News @ M-Media

တရုတ်ခရီးသွားများအား ကန့်သတ်မှု ကမ္ဘာကြီးက တိုးမြှင့်လုပ်ဆောင်လာ

ဇန်န၀ါရီ ၁၊ ၂၀၂၃

M-Media 


-ကိုဗစ်အကြီးအကျယ် ကူးစက်နေတဲ့ တရုတ်နိုင်ငံက ခရီးသွားတွေကို ပြည်၀င်ခွင့် တင်းကြပ်တဲ့ နိုင်ငံပေါင်းဟာ ကမ္ဘာတစ်၀ှမ်းမှာ ဒါဇင်နဲ့ချီ ရှိလာပါတယ်။ 

တရုတ်နိုင်ငံတစ်၀ှမ်းမှာ နို၀င်ဘာလကတည်းကစတင်ပြီး ကိုဗစ် ပြန်လည် ကူးစက်ပြန့်နှံ့နေတာဖြစ်ပြီး ဆေးရုံတွေမှာ လူနာတွေ ပြည့်ကြပ်နေသလို မီးသင်္ဂြိုဟ်စက်တွေမှာလည်း တန်းစီနေရတယ်လို့ ဒေသတွင်း သတင်းတွေက ဖော်ပြပါတယ်။ 

တရုတ်အစိုးရက နိုင်ငံသားတွေ ပြည်ပခရီးသွားခွင့်ကို ဖြေလျော့လိုက်ပြီး ဇန်န၀ါရီနှောင်းပိုင်း တရုတ်နှစ်ကူးမှာ တရုတ်ခရီးသွားတွေ အစုလိုက်အပြုံလိုက် ထွက်လာဖို့ ရှိတဲ့အချိန် နိုင်ငံတကာကတော့ ကန့်သတ်မှုတွေ လုပ်ဆောင်ပါတယ်။ 

ယူကေ၊ အမေရိကန်၊ ပြင်သစ် အီတလီ၊ ဂျပန်၊ တောင်ကိုရီးယားတို့ အပါအ၀င် နိုင်ငံပေါင်း တစ်ဒါဇင်ကျော်လောက်က တရုတ်၊ ဟောင်ကောင်နဲ့ မကာအိုက ခရီးသွားတွေ လာရောက်ရင် ကိုဗစ်ကင်းရှင်းကြောင်းလက်မှတ် ပြသမှ ပြည်၀င်ခွင့်ပေးမယ်လို့ ထုတ်ပြန်ထားပါတယ်။ 

သြစတေးလျနဲ့ ကနေဒါအစိုးရတို့က တရုတ်အစိုးရဟာ အချက်အလက်တွေကို ပွင့်လင်းမြင်သာမှုရှိစွာ မထုတ်ပြန်တဲ့အတွက် ကိုဗစ်ထိန်းချုပ်ဖို့ အခက်တွေ့ရတယ်လို့ ပြောပါတယ်။ 

မော်ရိုကိုနိုင်ငံကတော့ တရုတ်ခရီးသွားအားလုံးကို ပြည်၀င်ခွင့်ပိတ်ပင်ကြောင်း မနေ့က ကြေငြာခဲ့ပါတယ်။ 

ကိုဗစ်ကူးစက်မှု၊ ပုံပြောင်းပိုးအသစ်အကြောင်းတွေကို တရုတ်က တိတိကျကျ မထုတ်ပြန်တဲ့အတွက် နိုင်ငံတကာအသိုင်းအ၀ိုင်းက ကြိုတင်ကာကွယ်တားဆီးမှုလုပ်ငန်းစဥ်တွေ လိုအပ်လိမ့်မယ်လို့ ကမ္ဘာ့ကျန်းမာရေးအဖွဲ့ WHO က ထုတ်ပြန်ထားပါတယ်။

Ref: Reuters