ဖေဖော်၀ါရီ ၁၃၊ ၂၀၂၃
M-Media
-နိုင်ငံရဲ့ ပထမဆုံး အမျိုးသမီး အာကာသယာဥ်မှုးကို နိုင်ငံတကာအာကာသစခန်း (ISS) ကို စေလွှတ်ဖို့ ဆော်ဒီအာရေဗျက စီစဥ်နေပါတယ်။
ရေယာနား ဘာရ်နာ၀ီဖြစ်ပြီး အခြား ဆော်ဒီအာကာသယာဥ်မှူး အလီ အလ်ကာရ်နီနဲ့အတူ ၂၀၂၃ ခုနှစ် နှစ်လည်လောက်မှာ ISS ကို သွားရမှာ ဖြစ်ပါတယ်။
နိုင်ငံတကာ အာကာသစခန်းကို တစ်နိုင်ငံတည်းက အာကာသယာဥ်မှူးနှစ်ဦး သွားယောက်ခွင့်ရတဲ့ နိုင်ငံအနည်းငယ်စာရင်းမှာ ပါ၀င်ခွင့်ရမှာကြောင့် ဒီခရီးစဥ်ဟာ ဆော်ဒီအာရေဗျအတွက် သမိုင်း၀င်မယ့် ခရီးစဥ်လည်း ဖြစ်ပါတယ်။
ဒီခရီးစဥ်ဟာ နိုင်ငံအတွင်းက လူ့စွမ်းအားအရင်းအမြစ်တွေကို စွမ်းဆောင်ရည် မြှင့်တင်ပေးကာ အာကာသလုပ်ငန်းက ရရှိမယ့် အခွင့်အလမ်းတွေကနေ လူသားထုကို အလုပ်အကျွေးပြုနိုင်ရေး ဆော်ဒီအာရေဗျရဲ့ စီမံကိန်းခြေလှမ်းတစ်ခုဖြစ်တယ်လို့ နိုင်ငံပိုင်သတင်းဌာန Saudi Press Agency က ဖော်ပြပါတယ်။
ဆော်ဒီအာကာသကော်မရှင် (SSC) မှာ အာကာသယာဥ်မှူးတွေကို လေ့ကျင့်ပေးတဲ့ Saudi Human Spaceflight စီမံကိန်းရှိပြီး အမေရိကန်အာကာသကုမ္ပဏီ Axiom Space နဲ့ ပူးပေါင်းဆောင်ရွက်တာဖြစ်ပါတယ်။
ရေယာနားနဲ့ အလ်ကာရ်နီတို့ဟာ ဒီစီမံကိန်းကနေ မွေးထုတ်ပေးလိုက်တဲ့ သူတွေပါ။ အလီ အလ်ဂမ်ဒီနဲ့ မရ်ယမ် ဖစ်ရ်ဒေါက်စ်ဆိုတဲ့ နောက်ထပ် အာကာသယာဥ်မှူးနှစ်ကိုလည်း လေ့ကျင့်သင်ကြားပေးနေပြီး နောက်ပိုင်းမှာ သူတို့နှစ်ဦးကို အာကာသခရီးစဥ်တွေ စေလွှတ်ဖို့ ရှိနေပါတယ်။
SSC ဟာ ကိုယ်ပိုင် အာကာသ သုတေသနလုပ်ငန်း၊ အလားအလာရှိတဲ့ လူငယ်တွေကို ပြုစုပျိုးထောင်ပေးတဲ့ စီမံကိန်း စတာတွေကိုလည်း လုပ်ဆောင်နေပါတယ်။
ဆော်ဒီ တော်၀င်မင်းသားဖြစ်ပြီး SSC ရဲ့ ပထမဆုံး ဥက္ကဌလည်းဖြစ်တဲ့ ဆူလ်တန် ဘင် ဆလ်မာန်ဟာ ၁၉၈၅ ခုနှစ် ဇွန်လ ၁၇ ရက်နေ့က STS-51-G Space Shuttle အာကာသယာဥ်ရဲ့ အဖွဲ့၀င်တစ်ဦးအဖြစ် အာကာသကို လိုက်ပါခဲ့ဖူးပါတယ်။
အဲဒီခရီးစဥ်ကြောင့် ဆူလ်တန်ဟာ အာကာသခရီးစဥ် သွားဖူးတဲ့ ပထမဆုံး အာရပ်လူမျိုး၊ ပထမဆုံး အစ္စလာမ်ဘာသာ၀င်၊ ပထမဆုံး တော်၀င်မိသားစု၀င်အဖြစ် မှတ်တမ်း၀င်ခဲ့ပါတယ်။
Ref: Arab News
(ဓာတ်ပုံ – ၀ဲမှ ယာ – မရ်ယမ် ဖစ်ရ်ဒေါက်စ်၊ ရေယာနား ဘာရ်နာ၀ီ၊ အလီ အလ်ကာရ်နီ၊ အလီ အလ်ဂမ်ဒီ)