Author: M-Media

DVB သတင်းထောက် ကိုဇော်ဖေအား ထောင်ဒဏ် ချမှတ်မှုနှင့် ပတ်သက်၍ DVB မှသတင်းထုတ်ပြန်

ဧပြီ ၉၊ ၂၀၁၄
M-Media
လမင်း

ရန်ကုန်။ ။ မကွေးမြို့နယ် ပညာရေးဌာနက တရားလိုပြုကာ DVB သတင်းထောက်ကိုဇော်ဖေ(ကိုသူရသက်တင်)နှင့် ကျောင်းသားမိဘ ကိုဝင်းမြင့်လှိုင်ကို ၀တ္တရားနှောင့်ယှက်မှု၊ ပိုင်နက် ကျူးလွန်မှု ပုဒ်မ-၃၅၃၊ ၄၄၈ တို့နှင့် ၂၀၁၂ ခုနှစ်ကတရားစွဲခဲ့ပြီး ၂၀၁၄ ဧပြီလ ၇ ရက်နေ့တွင် ထောင်ဒဏ် ၁ နှစ်ချမှတ်ခဲ့သည်။ အဆိုပါကိစ္စနှင့် ပတ်သက်ပြီး မိခင်သတင်းဌာန DVB က အောက်ပါအတိုင်း သတင်းထုတ်ပြန်ခဲ့ပါသည်။

* သတင်းထောက် ကိုဇော်ဖေ (သူရသက်တင်)သည် အများပြည်သူသိလိုသော ပညာသင်ဆုဆိုင်ရာ သတင်းကို မြို့နယ်ပညာရေးဌာနမှတဆင့် ရယူခဲ့ခြင်းမှာ သတင်းထောက် တယောက်၏ အလုပ်ကို တာဝန်သိသိ လုပ်ကိုင်ဆောင်ရွက်ခဲ့ခြင်း သာ ဖြစ်ကြောင်း DVB သတင်းဌာနက ယုံကြည်ပါသည်။

* ထိုကြောင့် သတင်းထောက် ကိုဇော်ဖေ (သူရသက်တင်) အား ပြစ်ဒဏ်ချမှတ်မှုကိုDVB သတင်းဌာနအနေနှင့် လုံးဝ ကန့်ကွက်ရှုတ်ချပါသည်။

* မြန်မာနိုင်ငံတွင် စာနယ်ဇင်းလွတ်လပ်ခွင့်ဆိုင်ရာ ပြုပြင်ပြောင်းလဲရေးကို လုပ်ဆောင်နေသည်ဟု တာဝန်ရှိသူများက ပြောဆိုနေချိန်တွင် ယခုကဲ့သို့ သတင်းထောက် ကိုဇော်ဖေ (သူရသက်တင်) အား ထောင်ဒဏ်ချမှတ်ခြင်းသည် စာနယ်ဇင်းနှင့် သတင်းလွတ်လပ်ခွင့်ကို ပိတ်ပင် တားမြစ်ခြင်းဟု DVB သတင်းဌာနက ယုံကြည်သည်။

* DVB သတင်းထောက် ကိုဇော်ဖေ (သူရသက်တင်) နှင့် အမှုတွဲ ကိုဝင်းမြင့်လှိုင်တို့အား ခြွင်းချက်မရှိ ပြန်လည်လွှတ်ပေးရန် တောင်းဆိုသည်။

သမ္မတဦးသိန်းစိန် အစိုးရတက်လာပြီး စာပေစိစစ်ရေး ဖျက်သိမ်းကာ စာပေလွတ်လပ်ခွင့်ရပြီးနောက်ပိုင်း သတင်းမီဒီယာလောကတွင် Daily Eleven သတင်းဌာနမှ သတင်းထောက်တစ်ဦးဖြစ်သူ မခိုင်သည် အသေရေဖျက်မှု၊ ပိုင်နက်ကျူးလွန်မှု စွဲချက်များဖြင့် ထောင်ဒဏ်သုံးလချမှတ်ခံခဲ့ရပြီး Unity ဂျာနယ်မှ ဂျာနယ်လစ်လေးဦးကိုလည်း ဖမ်းဆီးချူပ်နှောက်ထားပြီး နိုင်ငံတော်လျှိူ့ဝှက် အက်ဥပဒေအရ တရားစွဲဆိုကာ စစ်ဆေးမှုများပြုလုပ်လျှက်ရှိပြီး ထောင်ဒဏ် ၁၄ နှစ်ထိကျခံရဖွယ်ရှိကြောင်း သိရသည်။

