သြဂုတ် ၂၄၊ ၂၀၂၂
M-Media
-အခြေခံဥပဒေက ပြဌာန်းထားတဲ့အတိုင်း တာ၀န်သက်တမ်း ကုန်ဆုံးသွားပြီလားဆိုတာ စစ်ဆေးဖို့အတွက် ထိုင်း အခြေခံဥပဒေခုံရုံးဟာ ၀န်ကြီးချုပ် ပရာယွတ် ချန်အိုချာရဲ့ တာ၀န်ကို ဒီကနေ့မှာ ရပ်ဆိုင်းလိုက်ပါတယ်။
စစ်ခေါင်းဆောင်ဟောင်း ချန်အိုချာဟာ ၂၀၁၄ ခုနှစ်က အာဏာသိမ်းပြီး ထိုင်းနိုင်ငံကို အုပ်ချုပ်လာတာ ဖြစ်ပါတယ်။ သူ့အကြိုက် ရေးထားတဲ့ အခြေခံဥပဒေကို ၂၀၁၇ ခုနှစ်မှာ ပြဌာန်းပြီး ၂၀၁၉ ခုနှစ်မှာ ရွေးကောက်ပွဲလုပ်ကာ ၀န်ကြီးချုပ်အဖြစ် ဆောင်ရွက်နေတာပါ။
သူ့ကို ဆန့်ကျင်သူတွေက ပရာယွတ်ဟာ ၂၀၁၄ ခုနှစ်မှာ အာဏာသိမ်းလိုက်တဲ့အတွက် ၂၀၁၇ ခုနှစ် အခြေခံဥပဒေအရ ၀န်ကြီးချုပ်သက်တမ်း ၈ နှစ်ပြည့်ပြီလို့ ထောက်ပြပါတယ်။
ပရာယွတ် ရာထူးကနေ ဆင်းပေးဖို့အတွက် ပြည်သူတွေဟာ ဘန်ကောင်မြို့မှာ မနေ့ကစတင်ပြီး ဆန္ဒပြခဲ့ကြပါတယ်။
အဓိက အတိုက်အခံပါတီက ပရာယွတ် ရာထူးကနှုတ်ထွက်ရေး ဆုံးဖြတ်ပေးဖို့ အခြေခံဥပဒေခုံရုံးကို စာတင်ခဲ့ပြီးတဲ့နောက် အခုလို တာ၀န်ရပ်ဆိုင်းဖို့ ညွှန်ကြားချက် ထွက်လာတာပါ။
ပရာယွတ်ဟာ ဒီကိစ္စကို ခုံရုံးမှာ ပြန်လည်ဖြေရှင်းဖို့ ၁၅ ရက် အချိန်ရမှာ ဖြစ်ပါတယ်။ အခြေခံဥပဒေခုံရုံးက ၀န်ကြီးချုပ်ရဲ့သက်တမ်း ၈ နှစ် ပြည့်ခြင်း ရှိ၊ မရှိ ဆုံးဖြတ်မှာဖြစ်ပြီး အမိန့်ချမယ့်ရက်ကိုတော့ မသိရသေးပါဘူး။
အရင်က လွှတ်တော်အတွင်း အယုံအကြည်မရှိအဆိုတင်သွင်းကာ အတိုက်အခံတွေက ဖြုတ်ချဖို့ ကြိုးစားမှုကို ပရာယွတ်ဟာ အနည်းဆုံး ၂ ကြိမ်လောက် ကျော်ဖြတ်ခဲ့ဖူးပါတယ်။
Ref: CNA