ဇန်နဝါရီ ၂၉၊ ၂၀၂၀ (နေ့လည် ၁ နာရီ)
M-Media
- တရုတ်နိုင်ငံမှာ ကိုရိုနာ ဗိုင်းရပ်စ်သစ် ကူးစက်မှုကြောင့် သေဆုံးသူအရေအတွက်ဟာ အင်္ဂါနေ့အထိ ၁၃၂ ဦး ရှိလာပြီလို့ တရုတ် အမျိုးသားကျန်းမာရေးကော်မရှင်က ဒီကနေ့မှာ ထုတ်ပြန်ကြေငြာလိုက်ပါတယ်။ ရောဂါပိုး ကူးစက်နေသူအရေအတွက်ဟာ ၅၉၇၄ ဦးအထိ မြင့်တက်လာပြီး ကူးစက်နေတယ်လို့ သံသယရှိသူကတော့ ၉၂၃၉ ဦး ရှိနေပါတယ်။ ရောဂါထိန်းချုပ်ရေးနဲ့ တားဆီးကာကွယ်ရေးအဖွဲ့ အကြီးအကဲ Zhong Nanshan က ကူးစက်မှုဟာ နောက်တစ်ပတ်ကနေ ၁၀ ရက်အတွင်း အမြင့်ဆုံးကို ရောက်လာဖို့ရှိတယ်လို့ သတိပေးထားပါတယ်။
- တရုတ်နိုင်ငံကရောက်လာတဲ့ မိသားစုတစ်ခုမှာ ကိုရိုနာဗိုင်းရပ်စ်သစ် ကူးစက်နေတာကို တွေ့ရတယ်လို့ အာရပ်စော်ဘွားများပြည်ထောင်စု (ယူအေအီး) က ဒီကနေ့မှာ အတည်ပြု ထုတ်ပြန်ခဲ့ပြီး ဒါဟာ ယူအေအီးမှာ ပထမဆုံး ကူးစက်သူ တွေ့ရှိမှုလည်း ဖြစ်ပါတယ်။ ကူးစက်ခံရသူတွေကို ဆေးဝါးကုသမှုတွေ ပေးနေပြီး တည်ငြိမ်တဲ့ အနေအထားတစ်ခုမှာ ရှိနေတယ်လို့လည်း ယူအေအီး ကျန်းမာရေးဝန်ကြီးဌာနက ပြောပါတယ်။
- ရောဂါအဓိကဖြစ်ပွားရာ ဝူဟန်မြို့ကနေ ကယ်ထုတ်လာသူတွေထဲက လူ ၄ ဦးမှာ ချောင်းဆိုး၊ ဖျားနာတာတွေ တွေ့ရတဲ့အတွက် ဆေးရုံတင်ကာ ဆေးဝါးကုသမှုတွေပေးနေတယ်လို့ ဂျပန်က ထုတ်ပြန်ထားပါတယ်။ ဝူဟန်မြို့မှာ ပိတ်မိနေတဲ့ အမေရိကန်နိုင်ငံသား ၂၄၀ ကို တယ်ဆောင်သွားတဲ့ လေယာဉ်တစ်စီးဟာ အလာစကာမြို့ကို ဆိုက်ရောက်ဖို့ရှိနေပြီး၊ နိုင်ငံအတွင်းက လေဆိပ်ပေါင်း ၂၀ ကျော်မှာလည်း စောင့်ကြည့်စစ်ဆေးမှုတွေကို အမေရိကန်က တိုးမြှင့်လုပ်ဆောင်ထားပါတယ်။
- ရောဂါကူးစက်ဖြစ်ပွားနေသူ ၃ ဦး ထပ်မံတွေ့ရှိရတယ်လို့ မလေးရှားနိုင်ငံက ဒီကနေ့မှာ ထုတ်ပြန်ခဲ့ပြီး စုစုပေါင်း မလေးရှားမှာ ရောဂါကူးစက်သူအရေအတွက်ဟာ ၇ ဦးအထိ ရှိလာပြီဖြစ်ပါတယ်။
- ဩစတေးလျနိုင်ငံကလည်း ဝူဟန်မြို့မှာ ပိတ်မိနေတဲ့ နိုင်ငံသားတွေကို ကယ်ထုတ်ကာ ခရစ္စမတ်ကျွန်းမှာ စောင့်ကြည့်ထိန်းသိမ်းထားဖို့ စီစဉ်နေပါတယ်။
Ref: Aljazeera