April 9, 2014
တရားမ၀င် အိမ်ယာကိစ္စ အစ္စရေးအား တစ်ကမ္ဘာလုံးက သပိတ်မှောက်ရန် ပါလက်စတိုင်း သံတမန်တိုက်တွန်း

ဧပြီ ၉ ၊ ၂၀၁၄
M-Media

– ပါလက်စတိုင်းပိုင်နက်အတွင်း တရားမ၀င်အိမ်ရာ ဆောက်လုပ်မှုများအတွက် တစ်ကမ္ဘာလုံးက အစ္စရေးအား သပိတ်မှောက်ကြရန် ကုလသမဂ္ဂဆိုင်ရာ ပါလက်စတိုင်း သံအမတ်က ပြောကြားလိုက်သည်။

ပါလက်စတိုင်း နိုင်ငံသားများ၏ မပြောင်းလဲသော အခွင့်အရေးအတွက် ကြိုးပမ်းခြင်း ကုလသမဂ္ဂ ကော်မတီက ယမန်နေ့တွင် ပြုလုပ်သော အစည်းအဝေးတွင် ရီယဒ်မန်ဆူရ်က ယခုကဲ့သို့ ပြောကြားခဲ့ခြင်းဖြစ်သည်သည်။ ထိုကဲ့သို့ တရားမ၀င် အိမ်ယာများကြောင့် အစ္စရေးဘဏ်များနှင့် ပူးပေါင်းဆောင်ရွက်မှုများ ရပ်တန့်ခဲ့သည့် နယ်သာလန် ဘဏ်ငါးခုကို ရည်ညွှန်းခဲ့ပြီး၊ ဥရောပနှင့် တောင်အာဖရိကတို့ကလည်း အစ္စရေးလုပ်ငန်းများ အပေါ် သပိတ်မှောက်မှုများ ရှိသောကြောင့် အခြားနိုင်ငံများကလည်း ထိုနိုင်ငံများ၏ အပြုအမူ နောက်သို့လိုက်ရန် မန်ဆူရ်က တိုက်တွန်းခဲ့သည်။

ပါလက်စတိုင်းပိုင်နက်အတွင်း တရားမ၀င် အိမ်ယာများ ဆောက်လုပ်ခြင်းတွင် ပါဝင်နေသည့် လုပ်ငန်းများနှင့် ပူးပေါင်းဆောင်ရွက်နေသော ဥရောပ ကုမ္ပဏီများအား အရေးယူမှုများပြုလုပ်ရန် ဥရောပသမဂ္ဂ နိုင်ငံခြားရေးပေါ်လစီ အကြီးအကဲ ကက်သရင်း အက်ရ်ှတန်က ဥရောပ ပါလီမန်အား မတ်လ ၂၈ ရက်နေ့တွင် တိုက်တွန်းခဲ့သည်။ ထို့ပြင် ပါလီမန်ရှိ လွှတ်တော်အမတ်များကလည်း တရားမ၀င်အိမ်ရာများဆောက်လုပ်ခြင်းအား အကူအညီပေးခြင်းမှာ အစ္စရေး၏ နိုင်ငံတကာ ဥပဒေချိုးဖောက်မှုကို ကူညီခြင်းဖြစ်သည်ဟု ပြောကြားခဲ့သည်။

ပါလက်စတိုင်းပိုင်း အရှေ့ဂျေရုစလင်နှင့် အနောက်ဘက် ကမ်းခြေတို့အား ၁၉၆၇ ခုနှစ်တွင် အစ္စရေးက သိမ်းယူခဲ့ပြီးနောက်ပိုင်း ထိုဒေသများတွင် ဆောက်လုပ်ခဲ့သည့် တရားမ၀င် အိမ်ယာများမှာ ၁၂၀ ခန့်ရှိပြီး၊ ထိုအိမ်ရာများတွင် အစ္စရေးနိုင်ငံသား သန်းဝက်ခန့် နေထိုင်နေကြသည်။ ထို့ပြင် အနောက်ဘက် ကမ်းခြေရှိ အိမ်ယာ ၆ ခုတွင် လူ ၂၀၀၀ ကို ထပ်မံ၍ နေရာချထားပေးရန် အစ္စရေးက စီစဉ်နေသည်။

