News @ M-Media

ဒုက္ခသည်ဆန့်ကျင်ရေး တိုက်ခိုက်မှုတွင် ပါ၀င်သူ လက်ယာစွန်းရောက်တစ်ဦးကို ယူကေက ထောင် ၉ နှစ်ချ

စက်တင်ဘာ ၇၊ ၂၀၂၄
M-Media

(ဓာတ်ပုံ – တိုက်ခိုက်မှု မြင်ကွင်းတစ်ခု)

-ဒုက္ခသည်တွေနေထိုင်တဲ့ ဟိုတယ်တစ်ခုရှေ့ မီးရှို့မှုမှာ ပါ၀င်တဲ့ လက်ယာစွန်းရောက် လူဖြူအမျိုးသား သောမတ်စ်ဘာလေကို ဗြိတိန်က ထောင်ဒဏ် ၉ နှစ် ချမှတ်လိုက်ပါတယ်။

သြဂုတ်လအတွင်း အင်္ဂလန်မှာ လက်ယာစွန်းရောက်တွေရဲ့ အကြမ်းဖက်ဆန္ဒပြမှုတွေ၊ ဒုက္ခသည်တွေကို ပစ်မှတ်ထားတဲ့ တိုက်ခိုက်ဖို့ ကြိုးပမ်းမှုတွေ အကြီးအကျယ်ဖြစ်ပေါ်ခဲ့ပါတယ်။ ဇူလိုင်လ ၂၉ ရက်နေ့ အင်္ဂလန်မြောက်ပိုင်းမှာ မိန်းကလေးငယ် ၃ ဦး အသတ်ခံခဲ့ရပြီး ဒီအမှုကို လူမျိုးခြား၊ ဘာသာခြားတွေက ကျူးလွန်တယ်ဆိုတဲ့ သတင်းမှား ထွက်လာပြီးနောက်ပိုင်း လူဖြူအစွန်းရောက်တွေ ထကြွလာတာ ဖြစ်ပါတယ်။

မြောက်ပိုင်း ရိုတာဟန်မြို့က ဒုက္ခသည် ၂၀၀ လောက် ခိုလှုံနေတဲ့ Holiday Inn Express ဟိုတယ်ကို သြဂုတ်လ ၄ ရက်နေ့မှာ လူ ၄၀၀ လောက်ပါ၀င်တဲ့ အုပ်စုက ၀င်ရောက်တိုက်ခိုက်ဖို့ ကြိုးစားမှုဟာ ထင်ရှားပါတယ်။

ဒီအဖြစ်အပျက်အတွက် သောမတ်စ်ဘာလေက ပထမဆုံး အရေးယူခံရသူ ဖြစ်လာပါတယ်။ လူအုပ်ကြီးဟာ ဟိုတယ်ကို တိုက်ခိုက်မီးရှို့ဖို့ ကြိုးစားခဲ့သလို၊ လူမျိုးရေးခွဲခြားစော်ကားတဲ့ အသုံးအနှုန်းတွေနဲ့ အော်ဟစ်ဆဲဆိုခဲ့ပါတယ်။

ဒုက္ခသည်တွေ ထွက်မရအောင် ဟိုတယ်ရှေ့၀င်ပေါက်မှာ မီးပုံရှို့ထားခဲ့ကြပြီး၊ ၁၂ နာရီကြာတဲ့ ဒီအကြမ်းဖက်မှုကို ရဲတပ်ဖွဲ့က ခက်ခက်ခဲခဲ ထိန်းသိမ်း လူစုခွဲခဲ့ရပါတယ်။ အဖြစ်အပျက်အတွင်း ရဲတပ်ဖွဲ့၀င် ၆၄ ဦး၊ မြင်း ၃ ကောင်နဲ့၊ ရဲခွေးတစ်ကောင် ဒဏ်ရာရခဲ့ပါတယ်။

သောမတ်စ်ဘာလေဟာ မီးရှို့မှုအပါအ၀င် တိုက်ခိုက်မှုအားလုံးမှာ ပါ၀င်ပတ်သက်ကြောင်း တရားရုံးက စစ်ဆေးတွေ့ရှိခဲ့ပါတယ်။

Ref: Reuters