အောက်တိုဘာ ၁၇၊ ၂၀၁၇
M-Media
– IS အကြမ်းဖက်အဖွဲ့က ၎င်းတို့မြို့တော်အဖြစ် သတ်မှတ်ခဲ့သည့် မဟာဗျူဟာမြောက် ရက်ကာမြို့ကို အမေရိကန် ကျောထောက်နောက်ခံပြု ဆီးရီးယား ကာ့ဒ်တပ်ဖွဲ့နှင့် အာရပ်တပ်ဖွဲ့များက ယနေ့တွင် အပြည့်အ၀ ပြန်လည်သိမ်းပိုက်နိုင်ခဲ့သည်ဟု သိရသည်။
၅ လကြာ တိုက်ခိုက်ခဲ့ပြီးနောက် ယခုကဲ့သို့ ပြန်လည်သိမ်းပိုက်နိုင်ခဲ့ခြင်းဖြစ်ပြီး IS အကြမ်းဖက်သမား တစ်ယောက်ချင်းကို လိုက်လံသုတ်သင်နေကာ မြေမြှုပ်မိုင်းများကို ဖယ်ရှားနေသည်ဟု ဆီးရီးယား ဒီမိုကရက်တစ်တပ်ဖွဲ့ (SDF) မှ ပြောရေးဆိုခွင့်ရှိသူ တာလာလ် ဆဲလ်လိုက ပြောကြားခဲ့သည်။
ရက်ကာမြို့အား IS က ၂၀၁၄ ခုနှစ်တွင် သိမ်းပိုက်ခဲ့ပြီး ၎င်းတို့၏ ခါလီဖိတ်မြို့တော်အဖြစ် ကြေငြာခဲ့သည်။
SDF မှာ ဇွန်လ ၆ ရက်နေ့မှစ၍ ရက်ကာမြို့ ပြန်လည်သိမ်းပိုက်နိုင်ရေး ထိုးစစ်စတင်ခဲ့ပြီး အမေရိကန်ဦးဆောင်သည့် မဟာမိတ်များက လေကြောင်းမှ ကူညီတိုက်ခိုက်ပေးခဲ့သည်။
အဆိုပါ စစ်ဆင်ရေးအတွင်း အရပ်သား ၉၀၀ ကျော် သေဆုံးခဲ့ပြီး မဟာမိတ်များ၏ လေကြောင်းတိုက်ခိုက်မှုကြောင့် ၅၇၀ အထိ သေဆုံးခဲ့သည်ဟု ဆီးရီးယား လူ့အခွင့်အရေးကွန်ယက်က ပြောကြားခဲ့သည်။
အမေရိကန်နှင့် SDF တို့က ရက်ကာမြို့အား အရပ်သားအုပ်ချုပ်ရေးဖက်သို့ လွှဲပြောင်းပေးသွားမည်ဟု ပြောကြားထားသော်လည်း လူမျိုးစုံရှိနေပြီး ပထ၀ီအနေအထားအရ အရေးပါမှုက လွှဲပြောင်းရေးကိစ္စကို ကြန့်ကြာစေမည့်အခြေအနေမျိုး ရှိနေသည်။
Ref: Aljazeera