စက်တင်ဘာ ၉၊ ၂၀၁၇
M-Media
– ကာရစ်ဘီယံဒေသ၌ တိုက်ခတ်နေသည့် ဟာရီကိန်း အာရ်မာရန်ကြောင့် အမေရိကန်ပြည်ထောင်စု ဖလော်ရီဒါပြည်နယ်ရှိ သန်းနှင့်ချီသော ပြည်သူများကို ဘေးလွတ်ရာသို့ ရွှေ့ပြောင်းရန် အာဏာပိုင်များက အမိန့်ပေးထားသည်ဟု သိရသည်။
ကာရစ်ဘီယံရှေ့ခြမ်းတွင် လူပေါင်း ၂၂ ဦး သေဆုံးခဲ့ပြီး အပျက်အဆီးများခဲ့သည့် ဟာရီကိန်း အာရ်မာမှာ လက်ရှိတွင် အားကောင်းသော အဆင့် ၅ မုန်တိုင်းအဖြစ် ကျူးဘားနိုင်ငံ ကုန်းတွင်းပိုင်းသို့ ၀င်ရောက်နေသည်။
ဟာရီကိန်း အာရ်မာမှာ နှစ် ၁၀၀ အတွင်း အတ္တလန်တိတ်ဒေသ၏ အဆိုးဝါးဆုံး မုန်တိုင်းများထဲမှ တစ်ခုအဖြစ် သတ်မှတ်ခြင်းခံထားရပြီး တနင်္ဂနွေနေ့မနက်တွင် ဖလော်ရီဒါပြည်နယ်သို့ ၀င်ရောက်မည်ဟု ခန့်မှန်းထားသည်။
လက်ရှိ ကျူးဘားနိုင်ငံတွင် မုန်တိုင်းကြောင့် ပျက်ဆီးဆုံးရှုံး သတင်းများ ထွက်မလာသေးပေ။
အမေရိကန်နိုင်ငံမှာ ၁၈၅၁ ခုနှစ်ကတည်းက ပြင်းအား အဆင့် ၅ ရှိ မုန်တိုင်း ၃ ခုဒဏ်ကို ခံစားခဲ့ရပြီး နောက်ဆုံးတစ်ခုမှာ ၁၉၉၂ ခုနှစ်က တိုက်ခတ်ခဲ့သော ဟာရီကိန်း အန်ဒရူးဖြစ်သည်။
ဖလော်ရီဒါပြည်နယ်မှာ အမေရိကန်တွင် စတုတ္ထမြောက် လူနေထူထပ်သည့် ပြည်နယ်ဖြစ်ပြီး ပြည်နယ်လူဦးရေ စုစုပေါင်း၏ ၂၅ ရာခိုင်နှုန်း ၅.၆ သန်းမှာ လက်ရှိတွင် ဘေးလွတ်ရာနေရာသို့ ရွှေ့ပြောင်း နေထိုင်နေရသည်။
အမေရိကန်ပြည်ထောင်စု တက္ကဆက်ပြည်နယ်တွင် ပြီးခဲ့သည့်တစ်ပတ်က ဟာရီကိန်းဟာဗီး တိုက်ခတ်ခဲ့ပြီး လူသေဆုံးမှုရှိခဲ့ကာ ပျက်ဆီးဆုံးရှုံးမှုလည်း များပြားခဲ့သည်။
Ref: Aljazeera