Author: Ko Lay

ဧပြီ ၁၅၊ ၂၀၂၂

M-Media

– စစ်ကိုင်းတိုင်းဒေသကြီးက ရွာပေါင်း ၁၀၀ ကျော်လောက်ကို မြန်မာစစ်တပ်က မီးရှို့ဖျက်ဆီးခဲ့တဲ့ ဓာတ်ပုံအထောက်အထားတွေ ထွက်ပေါ်လာပြီး နိုင်ငံတကာအသိုင်းအ၀ိုင်းက စစ်ကောင်စီဟာ အကြမ်းဖက်ကမ်ပိန်း ဆင်နွှဲနေတယ်လို့ ရှုတ်ချပြောကြားလိုက်ပါတယ်။

စစ်တပ်ရဲ့ ကျူးလွန်မှု အချက်အလက်တွေကို စုဆောင်းနေတဲ့ Data For Myanmar အဖွဲ့က ပြီးခဲ့တဲ့နှစ် ဒီဇင်ဘာလက စပြီး စစ်တပ်နဲ့ သူတို့ကို ထောက်ခံတဲ့ အဖွဲ့အစည်းတွေဟာ စစ်ကိုင်းတိုင်းဒေသကြီးက ရွာတွေကို နေ့စဥ်နီးပါး မီးရှို့ခဲ့တယ်ဆိုတာ တွေ့ရတယ်လို့ ဆိုပါတယ်။ 

အမေရိကန် အာကာသအေဂျင်စီ နာဆာနဲ့ ဂြိုဟ်တုဓာတ်ပုံ ရိုက်ကူးရေး ကုမ္ပဏီ Planet Labs တို့က ပြီးခဲ့တဲ့ ရက်ပိုင်းမှာ စစ်ကိုင်းဒေသကြီးက ဒေသတွေကို ရိုက်ကူးထားတဲ့ ဂြိုဟ်တုဓာတ်ပုံတွေ ထုတ်ပြန်ခဲ့ပါတယ်။ 

အဲဒီဓာတ်ပုံတွေမှာ စစ်တပ်က တိုက်ခိုက်မှုတွေ လုပ်တယ်လို့ ပြည်တွင်းမီဒီယာတွေက ဖော်ပြတဲ့ ဒေသတွေမှာ ရွာလုံးကျွတ် မီးရှို့ခံထားရတဲ့ အထောက်အထားတွေ တွေ့ခဲ့ရပါတယ်။

“ဒါဟာ အကြမ်းဖက်မှု ကမ်ပိန်းပါ။ လက်နက်ကိုင်ပြီး ပြန်တော်လှန်သူတွေကို ပံ့ပိုးကူညီတယ်လို့ စစ်ကောင်စီက ယူဆတဲ့ ရွာတွေ၊ ဒေသတွေမှာ နေထိုင်တဲ့သူတွေကို ရန်သူလို့ သတ်မှတ်လိုက်တာပါပဲ” လို့ မြန်မာနိုင်ငံရဲ့ လူ့အခွင့်အရေးဆိုင်ရာ ကုလ အထူးကိုယ်စားလှယ် တွမ်အန်ဒရူးက ပြောပါတယ်။ 

စစ်တပ်ရဲ့ တိုက်ခိုက်မှုကို ခံရသူတွေ၊ ကျူးလွန်မှုကို မျက်မြင်ကြုံတွေ့ရသူတွေရဲ့ ပြောကြားချက်တွေကို နားထောင်ခဲ့တယ်လို့လည်း အန်ဒရူးက ဆိုပါတယ်။ 

ရွာလုံးကျွတ်မီးရှို့ဖျက်ဆီးမှုဟာ မြန်မာစစ်တပ်က တိုင်းရင်းသားဒေသတွေမှာ အမြဲလိုလို အသုံးပြုနေတဲ့ နည်းလမ်းတစ်ခုဖြစ်ပြီး ၂၀၂၁ ခုနှစ် ဖေဖော်၀ါရီ ၁ ရက်နေ့ အာဏာသိမ်းပြီးနောက်ပိုင်း ဗမာလူမျိုးအများစု နေထိုင်တဲ့ ဒေသတွေမှာပါ တွေ့မြင်လာရပါတယ်။ 

စစ်ကိုင်းတိုင်းဒေသကြီး၊ မကွေးတိုင်းဒေသကြီးနဲ့ ချင်းပြည်နယ်တို့ဟာ လက်နက်ကိုင်တော်လှန်ရေး အားကောင်းတဲ့နေရာတွေဖြစ်ပြီး မြန်မာစစ်တပ်က နည်းပေါင်းစုံနဲ့ နှိမ်နင်းနေတာဖြစ်ပါတယ်။

Ref: Reuters 

ဧပြီ ၁၄၊ ၂၀၂၂

M-Media 

-တစ်ကျော့ပြန် စစ်အာဏာရှင်လက်အောက်မှာ မြန်မာနိုင်ငံဟာ စာရေးဆရာ၊ ဂျာနယ်လစ်နဲ့ တတ်သိပညာရှင်တွေကို ဖမ်းဆီးအကျဥ်းချမှုမှာ တရုတ်နဲ့ ဆော်ဒီအာရေဗျပြီးရင် တတိယအများဆုံး နိုင်ငံအဖြစ် မှတ်တမ်း၀င်လာပါတယ်။ 

၂၀၂၁ ခုနှစ်အတွင်း နိုင်ငံပေါင်း ၃၆ နိုင်ငံမှာ ဂျာနယ်လစ်နဲ့ တတ်သိပညာရှင် အနည်းဆုံး ၂၇၇ ဦး ဖမ်းဆီးအကျဥ်းချခံခဲ့ရတာပါ။ 

အာဏာသိမ်းမှုဖြစ်ခဲ့တဲ့ မြန်မာနိုင်ငံမှာ ဂျာနယ်လစ်တွေ၊ တတ်သိပညာရှင်တွေ ဖမ်းဆီးခံရမှု အများအပြား ဖြစ်ပေါ်ခဲ့ကာ စာရေးဆရာ အနည်းဆုံး ၂၆ ဦး ထောင်ချခံခဲ့ရပါတယ်။ 

စာရေးဆရာတွေ၊ ဂျာနယ်လစ်တွေနဲ့ တတ်သိပညာရှင်တွေကို ဖမ်းဆီးအကျဥ်းချကာ လွတ်လပ်စွာ ပြောဆိုမှုကို ပိတ်ပင်ရာမှာ တရုတ်နိုင်ငံက အဆိုးဆုံးဖြစ်ပြီး၊ ဒုတိယက ဆော်ဒီအာရေဗျနိုင်ငံ ဖြစ်ပါတယ်။ 

မြန်မာက တတိယလိုက်ပြီး ကမ္ဘာတစ်၀ှမ်း တတ်သိပညာရှင်တွေ ဖမ်းဆီးအကျဥ်းချမှု အားလုံးရဲ့ထက်၀က်ကျော်ဟာ ဒီ ၃ နိုင်ငံမှာ ဖြစ်ပွားတာပါ။  

Ref: PEN