Author: Ko Lay

ဒီဇင်ဘာ ၁၁၊ ၂၀၂၃

M-Media 

-အစ္စရေးရဲ့ တိုက်ခိုက်သတ်ဖြတ်မှုကို ခံနေရတဲ့ ဂါဇာက ပါလက်စတိုင်းပြည်သူတွေအတွက် ကမ္ဘာ့ကျန်းမာရေးအဖွဲ့ WHO ဟာ သမိုင်း၀င်ဆုံးဖြတ်ချက်တစ်ခုကို ဒီကနေ့မှာ ချမှတ်လိုက်ပါတယ်။ 

ဂါဇာပြည်သူတွေကို ဘယ်လိုအခြေအနေမျိုးမှာမဆို ကျန်းမာရေးစောင့်ရှောက်မှုပေးဖို့ဖြစ်ပြီး WHO အမှုဆောင်ဘုတ်အဖွဲ့က ကန့်ကွက်သူမရှိ တစ်ညီတစ်ညွတ်တည်း မဲပေး အတည်ပြုခဲ့ကြတာဖြစ်ပါတယ်။ 

အဖွဲ့ရဲ့ ၇၅ နှစ်တာသမိုင်းမှာ ဒီလိုဆုံးဖြတ်ချက်မျိုး ချခဲပြီး အခုအကြိမ်ဟာ ၇ ကြိမ်မြောက်ဖြစ်ပါတယ်။ 

ကမ္ဘာတစ်၀ှမ်းက ဆရာ၀န်တွေနဲ့ ကျန်းမာရေးတာ၀န်ရှိသူတွေက ဒီဆုံးဖြတ်ချက်ကို လူသားထုအတွက် အောင်မြင်မှုလို့ ခေါ်၀ေါ်သမုတ်ခဲ့ပါတယ်။ 

“ဒါဟာ နိုင်ငံတကာက ပြည်သူတွေရဲ့ ကျန်းမာရေးကို အဓိကထား လုပ်ဆောင်နေတဲ့ WHO ရဲ့ အရေးပါတဲ့ အခိုက်အတန့်ပါ။ လူသားဆန်မှုရဲ့အောင်ပွဲလို့ ပြောလို့ရပါတယ်။ ကျန်းမာရေး စောင့်ရှောက်မှု မြင့်မားရေး၊ အားနည်းသူတွေကို ကာကွယ်ရေး၊ လူ့အသက်တွေကို ကယ်တင်ရေး ဆောင်ရွက်နေတဲ့ အဖွဲ့၀င်နိုင်ငံတွေရဲ့ အောင်ပွဲလည်း ဖြစ်ပါတယ်” လို့ WHO ရဲ့ ဒေသတွင်းဒါရိုက်တာဖြစ်သူ ဒေါက်တာ အဟ်မဒ် အလ်-မန်ဒါရီက ပြောပါတယ်။ 

အောက်တိုဘာ ၇ ရက်နေ့နောက်ပိုင်း ဂါဇာမှာ အစ္စရေးရဲ့သတ်ဖြတ်မှုကြောင့် ကုလ၀န်ထမ်း ၁၁၀ ကျော်သေဆုံးခဲ့ပြီ ဖြစ်ပါတယ်။ 

Ref : Aljazeera 

ဒီဇင်ဘာ ၁၁၊ ၂၀၂၃
M-Media 

• ပြီးခဲ့တဲ့ ၂၄ နာရီအတွင်း ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးရဲ့ တိုက်ခိုက်သတ်ဖြတ်မှုကြောင့် လူ ၃၀၀ နီးပါး သေဆုံးခဲ့ပြီး ၅၅၀ ကျော် ဒဏ်ရာရခဲ့ပါတယ်။ အောက်တိုဘာ ၇ ရက်နေ့နောက်ပိုင်း ဂါဇာမှာ အစ္စရေးရဲ့ သတ်ဖြတ်မှုကို ခံရသူအရေအတွက်ဟာ ၁၈၀၀၀ ကျော်လာခဲ့ပြီဖြစ်ပါတယ်။ 
• အစ္စရေးဟာ ရေ၊ စားနပ်ရိက္ခာနဲ့ လောင်စာဆီတွေကို လက်နက်အဖြစ် အသုံးပြုနေတယ်လို့ ကုလရဲ့ ပါလက်စတိုင်းအကူအညီပေးရေးအဖွဲ့ UNRWA အကြီးအကဲက ပြောပါတယ်။ 