MR/AS/MHB

April 9, 2014
တာမင်နစ္စတန်ဆိုင်ရာ အီတလီသံအမတ် လူကုန်ကူးသည့် စွပ်စွဲချက်ဖြင့် ဖိလစ်ပိုင်တွင် အဖမ်းခံရ

ဧပြီ ၉ ၊ ၂၀၁၄
M-Media

– ကလေးများအား လူကုန်ကူးမှုနှင့် စော်ကားမှု စွပ်စွဲချက်ဖြင့် ဖိလစ်ပိုင် ကမ်းခြေရောက် တာ့ခ်မင်နစ္စတန်ဆိုင်ရာ အီတလီ သံအမတ်အား ဖိလစ်ပိုင် ရဲတပ်ဖွဲ့ ဖမ်းဆီးလိုက်သည်ဟု သိရသည်။

ကလေးများအခွင့်အရေး ဆောင်ရွက်နေသည့် Bahay Tuluyan အဖွဲ့က ရဲတပ်ဖွဲ့အား တိုင်တန်းခဲ့ပြီးနောက် လာဂူနာပြည်နယ်ရှိ ကမ်းခြေတစ်ခုတွင် သံအမတ် ဒန်နီယဲလ်လီ ဘိုစီယိုအား စနေနေ့က ဖမ်းဆီးခဲ့ခြင်းဖြစ်ပြီး ကလေးသုံးဦးနှင့်အတူ တွေ့ရှိရခြင်းဖြစ်သည်ဟု ဖိလစ်ပိုင် အမျိုးသားရဲတပ်ဖွဲ့က AP သတင်းဌာနသို့ ပြောကြားခဲ့သည်။

အသက် ၄၆ နှစ်အရွယ်ရှိ ဘိုစီယိုမှာ ဖိလစ်ပိုင်နိုင်ငံ၏ ကလေးငယ်များ လူကုန်ကူးမှုဥပဒေနှင့် ကလေးငယ်များအား စော်ကားမှုဥပဒေတို့ကို ချိုးဖောက်သည်ဟု Bahay Tuluyan အဖွဲ့၏ အမှုဆောင်ဒါရိုက်တာ လီလီ ဖလော်ဒီလစ်က ပြောကြားခဲ့သည်။

“သူ(ဘိုစီယို)ဟာ ကလေးတွေနဲ့ ပတ်သက်မှုမရှိဘူးဆိုတာ ထင်ရှားတဲ့အတွက်ကြောင့် ကျွန်တော်တို့ စိုးရိမ်မိပါတယ်။ နောက်ပိုင်းမှာမှ သူဟာ သံတမန်တစ်ယောက်ဖြစ်တယ်ဆိုတာ ကျွန်တော်တို့ သိရတာပါ” ဟု ဖလော်ဒီလစ်က ပြောကြားခဲ့သည်။

ဘိုစီယိုအဖမ်းခံရမှုကို အီတလီနိုင်ငံခြားရေး ၀န်ကြီးဌာနကလည်း အတည်ပြုခဲ့ပြီး၊ ဘိုစီယိုကမူ ထိုစွပ်စွဲချက်အား ငြင်းပယ်ခဲ့ကာ အပျော်သက်သက် အတွက် ကလေးငယ်များက လာရောက်ခြင်းဖြစ်သည်ဟု ဆိုသည်။

April 9, 2014
ယူကရိန်း မတည်ငြိမ်မှု ရုရှားမှ အေးဂျင့်များလွှတ်ကာ ဆောင်ရွက်နေသည်ဟု အမေရိကန်စွပ်စွဲ

ဧပြီ ၉ ၊ ၂၀၁၄
M-Media

– ယူကရိန်းနိုင်ငံ မတည်မငြိမ်ဖြစ်ရန် နိုင်ငံအရှေ့ပိုင်းပြည်နယ်ရှိ မြို့များသို့ ရုရှားမှ အေးဂျင့်များလွှတ်ကာ ဆောင်ရွက်နေကာ ခရိုင်းမီးယားကဲ့သို့ ဖန်တီးနေခြင်းဖြစ်သည်ဟု အမေရိကန် နိုင်ငံခြားရေးဝန်ကြီး ဂျွန်ကယ်ရီက ပြောကြားခဲ့သည်။

