News @ M-Media

မြန်မာ့အနာဂတ် မကောင်းလာနိုင်သေးဟု စင်ကာပူပြော

ဖေဖော်၀ါရီ ၂၈၊ ၂၀၂၃

M-Media 


-မြန်မာနိုင်ငံဟာ ဒုတိယကမ္ဘာစစ်ပြီးကတည်းက ညီညွတ်တဲ့ အမှတ်သညာတစ်ခု မတည်ဆောက်နိုင်ခဲ့ဘဲ လက်ရှိအနေအထားအရလည်း ပိုကောင်းလာနိုင်ဖို့ မရှိဘူးလို့ စင်ကာပူ နိုင်ငံခြားရေး၀န်ကြီး ဗီဗီယံက ဘာလာကရစ်ရှ်နန်က ပြောကြားလိုက်ပါတယ်။ 

မနေ့က နိုင်ငံခြားရေး၀န်ကြီးဌာနရဲ့ ဘက်ဂျက်နဲ့ပတ်သက်ပြီး ဆွေးနွေးမှုအတွင်း ဒီလိုမှတ်ချက်မျိုး ထွက်ပေါ်လာတာပါ။ 

၂၀၂၁ ခုနှစ် စစ်တပ်ရဲ့အာဏာသိမ်းမှုကို အာဆီယံနိုင်ငံတွေက ကန့်ကွက်ခဲ့ကြပေမယ့်လည်း ဒီအချက်က မြန်မာ့ပြည်တွင်းရေးကို အဖွဲ့၀င်နိုင်ငံတွေက ၀င်စွက်ဖို့ ခွင့်ပြုချက်ပေးတာမျိုးမဟုတ်ဘူးလို့လည်း စင်ကာပူ နိုင်ငံခြားရေး၀န်ကြီးက ဆိုပါတယ်။ 

ဒုတိယကမ္ဘာစစ်ပြီးကတည်းက မြန်မာနိုင်ငံမှာ လူမျိုးစုံ၊ ဘာသာစုံ ညီညွတ်တဲ့ အမှတ်သညာတစ်ခု မတည်ဆောက်နိုင်ခဲ့သလို၊ စစ်အာဏာရှင်လက်အောက်မှာ မြန်မာနိုင်ငံရဲ့ လက်ရှိအခြေအနေဟာ ထွက်ပေါက်မရှိတဲ့ အနေအထားဆီ ဦးတည်သွားပြီလို့လည်း သူက ထည့်သွင်းပြောဆိုခဲ့ပါတယ်။ 

“အာဏာသိမ်းမှုဟာ ၂ နှစ်ကြာလာပြီး ဘာအကျိုးမှလည်း မရှိပါဘူး။ ကျွန်တော့်သဘောထားကိုပြောရရင် နောက်ပြန်လှည့်မရတဲ့လမ်းကို ရောက်နေပြီ။ အမျိုးသားရင်ကြားစေ့ရေးကို ဘယ်လိုမှလုပ်လို့မရတဲ့ လမ်းမျိုးပါ”

အခြား အာဆီယံနိုင်ငံတွေလိုပဲ စင်ကာပူကလည်း အဖွဲ့၀င်နိုင်ငံတစ်ခုရဲ့ ပြည်တွင်းရေးကို ၀င်ရောက်စွက်ဖက်တာမျိုး လုပ်မှာမဟုတ်ဘဲ ပြည်တွင်းကသက်ဆိုင်သူတွေဟာ ပြည်သူတွေရဲ့အနာဂတ်ကိုရှေ့ရှုပြီး ရိုးရိုးသားသားနဲ့ ဆွေးနွေးဖြေရှင်းမှသာ ပြေလည်နိုင်လိမ့်မယ်လို့ ယုံကြည်ကြောင်း ဗီဗီယံက မှတ်ချက်ပေးခဲ့ပါတယ်။ 

Ref: South China Morning Post