-ဂါဇာမှာ အစ္စရေးက မှားယွင်းဆောင်ရွက်မှုတွေကြောင့် ဒေသတွင်းပဋိပက္ခ ပိုမိုကြီးထွားလာနိုင်တယ်လို့ လက်ဘနွန်တောင်ပိုင်းမှာ အခြေစိုက်နေတဲ့ ကုလသမဂ္ဂ ငြိမ်းချမ်းရေးတပ်ဖွဲ့က သတိပေးလိုက်ပါတယ်။

-အစ္စရေးရဲ့ တိုက်ခိုက်သတ်ဖြတ်မှုတွေကြောင့် အရှေ့အလယ်ပိုင်းက မျိုးဆက်သစ် လူ့အဖွဲ့အစည်းဟာ အစွန်းရောက်သွားနိုင်တဲ့ အန္တရာယ်ရှိနေပြီး၊ ငြိမ်းချမ်းရေးရဖို့ အခွင့်အလမ်းကလည်း အလွန်နည်းလာတယ်လို့ ကာတာ၀န်ကြီးချုပ်က ဒိုဟာဖိုရမ်မှာ ကမ္ဘာ့ခေါင်းဆောင်တွေကို ပြောကြားခဲ့ပါတယ်။ 

• အစ္စရေးဟာ ဂါဇာက ပါလက်စတိုင်းတွေကို ရှင်းလင်းဖို့ ကြိုးစားနေပြီး ဒီလုပ်ရပ်ဟာ လူမျိုးတုန်းသတ်ဖြတ်မှုမြောက်တယ်လို့ ဂျော်ဒန်နိုင်ငံခြားရေး၀န်ကြီးက ၀ေဖန်ပြောကြားလိုက်ပါတယ်။ 

Ref: Aljazeera 

(ဓာတ်ပုံ – အစ္စရေး၏ သတ်ဖြတ်မှုကို ခံခဲ့ရသည့် ခင်ပွန်းနှင့် ရင်သွေးငယ်အား နောက်ဆုံးနှုတ်ဆက်နေသည့် ပါလက်စတိုင်း အမျိုးသမီး)

ဒီဇင်ဘာ ၁၀၊ ၂၀၂၃

M-Media 

-ဂါဇာမှာ နေထိုင်နေတဲ့ ပါလက်စတိုင်းပြည်သူတွေကို အီဂျစ်နိုင်ငံဆီ မောင်းထုတ်ဖို့ အစ္စရေးက ကြံစည်လုပ်ဆောင်နေလို့ ကုလရဲ့ ပါလက်စတိုင်းဆိုင်ရာ အကူအညီပေးရေးအဖွဲ့ UNRWA အကြီးအကဲ ဖိလစ်ပီ လာဇာရီနီက ပြောပါတယ်။ 

အောက်တိုဘာ ၇ ရက်နေ့နောက်ပိုင်း အစ္စရေးရဲ့ ဂါဇာမှာ တိုက်ခိုက်သတ်ဖြတ်မှုကြောင့် သေဆုံးသူ ပါလက်စတိုင်းအရေအတွက်ဟာ ၁၇၀၀၀ ကျော်လာခဲ့ပြီဖြစ်ပါတယ်။ 

ဂါဇာမြောက်ပိုင်းမှာ စစ်ဆင်ရေးလုပ်မယ့်အတွက် ပါလက်စတိုင်းပြည်သူတွေကို တောင်းပိုင်းရွှေ့ခိုင်းခဲ့ပြီး၊ နောက်ပိုင်း တောင်ပိုင်းမှာပါ တိုက်ခိုက်သတ်ဖြတ်မှုတွေ လုပ်ဆောင်လာတာဖြစ်ပါတယ်။ 

