သြဂုတ် ၃၁၊ ၂၀၁၈
M-Media
– နယ်သာန်လန်က မွတ်စလင်ဆန့်ကျင်ရေး အတိုက်အခံ နိုင်ငံရေးသမား ဂါ့တ် ၀ိုင်းလ်ဒါးဟာ လာမယ့်နိုဝင်ဘာလမှာ ပြုလုပ်ဖို့ စီစဉ်ထားတဲ့ တမန်တော်မိုဟာမက် ရုပ်ပြောင်ကာတွန်းပြိုင်ပွဲကို ဖျက်သိမ်းလိုက်ပါတယ်။
ဝိုင်းလ်ဒါးရဲ့ ဒီအစီအစဉ်ဟာ တစ်ပါးသူရဲ့ ဘာသာသာသနာကို ထိခိုက်စေတယ်လို့ဆိုပြီး ကမ္ဘာတစ်ဝှမ်းက ကန့်ကွက်မှုတွေ ပြုလုပ်ခဲ့ကြပါတယ်။ ပါကစ္စတန်နိုင်ငံမှာတော့ ပြီးခဲ့တဲ့ရက်ပိုင်းအတွင်း ဒီကိစ္စကို ဆန့်ကျင်တဲ့ ဆန္ဒပြမှုတွေ အကြီးအကျယ် ဖြစ်ပေါ်ခဲ့ပါတယ်။
နယ်သာလန်နိုင်ငံမှာလည်း ၀ိုင်းလ်ဒါးကို သတ်ဖြတ်ဖို့ ကြံစည်မှုနဲ့ အသက် ၂၆ နှစ်အရွယ် အမျိုးသားတစ်ဦးကို ရဲတပ်ဖွဲ့က ဖမ်းဆီးထားပါတယ်။
ဝိုင်းလ်ဒါးကတော့ ဒီကာတွန်းပြိုင်ပွဲကြောင့် အကြမ်းဖက်တိုက်ခိုက်မှုဖြစ်ကာ အပြစ်မဲ့သူတွေကို မထိခိုက်စေချင်တဲ့အတွက် ဖျက်သိမ်းလိုက်တာဖြစ်တယ်လို့ မနေ့က ကြေငြာချက် ထုတ်ပြန်ခဲ့ပါတယ်။
ပြည်တွင်းမှာ လူကြိုက်နည်းလာတဲ့အတွက် လူတွေ အာရုံစိုက်မှု ရအောင် ၀ိုင်းလ်ဒါးတစ်ယောက် ဒီလို စတန့်ထွင်ရခြင်းဖြစ်တယ်လို့ နိုင်ငံရေး လေ့လာဆန်းစစ်သူတစ်ချို့က သုံးသပ်ပါတယ်။
အင်မရန်းခန်းဦးဆောင်တဲ့ ပါကစ္စတန်အစိုးရကတော့ ဒီကိစ္စကို ကုလသမဂ္ဂအထိ ရောက်ရှိအောင် ဆောင်ရွက်သွားမယ်လို့ ကတိပြုထားပါတယ်။
Ref: Aljazeera