News @ M-Media

ကမ္ဘာ့တပ်မတော်များ အားကစားပြိုင်ပွဲတွင် တရုတ်အသင်းက မသမာမှု ပြုလုပ်

အောက်တိုဘာ ၂၈၊ ၂၀၁၉
M-Media

-လက်ရှိ တရုတ်နိုင်ငံမှာ ကျင်းပနေတဲ့ ‘ကမ္ဘာ့တပ်မတော်များ အားကစားပြိုင်ပွဲ’ (Military World Games) မှာ ‌အိမ်ရှင်တရုတ်အသင်းက မသမာမှုတွေ လုပ်ဆောင်တဲ့အတွက် ပြိုင်ပွဲကနေ ထုတ်ပယ်ခံလိုက်ရပါတယ်။

အဖွဲ့လိုက်ကစားရတဲ့ တာလတ် လမ်းကြောင်းရှာပြိုင်ပွဲ (orienteering competition) မှာ တရုတ်စစ်တပ်ကိုယ်စားပြု အမျိုးသမီးအသင်းဟာ ပထမ၊ ဒုတိယနဲ့ စတုတ္ထနေရာတွေ ရရှိခဲ့ပြီး၊ အမျိုးသားအသင်းက ဒုတိယနေရာ ရရှိခဲ့တာပါ။

ဒါပေမယ့် ပြိုင်ပွဲကို လာရောက်ကြည့်ရှုသူ တရုတ်ပရိတ်သတ်တွေဟာ တရုတ်အသင်း အနိုင်ရအောင် နေရာတွေမှတ်ပေးတာ၊ ဖြတ်လမ်းရှာပေးတာတွေ လုပ်ဆောင်ခဲ့တာကြောင့် ရုရှားနဲ့ ပြင်သစ်တို့အပါအဝင် ဥရောပနိုင်ငံ ၆ နိုင်ငံက နိုင်ငံတကာ လမ်းကြောင်းရှာအားကစားအဖွဲ့ချုပ် (IOF) ကို တိုင်ကြားခဲ့ပါတယ်။

IOF က ထုတ်ပြန်တဲ့ကြေငြာချက်မှာတော့ သူတို့အနေနဲ့ တရုတ်အသင်းကို ထိထိရောက်ရောက် အရေးယူခဲ့ပြီး အောက်တိုဘာ ၂၅ ရက်နေ့ကနေစတင်ကာ ကွမ်ကျိုးမြို့မှာကျင်းပမယ့် ကမ္ဘာ့ဖလားဗိုလ်လုပွဲမှာ မျှမျှတတ ယှဉ်ပြိုင်နိုင်ရေး အာမခံချက် ပေးနိုင်မလားဆိုတာကို စုံစမ်းစစ်ဆေးသွားမယ်လို့ ဖော်ပြထားပါတယ်။

ဒါ့အပြင် တာဝေးလမ်းကြောင်းရှာပြိုင်ပွဲမှာ တရုတ်အသင်း ဝင်ရောက်ယှဉ်ပြိုင်ခွင့်ကိုလည်း IOF က ပိတ်ပင်ခဲ့ပါတယ်။

၁၉၉၅ ခုနှစ်က ရောမမြို့မှာ ပထမဆုံးကျင်းပခဲ့တဲ့ Military World Games ကို အိုလံပစ်ပြိုင်ပွဲလိုပဲ ၄ နှစ်တစ်ကြိမ် ကျင်းပတာ ဖြစ်ပါတယ်။ အခုတစ်ကြိမ်ဟာ တရုတ်နိုင်ငံက အိမ်ရှင်အဖြစ် ပထမဆုံး လက်ခံကျင်းပတာပါ။

ဒီပြိုင်ပွဲကို နိုင်ငံပေါင်း ၁၀၉ နိုင်ငံက အားကစားသမား ၉၀၀၀ ကျော် ဝင်ရောက်ယှဉ်ပြိုင်ကြပြီး ရေးကူး၊ လေထီးခုန်၊ လမ်းကြောင်းရှာ၊ နပန်း စတဲ့ အားကစားနည်းတွေ ပါဝင်ပါတယ်။ လက်ရှိမှာတော့ ဆုတံဆိပ်ရရှိမှုဇယားမှာ တရုတ်က ဦးဆောင်နေပြီး ဒုတိယနေရာမှာ ရုရှားက ရှိနေပါတယ်။

Ref: CNN