ဒီဇင်ဘာ ၁၉၊ ၂၀၂၃
M-Media
(ဓာတ်ပုံ – ရာဖာရှိ လူနေတိုက်ခန်း ဗုံးကြဲခံရပြီးနောက် မြင်ကွင်း)
(ဓာတ်ပုံ – ရာဖာရှိ လူနေတိုက်ခန်း ဗုံးကြဲခံရပြီးနောက် မြင်ကွင်း)
(ဓာတ်ပုံ – ရာဖာရှိ လူနေတိုက်ခန်း ဗုံးကြဲခံရပြီးနောက် မြင်ကွင်း)
-ပါလက်စတိုင်းနိုင်ငံ ဂါဇာကမ်းမြှောင်တောင်ပိုင်း ရာဖာမြို့မှာ ဒီကနေ့ အရပ်ဖက်ပစ်မှတ်တွေကို အစ္စရေးက တိုက်ခိုက်ခဲ့တာကြောင့် အနည်းဆုံး လူ ၄၀ လောက် သေဆုံးခဲ့ပါတယ်။
ဂါဇာမြောက်ပိုင်းက အစ္စရေးရဲ့ ဗုံးကြဲလူသတ်ပွဲကြောင့် အီဂျစ်နဲ့ ကပ်နေတဲ့ တောင်ပိုင်းကို ရွှေ့လာတဲ့ ပါလက်စတိုင်းပြည်သူတွေဟာ တောင်ပိုင်းမှာလည်း အသက်ဘေးကနေ မလွတ်ပါဘူး။
အင်္ဂါနေ့မနက်ပိုင်း ရာဖာမှာ လူနေ တိုက်ခန်း ၃ ခုကို အစ္စရေးက ဗုံးကြဲဖျက်ဆီးခဲ့ပြီး အနည်းဆုံး ၂၉ ဦး သေဆုံးကာ၊ အပျက်အဆီးတွေကြားထဲ ပိတ်မိသူတွေ ရှိနေတာကြောင့် သေဆုံးသူအရေအတွက် မြင့်တက်လာနိုင်တယ်လို့ ဂါဇာ ကျန်းမာရေးတာ၀န်ရှိသူတွေက ပြောပါတယ်။
ဂါဇာမြောက်ပိုင်းက ဂျာဘာလီယာ ဒုက္ခသည်စခန်းကိုလည်း အစ္စရေးက ဗုံးကြဲခဲ့ပြီး အနည်းဆုံး လူ ၁၀ ဦး သေဆုံးခဲ့ပါတယ်။
ဒီကနေ့မနက်ပိုင်းမှာပဲ ဂါဇာမြောက်ပိုင်းက အလ်အောင်ဒါဆေးရုံကို အစ္စရေးတပ်တွေ ၀င်ရောက်စီးနင်းကာ ဆေးရုံက လူ ၂၄၀ ကျော်ကို ဓားစားခံအဖြစ်ဖမ်းဆီးပြီး ဆေးရုံကိုလည်း စစ်စခန်းအဖြစ် ပြုလုပ်ထားပါတယ်။
ဓားစားခံအဖြစ် ဖမ်းဆီးခံထားရသူတွေဟာ ဆေးရုံ၀န်ထမ်း ၈၀၊ လူနာ ၄၀ နဲ့ အိုအိမ်စွန့်ခွာ ထွက်ပြေးလာရသူ ၁၂၀ တို့ ဖြစ်ပါတယ်။
အဟ်လီအာရပ် ဆေးရုံကိုလည်း ဒီကနေ့မှာပဲ အစ္စရေးစစ်တပ်က ၀င်ရောက်စီးနင်းခဲ့တယ်လို့ ဆေးရုံကို စီမံနေတဲ့ ခရစ်ယာန်အသင်းတော်က ပြောပါတယ်။
အစ္စရေးတပ်တွေဟာ ဆေးရုံ၀င်ပေါက်ကို ဖျက်ဆီးခဲ့ပြီး ၀န်ထမ်းအများအပြားကိုလည်း ဓားစားခံအဖြစ် ဖမ်းဆီးခဲ့ပါတယ်။
ဟားမက်စ်ရဲ့တိုက်ခိုက်မှုကို တုန့်ပြန်တယ်ဆိုတဲ့ခေါင်းစဥ်နဲ့ အောက်တိုဘာ ၇ ရက်နေ့ကစတင်တဲ့ အစ္စရေးရဲ့ ဂါဇာလူသတ်ပွဲမှာ အသတ်ခံရသူ ပါလက်စတိုင်းဦးရေဟာ ၁၉၀၀၀ ကျော်လာခဲ့ပြီ ဖြစ်ပါတယ်။
Ref: Aljazeera
