နိုဝင်ဘာ ၃၊ ၂၀၂၁
M-Media
-မြန်မာနိုင်ငံဆိုင်ရာ အာဆီယံကိုယ်စားလှယ် အရီဝမ် ယူစွဖ်က ဒေါ်အောင်ဆန်းစုကြည်နဲ့ တွေ့ခွင့်တောင်းဆိုမှုကို လက်ခံမှာ မဟုတ်ဘူးလို့ အာဏာသိမ်းစစ်ကောင်စီရဲ့ ဒုတိယအကြီးအကဲ ဒုတိယဗိုလ်ချုပ်မှူးကြီး စိုးဝင်းက အာဆီယံအစည်းအဝေးတစ်ခုမှာ ပြောလိုက်ပါတယ်။
ဒီကနေ့ပြုလုပ်တဲ့ အာဆီယံ စာရင်းစစ်ချုပ်ရုံးများအဖွဲ့ရဲ့ ၆ ကြိမ်မြောက်အစည်းအဝေးမှာ ဗိုလ်ချုပ်မှူးကြီးစိုးဝင်းဟာ အထူးဧည့်သည်တော်အနေနဲ့ မိန့်ခွန်းပြောခွင့် ရခဲ့တာပါ။
ရာဇဝတ်မှုတွေနဲ့ တရားစွဲခံထားရသူတစ်ဦးကို နိုင်ငံခြားသားတစ်ယောက်နဲ့ တွေ့ခွင့်ပေးဖို့ဟာ တည်ဆဲဥပဒေနဲ့ ဆန့်ကျင်နေတယ်လို့လည်း မိန့်ခွန်းမှာ ဒုတိယစစ်ခေါင်းဆောင်က ထည့်သွင်းပြောဆိုခဲ့ပါတယ်။
“ဘယ်နိုင်ငံကမှ တည်ဆဲဥပဒေကိုကျော်ပြီး ခွင့်ပြုလိမ့်မယ်လို့ ကျွန်တော် မထင်ပါဘူး”
ဧပြီလ အာဆီယံထိပ်သီးအစည်းအဝေးမှာ အာဆီယံကိုယ်စားလှယ်တစ်ဦး မြန်မာနိုင်ငံကို လာရောက်ကာ နိုင်ငံရေးအသိုင်းအ၀ိုင်းက သက်ဆိုင်သူတွေနဲ့ တွေ့ဆုံဆွေးနွေးဖို့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က သဘောတူခဲ့တာ ဖြစ်ပါတယ်။
ဒါပေမယ့် အထူးကိုယ်စားလှယ် အရီဝမ်ယူစွဖ်က မြန်မာနိုင်ငံကို လာရောက်ပြီး ဒေါ်အောင်ဆန်းစုကြည်အပါအဝင် သက်ဆိုင်သူတွေနဲ့တွေ့ဆုံဖို့ သူ့ရဲ့တောင်းဆိုမှုကို စစ်ကောင်စီက လက်မခံဘူးလို့ အစောပိုင်းမှာ ထုတ်ပြောထားပါတယ်။
အခုတော့ အာဏာသိမ်း ဒုတိယစစ်ခေါင်းဆောင်က လူသိရှင်ကြား သူတို့ရဲ့ သဘောထားကို ထုတ်ပြောလိုက်တာပါ။
အောက်တိုဘာနှောင်းပိုင်းမှာလုပ်တဲ့ ထိပ်သီးအစည်းအဝေးမှာ စစ်ခေါင်းဆောင်ကို မဖိတ်တာဟာ အာဆီယံ စည်းမျဉ်းစည်းကမ်းတွေနဲ့ ဆန့်ကျင်နေကြောင်း၊ ထိပ်သီးအစည်းအဝေးမှာ မြန်မာနိုင်ငံနဲ့ပတ်သက်တဲ့ တောင်းဆိုမှုတွေဟာ အာဆီယံရဲ့ စည်းလုံးညီညွတ်မှု ပုံရိပ်ကို ထိခိုက်စေကြောင်း ဗိုလ်ချုပ်မှူးကြီး စိုးဝင်းက ပြောကြားခဲ့သလို၊ ပြင်ပနိုင်ငံတွေရဲ့ သပ်လျှိုသွေးခွဲမှုကို အာဆီယံအဖွဲ့က ခံနေရပြီလို့လည်း ဆိုပါတယ်။
Ref: Reuters