အမေရိကန်ကွန်ဂရက်တွင် ယမန်နေ့က ပြောကြားခဲ့ခြင်းဖြစ်ပြီး ယူကရိန်းနိုင်ငံအရှေ့ပိုင်း Donetsk၊ Kharkiv နှင့် Luhansk မြို့များတွင် စစ်ရေးအရ ၀င်ရောက် သိမ်းပိုက်ရန် မူမမှန်သော အကြောင်းပြချက်ဖြင့် မတည်ငြိမ်မှုများဖြစ်အောင် ဖန်တီးနေသည်ဟု ထည့်သွင်းပြောကြားခဲ့သည်။

“လွန်ခဲ့တဲ့ ၄၈ နာရီအတွင်း ကျွန်တော်တို့တွေ့သမျှ အရာ အားလုံးကတော့ ရုရှားက ရန်စသူတွေ၊ အေးဂျင့်တွေဟာ ယူကရိန်းအရှေ့ပိုင်းမှာ ၀င်ရောက် လှုပ်ရှားနေတာပါ။ ပြီးတော့ သူတို့ဟာ အဲဒီဒေသတွေမှာ ဆူပူမှုတွေဖြစ်အောင် လုပ်ဖို့ ပို့ခြင်းခံထားရတယ်လို့ ကျွန်တော်တို့ကို ပြောပါတယ်” ဟု ကယ်ရီကဆိုပြီး၊ လာမည့် သီတင်းပတ်တွင် ထိုကိစ္စအတွက် ရုရှား နိုင်ငံခြားရေး ၀န်ကြီး ဆာဂျီလာဗရော့ဗ်နှင့် တွေ့ဆုံရန်ရှိသည်ဟုလည်း ထည့်သွင်းပြောကြားခဲ့သည်။

ကယ်ရီ၏ အဆိုပါမှတ်ချက် ထွက်ပေါ်လာခဲ့ပြီးနောက် ယူကရိန်းလုံခြုံရေးဌာန SBU က ရုရှား လိုလားသူများမှာ ၎င်းတို့ သိမ်းပိုက်ထားသည့် အစိုးရအဆောက်အအုံများတွင် ဗုံးများထောင်ထားပြီး လူ ၆၀ ကိုလည်း ဓားစာခံ အဖြစ် ဖမ်းဆီးထားသည်ဟု ကြေညာခဲ့သည်။ သို့သော်လည်း Luhansk မြို့ရှိ ရုရှားထောက်ခံသူများက ထိုထုတ်ပြန်ချက်အား ငြင်းဆန်ခဲ့သည်။

Ref: Reuters

April 9, 2014
NGO မှ နိုင်ငံခြား အမျိုးသမီး ဝန်ထမ်း သာသနာအလံကို မဖွယ်မရာ မလုပ်ခဲ့ဟု သတင်းထုတ်ပြန်

ဧပြီ ၉ ၊ ၂၀၁၄
M-Media
ချမ်းငြိမ်းအေး

ရခိုင်ပြည်နယ် စစ်တွေမြို့ရှိ အိုင်အင်န်ဂျီအိုများနှင့် ကုလသမဂ္ဂ အဖွဲ့အစည်းအား မတ်လ ၂၆၊ ၂၇-ရက်များက အကြမ်းဖက် ဖျက်ဆီးခံခဲ့ရမှုများအား စုံစမ်းစစ်ရေးအဖွဲ့၏ တွေ့ရှိချက်များ နှင့် ထပ်မံလုပ်ဆောင်မည့် အစီအစဉ်များနှင့် စပ်လျဉ်း၍ အစိုးရ၏ သတင်း ထုတ်ပြန်ရေး အဖွဲ့မှ သတင်းထုတ်ပြန်ခဲ့သည်။

