မေ ၁၀၊ ၂၀၂၂
M-Media
-သီရိလင်္ကာနိုင်ငံမှာ စီးပွားပျက်ကပ်ကြောင့် ဖြစ်လာတဲ့ အစိုးရဆန့်ကျင်ရေး ဆန္ဒပြပွဲတွေဟာ တိုက်ခိုက်မှုတွေအထိ ပြင်းထန်လာခဲ့ပြီး တနင်္လာနေ့တစ်ရက်တည်းမှာပဲ အနည်းဆုံး လူ ၅ ဦး သေဆုံးခဲ့ပါတယ်။
ဆန္ဒပြသူတွေဟာ အာဏာရပါတီက အရေးပါတဲ့သူတွေ၊ အမာခံတွေနဲ့ သူတို့ပိုင်ဆိုင်တဲ့ နေအိမ်အဆောက်အဦးတွေကို နိုင်ငံတစ်၀ှမ်း ပစ်မှတ်ထား တိုက်ခိုက်မှုတွေ ပိုမို ပြုလုပ်လာပါတယ်။
မနေ့က မြို့တော်ကိုလံဘိုမှာရှိတဲ့ ၀န်ကြီးချုပ်နေထိုင်ရာ အဆောက်အဦးအရှေ့မှာ ထောင်နဲ့ချီတဲ့သူတွေ ဆန္ဒပြခဲ့ကြပြီး အဓိကဂိတ်ပေါက်၀ကို ချိုးဖောက်၀င်ရောက်ကာ ထရပ်ကားတစ်စီးကို မီးရှို့ခဲ့ပါတယ်။ အဆောက်အဦးထဲက လုံခြုံရေးတွေကလည်း ဆန္ဒပြသူတွေကို ပြန်လည်ပစ်ခတ်ခဲ့ပါတယ်။
ကိုလံဘိုဆင်ခြေဖုံးက မြို့တစ်ခုမှာ အာဏာရပါတီက လွှတ်တော်အမတ်တစ်ဦးဟာ ၀ိုင်းလာတဲ့ လူအုပ်ကို သေနတ်နဲ့ ပစ်ခဲ့တဲ့အတွက် လူ ၂ ဦးသေဆုံးခဲ့ပါတယ်။ အဲဒီ လွှတ်တော်အမတ်နဲ့ လုံခြုံရေးအရာရှိိတို့ကိုလည်း နောက်ပိုင်းမှာ သေဆုံးလျက် တွေ့ရှိခဲ့ပါတယ်။
၀န်ကြီးချုပ် မာဟင်ဒါ ရာဂျာပက်ဆာရဲ့ နိုင်ငံတောင်ပိုင်းက ဇာတိရွာမှာ ရှိတဲ့ ရာဂျာပက်ဆာ ပြတိုက်လည်း မီးရှို့ဖျက်ဆီးခံခဲ့ရပါတယ်။
အစိုးရဆန့်ကျင်ရေး ဆန္ဒပြသူတွေကို အစိုးရထောက်ခံသူတွေက တုတ်တွေနဲ့၀င်ရိုက်တာတွေလည်း ဖြစ်ပွားခဲ့ပြီး အနည်းဆုံး လူ ၁၅၀ လောက် ဒဏ်ရာရခဲ့ပါတယ်။
မနေ့က အဖြစ်အပျက်တွေကြောင့် ၀န်ကြီးချုပ် မာဟင်ဒါ ရာထူးကနေ နှုတ်ထွက်သွားခဲ့ပါတယ်။ ဒါပေမယ့် သူ့ရဲ့ညီဖြစ်သူ သမ္မတ ဂိုတာဘာယာကတော့ ရာထူးမှာဆက်ရှိနေပါတယ်။
စီးပွားပျက်ကပ်ဆိုက်ပြီး နိုင်ငံတစ်၀ှမ်း အထွေထွေအကြပ်အတည်းနဲ့ ကြုံတွေ့နေရတာကြောင့် သီရိလင်္ကာပြည်သူတွေဟာ ပြီးခဲ့တဲ့သီတင်းပတ်အနည်းကစလို့ နိုင်ငံတစ်၀ှမ်း ဆန္ဒပြပွဲတွေ ပြုလုပ်ကာ အစိုးရတစ်ဖွဲ့လုံးနှုတ်ထွက်ဖို့ တောင်းဆိုနေကြတာပါ။
ရာဂျာပက်ဆာမိသားစုဟာ သီရိလင်္ကာနိုင်ငံရေးကို နှစ်ပေါင်းများစွာ ကြီးစိုးလာတာ ဖြစ်ပါတယ်။
Ref: BBC
