ဒီဇင်ဘာ ၈၊ ၂၀၂၄
M-Media
-တိုင်းပြည်ကို နှစ်ပေါင်း ၂၀ ကျော် ချုပ်ကိုင် အုပ်စိုးခဲ့တဲ့ အာဏာရှင် ဘာရှာ အလ်အာဆတ်ဟာ ဒီဇင်ဘာ ၈ ရက်နေ့ မနက်အစောပိုင်းမှာ တိုင်းပြည်ကနေ ထွက်ပြေးသွားပြီလို့ သိရပါတယ်။
ဟာဖစ်ဇ် အလ်အာဆတ်နဲ့ ဘာရှာ အလ်အာဆတ်တို့ သားအဖနှစ်ယောက် ထူထောင်ခဲ့တဲ့ နှစ် ၅၀ ကျော်ကြာ အာဏာရှင်စနစ်တစ်ခု အရှေ့အလယ်ပိုင်းမှာ အဆုံးသတ်သွားတာလည်း ဖြစ်ပါတယ်။
ဆီးရီးယားမှာ အာဏာရှင် အလ်အာဆတ် ရာထူးကဆင်းပေးရေး လူထုဆန္ဒပြမှုတွေ ၂၀၁၁ ခုနှစ်မှာ စတင်ခဲ့ပြီး ပြင်းပြင်းထန်ထန် နှိမ်နှင်းမှုနဲ့ ကြုံတွေ့ခဲ့ရပြီးနောက် လက်နက်ကိုင် တော်လှန်ရေးအသွင် ပြောင်းလဲသွားခဲ့ပြီး ၁၃ နှစ်တာ ကြာမြင့်ကာ ယခုအချိန်မှ အလုံးစုံအောင်မြင်မှုရရှိခဲ့တာ ဖြစ်ပါတယ်။
ဆီးရီးယားစစ်တပ်အကြီးအကဲကလည်း အာဆတ်ရဲ့ အုပ်ချုပ်မှု အဆုံးသတ်သွားပြီဖြစ်ကြောင်း စစ်တပ်ကို အကြောင်းကြားခဲ့ပြီး တော်လှန်ရေးတပ်ဖွဲ့တွေဆီမှာ လက်နက်ချခဲ့ပါတယ်။
တော်လှန်ရေးတပ်ပေါင်းစုကို ဦးဆောင်တဲ့ Hayat Tahrir al-Sham အဖွဲ့က ဆီးရီးယားနိုင်ငံ လွတ်မြောက်ပြီဖြစ်ကြောင်း ကြေငြာကာ တိုက်ခိုက်မှုတွေရပ်တန့်ဖို့၊ နိုင်ငံပိုင် အဆောက်အဦးတွေကို တိုက်ခိုက်မှု မလုပ်ဖို့ တပ်ဖွဲ့၀င်တွေကို အမိန့်ပေးခဲ့ပါတယ်။
Ref: Aljazeera
