ဒီဇင်ဘာ ၁၈၊ ၂၀၁၇
M-Media
– နိုင်ငံအနောက်တောင်ပိုင်းက ခရစ်ယာန်ဘုရားကျောင်းတစ်ခု အကြမ်းဖက်တိုက်ခိုက်ခံရပြီးတဲ့နောက်ပိုင်းမှာ ပါကစ္စတန်က နိုင်ငံတစ်ဝှမ်းမှာ ရှိနေတဲ့ လူနည်းစုတွေရဲ့ ၀တ်ပြုရာနေရာတွေမှာ လုံခြုံရေးတွေ တိုးမြှင့်ချထားလိုက်ပါတယ်။
ဘာလိုချစ္စတန်ပြည်နယ် ကွက်တာမြို့က မက်သဒစ် ခရစ်ယာန်ဘုရားကျောင်းမှာ မနေ့က လူပေါင်း ၄၀၀ လောက် ၀တ်ပြုဆုတောင်းဖို့ ရောက်ရှိနေတဲ့အချိန် IS အကြမ်းဖက်အဖွဲ့ဝင် နှစ်ဦးက တိုက်ခိုက်ခဲ့တာဖြစ်ပြီး ၉ ဦးသေဆုံးကာ ၄၄ ဦး ဒဏ်ရာရရှိခဲ့ပါတယ်။
“အကြမ်းဖက်သမားတွေအပေါ် ရှင်းလင်းမှုကို ကျွန်တော်တို့ တွန့်ဆုတ်မှုမရှိဘဲ ဆက်လက်ဆောင်ရွက်သွားမှာပါ။ ဒီလို သရဲဘောကြောင်တဲ့ တိုက်ခိုက်မှုမျိုးတွေက ကျွန်တော်တို့ကို ကြောက်စိတ်ဝင်စေမှာ မဟုတ်ပါဘူး” လို့ ပြည်နယ်ဝန်ကြီးချုပ် ဆာနာအွလ္လာ ဇဟ်ရီက ဒီကနေ့မှာ ပြောကြားခဲ့ပါတယ်။
တိုက်ခိုက်မှုအတွင်း သေဆုံးသွားသူတွေ မိသားစုဝင်တွေကို အစိုးရက နစ်နာကြေး ရူပီး ၁၀ သိန်း၊ ဒဏ်ရာရသူတွေကို ၅ သိန်း ပေးသွားမယ်လို့လည်း ၀န်ကြီးချုပ်က ဆိုပါတယ်။
ပါကစ္စတန်ဝန်ကြီးချုပ် ရှာဟစ်ဖ် ခါကန်နဲ့ စစ်တပ်အကြီးအကဲ ဗိုလ်ချုပ်ကြီး ကာမာရ် ဂျာဗဒ် ဘဂ်ျဝါတို့ကလည်း တိုက်ခိုက်မှုကို ရှုတ်ချခဲ့ပါတယ်။
တိုက်ခိုက်မှုကို ရှုတ်ချကာ သေဆုံးသွားသူတွေအတွက် ၀မ်းနည်းဖွယ်အခမ်းအနားကို ပါကစ္စတန်နိုင်ငံတစ်ဝှမ်းမှာ ပြုလုပ်ခဲ့ကြပြီး ခရစ်ယာန်နဲ့ မွတ်စလင် ဘာသာရေးခေါင်းဆောင်တွေက ၀တ်ပြုဆုတောင်းပေးခဲ့ကြပါတယ်။
လက်ရှိမှာ ဘာလိုချစ္စတန်နဲ့ ဆင်းဒ်ပြည်နယ်တို့အပါအ၀င် နိုင်ငံတစ်ဝှမ်းက ဘာသာရေးလူနည်းစုတွေရဲ့ ၀တ်ပြုရာနေရာတွေဖြစ်တဲ့ ခရစ်ယာန်ဘုရားကျောင်းနဲ့ ဟိန္ဒူဘုရားကျောင်းတွေမှာ အစိုးရက လက်နက်ကိုင် လုံခြုံရေး အစောင့်အကြပ်တွေကို တိုးမြှင့်ချထားလိုက်ပြီး၊ စောင့်ကြည့်ကင်မရာ တပ်ဆင်တာမျိုးလို လုံခြုံရေးဆိုင်ရာ ဆောင်ရွက်မှုတွေကိုလည်း လုပ်ဆောင်နေပါတယ်။
ဟိန္ဒူဘုရားကျောင်း ၇၀၃ ခု၊ ခရစ်ယာန်ဘုရားကျောင်း ၅၂၃ ခုရှိတဲ့ ဆင်းပြည်နယ်တစ်ခုထဲမှာပဲ ဒီလို လုံခြုံရေးဆိုင်ရာ ဆောင်ရွက်မှုအတွက် ရူပီး သန်း ၄၀၀ လောက် သုံးစွဲသွားမယ်လို့ ပြည်နယ် ပြည်ထဲရေးဝန်ကြီး ဆိုဟေးလ် အန်ဝါရ် ဆီယဲလ်က ပြောကြားခဲ့ပါတယ်။
တနင်္ဂနွေနေ့က တိုက်ခိုက်မှုကို နိုင်ငံအတွင်းက ဘာသာရေးခေါင်ဆောင်တွေ၊ နိုင်ငံရေးသမားတွေက ရှုတ်ချခဲ့ကြပြီး ဒီလိုနည်းလမ်းနဲ့ ပါကစ္စတန်ပြည်သူတွေကို သွေးကွဲအောင် ပြုလုပ်လို့ ရမှာမဟုတ်ဘူးလို့ ပြောကြားခဲ့ပါတယ်။ အစိုးရအနေနဲ့ လူနည်းစုတွေကို ပိုမိုကာကွယ်ပေးဖို့အတွက်လည်း တောင်းဆိုခဲ့ပါတယ်။
Ref: Pakistan Today, Nation,