အဆိုပါ အစီရင်ခံစာတွင် Malteser International အဖွဲ့မှ နိုင်ငံခြားသူမှာ သာသနာအလံကို မဖွယ်မရာ လုပ်ခဲ့ခြင်းမရှိကြောင်း၊ အဖွဲ့အစည်းရဲ့ မူအရသာ အလံကို ဖြုတ်သိမ်းခဲ့ခြင်းဖြစ်ကြောင်း မမှန်မကန် လှုံ့ဆော်သူများကြောင့် နိုင်ငံတကာ အဖွဲ့အစည်းများကို ဒေသခံများ အထင်အမြင် လွဲမှားမှုများ မြင့်တတ်လာခြင်းဖြစ်ကြောင်း၊ ဒေသခံ တိုင်းရင်းသားအချို့၏ ဖျက်ဆီးမှုကြောင့် ကုလသမဂ္ဂနှင့် နိုင်ငံတကာ အစိုးရ မဟုတ်သော အဖွဲ့ အစည်း ၁၈ ဖွဲ့တို့၏ရုံး ၁၄ ရုံး၊ နေအိမ် ၁၆ လုံး၊ သိုလှောင်ရုံ ၁၅ လုံး၊ မော်တော်ယာဉ်၁၄ စီး၊ ရေယာဉ် နှစ်စင်း၊ မော်တော် ဆိုင်ကယ်၂၉ စီးနှင့် ရုံးသုံး ပစ္စည်းများ ခန့်မှန်းတန်းဖိုး ငွေကျပ်သန်း ၄၃၀ ခန့်နှင့် အမေရိကန် ဒေါ်လာ ၄၃၀၀၀၀ ခန့် ပျက်စီး ဆုံးရှုံးခဲ့ကြောင်း ဖော်ပြထားသည်။

ထို့ပြင် အဆိုပါ နိုင်ငံခြားသူမှာ ၁၉၉၃ ခုနှစ် ကတည်းက ရောက်ရှိခဲ့ပြီး မြန်မာ ပြည်သူများ၏ အကျိုးကို အကူအညီပေး လိုသောကြောင့် တာဝန်ထမ်းဆောင်နေသူဖြစ်ကြောင်း ၎င်းကိုယ်တိုင် လွန်ခဲ့ သည့် နှစ်၂၀ ခန့်မှစ၍ ဗုဒ္ဓဘာသာ တရားတော်ကို ယုံကြည်စွာ လေ့လာ ဆည်းပူးနေသူဖြစ်ပြီး ဗုဒ္ဓ ဘာသာဝင်တို့ အထွတ်အမြတ်ထားသည့် သာသနာ့အလံကို မဖွယ်မရာပြုလုပ်လိုသော စိတ်ဆန္ဒအလျှင်း မရှိ ကြောင်း သတင်း ထုတ်ပြန်ချက်မှာ ဖော်ပြထားပါတယ်။

ဖြစ်စဉ်တွင် ရခိုင်ပြည်နယ်အစိုးရမှ အချိန်တိုတွင်း ထိရောက်သည့် ကာကွယ်မှုများမပေးနိုင်၍ ပျက်ဆီးဆုံးရှုံးမှုများ ဖြစ်ပေါ်ခဲ့ကြောင်း သတင်းထုတ်ပြန်ချက်တွင်ပါရှိသည်။

စစ်တွေမြို့တွင် ကျန်ရှိနေသော ကုလသမဂ္ဂနှင့် နိုင်ငံတကာ NGO ၀န်ထမ်းများ၏ လုံခြုံရေးများ အတွက်ဆောင်ရွက်ပေး မည်ဖြစ်ပြီး ရန်ကုန်မြို့သို့ ပြန်လည် ထွက်ခွာ သွားသော နိုင်ငံတကာ အဖွဲ့အစည်းများမှ ဝန်ထမ်းများကိုလည်း မူလအခြေအနေတိုင်း လုံခြုံစိတ်ချစွာ တာဝန် ထမ်းဆောင်ရေးအတွက် ရခိုင်ပြည်နယ် အစိုးရနှင့် ပြည်ထောင်စု အစိုးရက ဆောင်ရွက်ပေးမည်ဟု ထုတ်ပြန်ချက်တွင်ပါရှိသည်။

လူစုလူဝေးဖြင့် ဖျက်ဆီးခဲ့ရာတွင် ပါဝင်ကျူးလွန်သူများနှင့် မမှန်မကန်သတင်းဖြန့် စည်းရုံးလှုံ့ဆော်ခဲ့သူများ အရေးယူဖော်ထုတ် မည်ဟု ကြေညာချက်တွင် ဖော်ပြထားသည်။

အခင်းဖြစ်ပွားသည်မှာ ၁၀ ရက်ကျော်ရှိနေပြီဖြစ်ပြီး လက်ရှိ အရေးယူထားသည့် အခြေအနေကို ထည့်သွင်း ဖော်ပြထားခြင်း မရှိသေးပေ။

သတင်းထုတ်ပြန်ချက်အပြည့်အစုံဖတ်ရန်

April 9, 2014