ဧပြီ ၁၄၊ ၂၀၁၆
M-Media
– ဆီမီးဖိုင်နယ်တွင် ဘင်ဖီကာအသင်းနှင့် တွေ့ဆုံချင်သည့် ရီးယဲလ်တိုက်စစ်မှူး ရော်နယ်ဒို၏ အိပ်မက်အား ဖျက်ဆီးမိခဲ့သည့်အတွက် မိမိအနေဖြင့် ၀မ်းနည်းမိသည်ဟု ဘိုင်ယန်မြူးနစ်နည်းပြ ပက် ဂွာဒီယိုလာက အရွှန်းဖောက် ပြောကြားလိုက်သည်။
ယနေ့မနက်က ကစားခဲ့သည့် ကွာတားဖိုင်နယ် ဒုတိယအကျော့ပွဲစဉ်တွင် ဘိုင်ယန်မှာ ဘင်ဖီကာအား ၂ ဂိုးစီသရေကစားခဲ့ပြီး နှစ်ကျော့ပေါင်း ၃ ဂိုး ၂ ဂိုးဖြင့် ဆီမီးဖိုင်နယ်သို့ တက်ရောက်သွားခဲ့ပြီဖြစ်သည်။
ရီးယဲလ်မှာလည်း ဗုဒ္ဓဟူးနေ့မနက်ပိုင်းတွင် ၀ုလ်ဖ်ဘာ့ဂ်အသင်းအား ၃ ဂိုးပြတ်ဖြင့် အနိုင်ရရှိကာ နှစ်ကျော့ပေါင်း ၃ ဂိုး ၂ ဂိုးဖြင့် ဆီမီးတက်သွားခဲ့ပြီး ထိုပွဲ၏ ဟက်ထရစ်ရှင် ရော်နယ်ဒိုကမူ ဆီမီးဖိုင်နယ်တွင် ဘင်ဖီကာနှင့် တွေ့ဆုံချင်သည်ဟု ပွဲအပြီးတွင် ပြောကြားခဲ့သည်။
ဂွာဒီယိုလာကမူ ရော်နယ်ဒို၏ ဆန္ဒကို မဖြည့်ဆည်းနိုင်ခဲ့သည့်အတွက် ၀မ်းနည်းမိသည်ဟု ဆိုသည်။
“ရော်နယ်ဒိုက ဆီးမီးဖိုင်နယ်မှာ ဘင်ဖီကာနဲ့ တွေ့ချင်တယ်ဆိုတာ ကျွန်တော် သိပါတယ်။ သူ့အတွက် ကျွန်တော်ဝမ်းနည်းမိပါတယ်” ဟု ဂွာဒီယိုလာက ပြောကြားခဲ့သည်။
ထို့ပြင် မိမိအနေဖြင့် ရာသီကုန်တွင် မန်စီးတီးသို့ ပြောင်းရွှေ့မည်ဖြစ်သည့်အတွက် ယခုနှစ် ချန်ပီယံလိဂ်တွင် ဗိုလ်စွဲနိုင်ခဲ့ပါကလည်း ဘိုင်ယန်ပရိတ်သတ်များ၏ ကျေနပ်မှုကို ရရှိမည်မဟုတ်ဟု ထည့်သွင်းပြောကြားခဲ့သည်။
Ref: Goal