လာဇာရီနီက ၁ ဒဿမ ၉ သန်းသော ဂါဇာပြည်သူတွေဟာ လက်ရှိ ဂါဇာကမ်းမြှောင် တောင်ဘက်အစွန်းပိုင်းမှာ ပိတ်မိနေပြီး လူသားချင်း စာနာထောက်ထားမှုဆိုင်ရာ ဆိုးဆိုး၀ါး၀ါး အခြေအနေတွေ ကြုံတွေ့နေရတယ်လို့ အမေရိကန်သတင်းစာတစ်စောင်မှာ စနေနေ့က ရေးသားခဲ့ပါတယ်။ 

“အစ္စရေးရဲ့ လုပ်ရပ်တွေကို ကြည့်ရင် ပါလက်စတိုင်းတွေကို အီဂျစ်ဆီ မောင်းထုတ်ဖို့ လုပ်နေတာကို တွေ့ရပါတယ်။ အဲဒီမှာနေချင်နေ၊ တစ်ခြားနေရာကို သွားချင်သွား အဲဒီလို ပုံစံမျိုးပါ” 

ဂါဇာမြောက်ပိုင်းကို ဖျက်ဆီးမှုဟာ ဒီအစီအစဥ်ရဲ့ ပထမခြေလှမ်း ဖြစ်ပြီး၊ လက်ရှိ ဒုတိယခြေလှမ်းအဖြစ် ဂါဇာတောင်ပိုင်းက အရေးပါတဲ့ ခန်ယူနစ်မြို့ကို ဖျက်ဆီးကာ ပါလက်စတိုင်းတွေအားလုံး အီဂျစ်နယ်စပ်ရောက်အောင် လုပ်ဆောင်နေတယ်လို့ လာဇာရီနီက ထည့်သွင်းရေးသားခဲ့ပါတယ်။ 

“ဒီလိုဆက်လုပ်နေရင် ပါလက်စတိုင်းတွေဟာ ဒုတိယအကြိမ် နိုင်ငံပျောက်ဆုံးမှုကို ကြုံလာရမှာဖြစ်ပြီး၊ ဂါဇာမြေဟာ ပါလက်စတိုင်းတွေနဲ့ မသက်ဆိုင်တော့တဲ့ အနေအထားမျိုး ရောက်သွားမှာပါ”

Ref: Aljazeera 

ဒီဇင်ဘာ ၈၊ ၂၀၂၃

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ ပြီးခဲ့တဲ့ ၂၄ နာရီအတွင်း အစ္စရေးက အနည်းဆုံး လူ ၃၅၀ လောက်ကို သတ်ဖြတ်ခဲ့ပါတယ်။ 

ဒုက္ခသည်စခန်းတွေနဲ့ လူနေအိမ်ယာတွေကို အဓိက ပစ်မှတ်ထားကာ အကြမ်းဖက်နေတာ ဖြစ်ပါတယ်။ 

အောက်တိုဘာ ၇ ရက်နေ့နောက်ပိုင်း ဂါဇာမှာ အစ္စရေးရဲ့ သတ်ဖြတ်မှုကြောင့် သေဆုံးသူ အရေအတွက်ဟာ ၁၇၁၇၇ ဦး ရှိလာပြီဖြစ်ပါတယ်။

ဒဏ်ရာရရှိသူက ၄၆၀၀၀ လောက်ရှိပြီး ဖျက်ဆီးခံရတဲ့ အဆောက်အဦးတွေအတွင်း ပိတ်မိပျောက်ဆုံးနေသူ အရေအတွက်က ၇ ထောင်နီးပါး ရှိနေပါတယ်။ 

အနောက်ဖက်ကမ်းမှာလည်း အစ္စရေးစစ်တပ်နဲ့ တရားမ၀င် အခြေချဂျူးတွေရဲ့ အကြမ်းဖက်မှုကြောင့် ၂၆၆ ဦး သေဆုံးပြီး၊ ဒဏ်ရာရသူက ၃၃၆၅ ဦး ရှိနေပါတယ်။ 

Ref: Aljazeera