Author: Ko Lay

မတ် ၃၁၊ ၂၀၁၅
M-Media

– ရုရှားအနေဖြင့် လွတ်လပ်သော ပါလက်စတိုင်းနိုင်ငံဖြစ်လာရေးအတွက် တိုက်ပွဲဝင်သွားမည်ဟု ရုရှားသမ္မတ ဗလာဒီမာပူတင်က ပြောကြားလိုက်ပြီး အရှေ့အလယ်ပိုင်း ပြဿနာများကို ငြိမ်းချမ်းသော နည်းလမ်းများဖြင့် ဖြေရှင်းလည်း တိုက်တွန်းခဲ့သည်။

စနေနေ့က ပြုလုပ်ခဲ့သည့် အာရပ်လိဂ် ထိပ်သီးအစည်းဝေး မိန့်ခွန်းတွင် ပူတင်က ထိုကဲ့သို့ ထည့်သွင်းပြောကြားခဲ့ခြင်းဖြစ်ပြီး နိုင်ငံများ၏ ပြည်တွင်းရေးရာများကို နိုင်ငံခြားတိုင်းပြည်များက ၀င်ရောက်စွက်ဖက်မှုကိုလည်း ဆန့်ကျင်ခဲ့သည်။ ထို့ပြင် ရုရှား၏ အခန်းကဏ္ဍမှာ သံတမန်ရေးရာ နည်းလမ်းများတွင် ပါဝင်နိုင်သည်ဟု ဆိုသည်။

“ပါလက်စတိုင်းဟာ အရှေ့ဂျေရုစလင်ကို မြို့တော်အဖြစ်သတ်မှတ်ကာ လွတ်လပ်ပြီး နေထိုင်ဖို့သင့်တော်တဲ့ နိုင်ငံအဖြစ် တည်ထောင်ခွင့် ရှိပါတယ်။ ဒီရည်ရွယ်ချက်အောင်မြင်ဖို့ နှစ်နိုင်ငံလမ်းကြောင်းတွေ၊ နိုင်ငံပေါင်းစုံ လမ်းကြောင်းတွေကနေတစ်ဆင့် ရုရှားက ဆက်လက် ကူညီသွားမှာပါ” ဟု ပူတင်က ပြောကြားခဲ့သည်။

ထို့ပြင် အမေရိကန်ကျောထောက်နောက်ခံပြုထားသည့် အစ္စရေး၏ ဂါဇာပြဿနာနှင့် ပတ်သက်သည့် ရပ်တည်ချက်ကို ပူတင်က ပွင့်ပွင့်လင်းလင်း ဆန့်ကျင်ခဲ့ပြီး အစ္စရေးမှာ အရှေ့အလယ်ပိုင်းတွင် ခြေရှုပ်နေသည်ဟုလည်း ပြောကြားခဲ့သည်။ ထို့ပြင် လတ်တလော ဖြစ်ပွားနေသည့် ယီမင်ပြဿနာကိုလည်း ငြိမ်းချမ်းသောနည်းလမ်းဖြင့် ဖြေရှင်းရန် တိုက်တွန်းခဲ့သည်။

ပြီးခဲ့သည့်လက အမေရိကန်၊ ဥရောပ၊ ကုလနှင့် ရုရှားတို့ လေးဖွဲ့ပေါင်းကာ အစ္စရေးနှင့် ပါလက်စတိုင်းတို့၏ ငြိမ်းချမ်းရေး ဆွေးနွေးမှု ပျက်ပြယ်သွားခြင်းအတွက် စိတ်ပျက်မိသည်ဟု ကြေညာချက်တစ်ခု ထုတ်ပြန်ခဲ့သည်။

ပါလက်စတိုင်းပိုင်နက်များတွင် အစ္စရေးက တရားမ၀င် အခြေချအိမ်ရာများ ဆက်လက်ဆောက်လုပ်နေမှုကို မကျေနပ်သည့်အတွက် ငြိမ်းချမ်းရေးဆွေးနွေးပွဲမှ ပါလက်စတိုင်းက ထွက်သွားခဲ့ပြီး အစ္စရေးကလည်း ပါလက်စတိုင်းအစိုးရအတွင်း ဟားမက်စ်အဖွဲ့ ပါဝင်လာမှုကို လက်မခံပဲ ဆွေးနွေးပွဲကို ဖျက်သိမ်းခဲ့သည်။

အဆိုပါ လေးဖွဲ့ပေါင်း ကြေညာချက်တွင် ငြိမ်းချမ်းရေးဆွေးနွေးမှုမှာ အစ္စရေး၏ လုံခြုံရေး စိုးရိမ်မှုနှင့် ပါလက်စတိုင်းတို့၏ နိုင်ငံတည်ထောင်ရေး တောင်းဆိုမှု နှစ်ခုစလုံးအပေါ် အလေးထားဆောင်ရွက်ရမည်ဟု ဆိုသည်။

“ပါလက်စတိုင်းပြည်သူတွေရဲ့ အခြေခံလိုအပ်ချက်တွေကိုဖြေရှင်းရေးနဲ့ တည်ငြိမ်အေးချမ်းမှုရရှိရေး အရှိန်မြှင့်ဖို့ ပြန်လည်တည်ဆောက်ရေး လုပ်ငန်းတွေ လိုအပ်နေတဲ့ ဂါဇာက ခက်ခဲတဲ့အခြေအနေအပေါ်မှာ မိမိတို့ လေးဖွဲ့စလုံးက အလွန်အမင်း စိုးရိမ်ပူပန်မိပါတယ်” ဟု ကြေညာချက်တွင် ဖော်ပြထားသည်။

Ref: Independent