိကန် ဒုတိယသမ္မတမှာ တောင်ကိုရီးယားနှင့် ဂျပန်နိုင်ငံများသို့ သွားရောက်ခဲ့ပြီး သြစတေးလျနိုင်ငံသို့ သွားရောက်ရန် ရှိနေသည်။
Ref : CNA