ဇန်နဝါရီ ၉၊ ၂၀၂၀
M-Media
-၂၀၁၉ ခုနှစ်အတွက် အာဖရိက အကောင်းဆုံး ဘောလုံးသမားဆုကို လီဗာပူးလ်အသင်းရဲ့ ဆီနီဂေါတိုက်စစ်မှူး ဆာဒီယို မာနေးက ရရှိသွားပါတယ်။
မာနေးဟာ လီဗာပူးလ်က အသင်းဖော် အီဂျစ်တိုက်စစ်မှူး မိုဟာမက် ဆာလာဟ်၊ မန်စီးတီးအသင်းရဲ့ အလ်ဂျီးရီးယားတိုက်စစ်မှူး ရီယာ့ဒ် မဟ်ရဇ်တို့ကို ကျော်ဖြတ်ကာ အာဖရိကအကောင်းဆုံး ကစားသမားအဖြစ် ပထမဆုံး ရွေးချယ်ခံခဲ့ရတာ ဖြစ်ပါတယ်။
၂၀၁၇၊ ၂၀၁၈ ခုနှစ်တွေတုန်းက အသင်းဖော် အီဂျစ်တိုက်စစ်မှူး ဆာလာဟ်ရဲ့နောက် ဒုတိယနေရာနဲ့သာ ကျေနပ်ခဲ့ရတာပါ။
“ဒီဆုကို ရရှိတဲ့အတွက် ပျော်ရွှင်မိသလို၊ ဂုဏ်လည်းယူပါတယ်။ ဘောလုံးဆိုတာ ကျွန်တော့်အလုပ်ဖြစ်ပြီး အဲဒီအလုပ်ကို ကျွန်တော် ချစ်ပါတယ်” လို့ အီဂျစ်နိုင်ငံ ဟူရ်ဂါဒါမြို့မှာ အင်္ဂါနေ့က ပြုလုပ်တဲ့ ဆုပေးပွဲအခမ်းအနားမှာ မာနေးက ပြောကြားခဲ့ပါတယ်။
မာနေးဟာ အာဖရိက အကောင်းဆုံးကစားသမားဆုကို ရရှိတဲ့ ဒုတိယမြောက် ဆီနီဂေါ ကစားသမားဖြစ်ပါတယ်။ ၂၀၀၁ နဲ့ ၂၀၀၂ ခုနှစ်မှာ ဆီနီဂေါတိုက်စစ်မှူး အလ် ဟာဂျီ ဒီအော့ဖ်က ဒီဆုကို ဆွတ်ခူးခဲ့ဖူးပါတယ်။
ချန်ပီယံလိဂ်ချန်ပီယံ လီဗာပူးလ်အသင်းမှာ အဓိကကျတဲ့ အခန်းကဏ္ဍကနေ ပါဝင်ခဲ့တဲ့ မာနေးဟာ ၂၀၁၉ ခုနှစ် အာဖရိကဖလားပြိုင်ပွဲမှာ ဆီနီဂေါအသင်းကို နောက်ဆုံးဗိုလ်လုပွဲအထိ တက်ရောက်နိုင်အောင် စွမ်းဆောင်ပေးနိုင်ခဲ့သူလည်း ဖြစ်ပါတယ်။
ပြီခဲ့တဲ့ ဘောလုံးရာသီမှာ မာနေးဟာ လီဗာပူးလ်အတွက် ပွဲ ၅၀ ကစားပြီး ၂၆ ဂိုး သွင်းယူပေးခဲ့သလို၊ ပရီးမီးယားလိဂ်မှာ ၂၂ ဂိုးသွင်းယူနိုင်ခဲ့တာကြောင့် ဆာလာဟ်၊ အာဆင်နယ်တိုက်စစ်မှူး အူဘာမေယန်တို့နဲ့အတူ ရွှေဖိနပ်ဆု ရရှိခဲ့ပါတယ်။
Ref: CNN