ဇူလိုင် ၃၁၊ ၂၀၂၁
M-Media
-ပုံပြောင်းကိုဗစ်ဗိုင်းရပ်စ်ဖြစ်တဲ့ Delta ဟာ ကျောက်ရောဂါလို ကူးစက်ပြန့်နှံ့လွယ်ကာ ဆိုးရွားတဲ့ ကျန်းမာရေးပြဿနာကို ဖြစ်စေနိုင်တဲ့အတွက် ရှေ့ဆက် သတိထားကြဖို့ အမေရိကန် ကူးစက်ရောဂါတားဆီးရေးဌာန (CDC) က သတိပေးလိုက်ပါတယ်။
Delta ပုံပြောင်းကိုဗစ်ဟာ ကမ္ဘာတစ်ဝှမ်းမှာ မြန်မြန်ဆန်ဆန် ပြန့်နှံ့နေပြီး အာရှက တစ်ချို့နိုင်ငံတွေမှာဆိုရင် ကျန်းမာရေးစနစ် ပြိုလဲတဲ့အထိ ဆိုးရွားနေတာဖြစ်ပါတယ်။ အမေရိကန်သမ္မတ ဂျိုးဘိုင်ဒန်က Delta ဗိုင်းရပ်စ် ပြန့်နှံ့မှုကို တားဆီးဖို့အတွက် တားမြစ်ကန့်သတ်ချက်တွေ ပိုမိုတင်းကြပ်သွားမယ်လို့ လတ်တလောမှာ ပြောကြားထားပါတယ်။
ကိုဗစ်ဗိုင်းရပ်စ် စတင်ပေါက်ဖွားရာ တရုတ်နိုင်ငံမှာလည်း ပြီးခဲ့တဲ့ရက်ပိုင်းကစလို့ ပုံပြောင်းကိုဗစ် Delta ပြန့်နှံ့မှုကို ကြုံတွေ့နေရပါတယ်။
အမေရိကန် ကူးစက်ရောဂါ တားဆီးထိန်းချုပ်ရေးဌာန (CDC) ရဲ့ ထုတ်ပြန်ချက်မှာတော့ ကိုဗစ်ကာကွယ်ဆေးတွေဟာ ကိုဗစ်ကြောင့် ကျန်းမာရေး ဆိုးဆိုးရွားရွားထိခိုက်တာ၊ ဆေးရုံတင်ရတာ၊ သေဆုံးတာတွေကို ထိထိရောက်ရောက် တားဆီးနိုင်တယ်လို့ ဖော်ပြထားပါတယ်။
ဒါပေမယ့် Delta ဟာ MERS၊ SARS၊ အီဘိုလာ၊ သာမန်အဖျား၊ ရာသီတုပ်ကွေးနဲ့ ကျောက်ရောဂါတို့ထက် ပိုမိုပြန့်နှံ့လွယ်ပြီး၊ ကူးစက်ရောစစ်ပွဲ တစ်မျိုးပြောင်းသွားတာကို လက်ခံကာ အရေးပေါ်အခြေအနေ နောက်တစ်ဆင့်ကို ပြင်ဆင်ထားဖို့လည်း ပညာရှင်တွေက အဲဒီထုတ်ပြန်ချက်မှာ တိုက်တွန်းထားပါတယ်။
Ref: Aljazeera